Read Iban Josua 10 Bible Online

Josua 10 - Iban bible

Josua 10

¹Lebuh Adonisedek, raja nengeri Jerusalem, [6] ninga Josua udah ngalah sereta ngeruntuhka nengeri Ai, lalu udah ngereja ngagai raja nengeri nya baka ke udah dikereja Josua ngagai nengeri enggau raja nengeri Jeriko, enggau pasal orang nengeri Gibeon ti udah bebaik enggau orang Israel, lalu diau begulai enggau sida,

²iya lalu balat amat takut, laban nengeri Gibeon nya nengeri ti besai, ngemesai sebuah ari nengeri ti diraja, lalu besai agi ari nengeri Ai, lalu semua orang di Gibeon endang orang ke tau serang magang.

³Nya alai Raja Adonisedek ngirumka pesan ngagai Raja Hoham di Hebron, Raja Piram di Jarmut, Raja Japia di Lakis, enggau Raja Debir di Eglon. Ku iya,

⁴“Datai kitu lalu saup aku; awakka kita nyerang Gibeon, laban nengeri nya udah bebaik enggau Josua sereta enggau orang Israel.”

⁵Raja orang Amor ke lima iku nya, iya nya raja nengeri Jerusalem, Hebron, Jarmut, Lakis, enggau Eglon, lalu ngempuruka semua bala soldadu sida, ngelulung lalu nyerang nengeri Gibeon.

⁶Orang di nengeri Gibeon lalu ngirumka pesan ngagai Josua ti diau ba kem di Gilgal: “Tuan, anang ninggalka kami! Datai jampat lalu idupka kami! Tulung kami; laban semua raja orang Amor ti diau di menua ti bebukit udah beserakup deka nyerang kami!”

⁷Josua enggau semua bala soldadu iya, nyengkaum semua soldadu ti pemadu landik beperang, lalu angkat ari Gilgal.

⁸Ku TUHAN bejaku ngagai Josua, “Anang takutka sida, laban Aku udah nyerahka sida ngagai nuan. Nadai siku sida tan ngelaban nuan.”

⁹Josua enggau bala iya lalu bejalai semalam-malam nya ari Gilgal ngagai Gibeon, lalu ngenyit nyerang orang Amor.

¹⁰TUHAN lalu ngasuh orang Amor begau abis ati [7] lebuh sida meda bala soldadu orang Israel. Orang Israel lalu munuh mayuh amat sida di Gibeon, lalu begagaika sida nurun genting ba bukit di Bet-horon, lalu majak nyerang sida nyentuk ngagai Asekah enggau Makedah di selatan.

¹¹Lebuh bala orang bansa Amor benung belanda nurun genting nya ngerarika diri ari bala soldadu orang Israel, TUHAN lalu ngasuh tekang ujan batu ti besai ninggang sida di rantau jalai ngagai Asekah. Mayuh agi sida mati laban ujan batu nya ari ke dibunuh orang Israel.

¹²Ba hari TUHAN nyerahka orang Amor ngagai jari orang Israel, Josua bejaku ngagai TUHAN; lalu ku iya bejaku di mua orang Israel, “Mata panas, anang nginsit ari atas Gibeon. Bulan, ngetu nuan ba atas Emperan Aijalon.”

¹³ Mata panas lalu enda nginsit, lalu bulan enda mindah nyentuk ngagai maya orang Israel udah malas munsuh sida. Pekara tu bisi ditulis dalam Bup Jasar. Mata panas lalu enda nginsit ari kebung langit, lalu enda padam sehari penuh.

¹⁴Nadai hari udah kala baka nya, sebedau tauka udah lepas nya, alai Allah Taala ngasika jaku mensia; laban TUHAN Empu ke beperang ngarika orang Israel!

¹⁵Udah nya, Josua enggau bala soldadu orang Israel lalu pulai ngagai kem sida di Gilgal.

¹⁶Tang raja bansa Amor ke lima iku nya ulih ngerarika diri lalu belalai dalam lubang gua di Makedah.

¹⁷Orang lalu madahka ngagai Josua pasal raja lima iku nya ti udah ditemu belalai dalam lubang gua di Makedah.

¹⁸Lalu ku Josua bejaku, “Baringka batu ti besai ngagai mua lubang gua nya, lalu asuh orang nyaga sida,

¹⁹tang kita empu enda ibuh nyaga sida; titihka munsuh kita, lalu serang sida ari belakang. Anang nejuka sida tama ngagai nengeri sida empu, laban TUHAN Allah Taala kita udah nyerahka sida ngagai jari kita.”

²⁰Lebuh Josua enggau bala iya udah munuh mayuh amat orang Amor, datai ke sida nyau deka abis lus, lalu lebuh sida ke agi idup ulih ngerarika diri ngagai nengeri sida ke bekuta,

²¹semua bala Josua lalu pulai ngagai iya ba kem sida di Makedah. Nadai orang di menua nya berani bejaku ngelaban orang Israel.

²²Udah nya Josua lalu bejaku, “Buka mua lubang gua nya, lalu bai raja ke lima iku nya ngagai aku.”

²³Mua lubang gua nya lalu dibuka, lalu raja nengeri Jerusalem, Hebron, Jarmut, Lakis, enggau Eglon diambi pansut ari lubang gua nya,

²⁴lalu dibai ngagai Josua. Josua lalu mesanka semua lelaki orang Israel ngagai iya, lalu ngasuh bala pemesai ti udah bejalai enggau iya, ngindik rekung raja lima iku nya. Sida lalu ngereja nya.

²⁵Udah nya Josua lalu bejaku ngagai bala pemesai nya, “Anang takut tauka lemi semengat; kita enda tau enda kering sereta berani, laban tu utai ti deka dikereja TUHAN ngagai semua munsuh ke dilaban kita.”

²⁶Udah nya Josua munuh raja lima iku nya, lalu ngantung sida ari lima batang kayu, lalu bangkai sida mengkang digantung dia nyentuk ngagai lemai.

²⁷Lebuh padam mata panas lemai nya, sida nurunka bangkai sida nya, lalu muai sida ngagai lubang gua ti udah alai sida belalai. Batu ti besai lalu diengkah ba mua lubang gua nya, lalu batu nya mengkang dia datai ke sehari tu.

²⁸Sehari nya Josua nyerang lalu ngalahka Makedah, lalu munuh semua orang enggau raja sida di nengeri nya. Nadai siku sida ditejuka idup. Iya ngereja ngagai raja nengeri Makedah baka ke udah dikereja iya ngagai raja Jeriko.

²⁹Udah nya Josua enggau semua soldadu orang Israel bejalai ari Makedah ngagai Libnah, lalu nyerang nengeri nya.

³⁰TUHAN mega nyerahka nengeri enggau raja nengeri nya ngagai jari orang Israel, lalu Josua ngalahka nengeri nya. Semua orang di nengeri nya abis dibunuh. Nadai siku ti ditejuka idup. Josua ngereja ngagai raja nengeri nya baka ke udah dikereja iya ngagai raja nengeri Jeriko.

³¹Udah nya, Josua enggau semua soldadu orang Israel mansang ari Libnah ngagai Lakis, ngelulung lalu nyerang nengeri nya.

³²TUHAN nyerahka Lakis ngagai jari orang Israel, lalu Josua ngalahka nengeri nya ba hari ti kedua. Iya nyerang nengeri nya, munuh semua orang ke diau dia, baka ke udah dikereja iya ngagai Libnah.

³³Udah nya Raja Horam ke merintah di Geser datai nulung Lakis, tang Josua ngalahka iya enggau bala soldadu iya, ngeluska semua sida.

³⁴Udah nya, Josua enggau semua orang Israel mansang ari Lakis ngagai Eglon, ngelulung lalu nyerang nengeri nya.

³⁵Sida ngalahka nengeri nya sehari nya, lalu munuh semua orang dia, baka ke udah dikereja iya di Lakis.

³⁶Udah nya, Josua enggau semua orang Israel mansang ari Eglon ngagai Hebron, nyerang

³⁷lalu ngalahka nengeri nya. Sida munuh raja nengeri nya enggau semua orang ke diau di nengeri nya, enggau semua orang ke diau di nengeri ti mit ti semak nengeri nya. Nadai siku orang dia ditejuka idup, baka ke udah dikereja iya di Eglon, lalu iya ngerusak semua nengeri nya.

³⁸Udah nya Josua enggau semua orang Israel nikal ngagai Debir, lalu nyerang nengeri nya.

³⁹Iya ngalahka nengeri nya, sama enggau raja nengeri nya enggau semua nengeri ti mit semak dia. Sida munuh semua orang dia. Josua ngereja ngagai Debir baka ke udah dikereja iya ngagai Hebron enggau ngagai Libnah enggau ngagai raja sida.

⁴⁰Josua ngalahka semua menua nya, iya nya, menua ti bebukit, menua ti rangkai di selatan, menua ti emperan, enggau menua ti ba tisi bukit, enggau semua raja sida; iya enda nejuka sida idup, tang munuh semua sida, nitihka asuh TUHAN Allah Taala ke disembah orang Israel.

⁴¹Josua ngalahka sida kenyau ari Kades-barnea nyentuk ngagai Gasa, enggau semua menua Gosen, nyentuk ngagai Gibeon.

⁴²Josua ngalahka semua raja enggau menua ti diperintah sida dalam siti kayau aja, laban TUHAN Allah Taala ke disembah orang Israel beperang ngarika orang Israel.

⁴³Udah nya, Josua enggau bala soldadu orang Israel pulai ngagai kem sida di Gilgal.