Read Iban Josua 1 Bible Online

Josua 1 - Iban bible

Josua 1

¹Udah bekau pemati Moses ke nembiak TUHAN, TUHAN lalu bejaku ngagai Josua anak Nun, penulung Moses. Ku TUHAN bejaku,

²“Nembiak Aku Moses udah mati. Angkat nuan enggau semua orang Israel, bejalai meraka Sungai Jordan, lalu mansang ngagai menua ti diberi Aku ngagai sida.

³ Semua endur ti deka diindik kaki kita, endang udah diberi Aku ngagai kita, munyi ti udah disemaya Aku ngagai Moses.

⁴Kenyau ari menua puang enggau menua Lebanon nyentuk ngagai sungai ti besai nya, iya nya Sungai Eupratis, semua menua orang Iti, nyentuk ngagai Tasik Tengah di barat, nyadika menua kita.

⁵ Josua, nadai orang ulih ngalahka nuan sepemanjai umur nuan. Baka Aku ti udah enggau Moses, baka nya mega Aku deka enggau nuan; Aku enda ngelengkaka nuan, tauka ninggalka nuan.

⁶ Nuan enda tau enda kering sereta berani, laban nuan deka nguluka orang tu ngambi menua ti udah disemaya Aku ngagai aki ini sida.

⁷Tang anang enda kering sereta berani, lalu ngasika semua Adat ti diberi nembiak Aku Moses ngagai nuan; anang limpang ari Adat nya, ngambika nuan mujur di sebarang endur nuan bejalai.

⁸Anang ngetu macha Bup Adat tu; belematika iya siang malam, ngambika nuan ngereja semua utai ti ditulis dalam Bup tu. Nya baru nuan deka nyadi kaya-raja sereta mujur di sebarang endur nuan bejalai.

⁹Kingatka jaku Aku ti ngasuh nuan kering sereta berani: anang takut tauka lemi semengat, laban Aku, TUHAN Allah Taala nuan bisi enggau nuan di sebarang endur nuan bejalai.”

¹⁰Udah nya Josua lalu ngasuh bala tuai

¹¹bejalai nengah kem nya, lalu bejaku ngagai orang mayuh, “Sediaka bekal kita, laban tiga hari da agi, kita deka bejalai meraka Sungai Jordan, mansang ngambi menua ti diberi TUHAN Allah Taala kita ngagai kita.”

¹² Ku Josua bejaku ngagai raban bansa Reuben, Gat, enggau setengah ari raban bansa Manasi,

¹³“Kingatka jaku ti udah disebut Moses, ke nembiak TUHAN, ngagai kita, lebuh iya nyebut, ‘TUHAN Allah Taala kita deka meri ngagai kita siti endur alai kita diau.’

¹⁴Bini, anak enggau jelu tupi kita deka diau di menua ti diungkupka Moses ngagai kita ba tebing timur Sungai Jordan. Tang semua soldadu kita ke chukup disikap enggau senyata, mesti meraka Sungai Jordan lalu bejalai dulu ari bala kaban belayan kita, lalu nyaup sida.

¹⁵Lebuh sida udah ngentapka diri enggau selamat ba menua ti diberi TUHAN Allah Taala kita ngagai sida adap ke barat Sungai Jordan, nya baru kita tau pulai ngagai menua ti udah diungkupka nembiak Aku Moses ngagai kita ba tebing timur Sungai Jordan.”

¹⁶Sida lalu nyaut Josua, “Kami deka ngereja semua utai ti diasuh nuan kereja kami, lalu kami deka bejalai ngagai sebarang endur ti diasuh nuan.

¹⁷Baka kami ke udah ngasika Moses, baka nya meh kami deka ngasika nuan. Awakka TUHAN Allah Taala nuan meruan enggau nuan, baka Iya ti udah meruan enggau Moses!

¹⁸Barang sapa ngelaban nuan, tauka enda ngasika jaku nuan, deka dibunuh. Nuan mesti kering sereta berani.”