Read Iban Josua 11 Bible Online

Josua 11 - Iban bible

Josua 11

¹Lebuh Raja Jabin di Hasor ninga nya, iya lalu mesanka Raja Jobap di Madon, enggau raja ke merintah di Simron, enggau raja ke merintah di Aksap,

²enggau bala raja ke di menua ti bebukit, di menua Arabah ti tunga ke selatan ari Chinerot, enggau raja ke ba Lebak Jordan, enggau raja ke di Napot-dor di barat.

³Iya mega mesanka orang Kanaan ti diau ba tebing barat enggau ba tebing timur Sungai Jordan, orang Amor, orang Iti, Peris, enggau orang Jebus ti diau di menua ti bebukit, enggau orang Ibi ti diau ba kaki Bukit Hermon di menua Mispah.

⁴Sida datai mai semua bala soldadu sida, ngemayuh pasir ti ba tebing tasik, enggau mayuh amat kuda enggau kerita perang.

⁵Semua bala raja nya berakupka semua bala soldadu sida, lalu nirika kem sida ba Sungai Merom, deka nyerang orang Israel.

⁶TUHAN lalu bejaku ngagai Josua, “Anang takutka sida, laban ba urung maya tu pagila Aku deka munuh semua sida, lalu nyerahka sida ngagai orang Israel. Kita enda tau enda mutuska rakat kuda sida, lalu nunu kerita perang sida.”

⁷Nya alai Josua enggau semua bala soldadu orang Israel lalu ngenyit nyerang sida ba Sungai Merom.

⁸TUHAN lalu nyerahka sida ngagai jari orang Israel. Orang Israel lalu munuh sida lalu begagaika sida nyentuk ngagai Misrepot-maim enggau Sidon, lalu tunga ke timur nyentuk ngagai lebak Mispah. Orang Israel munuh sida, datai ke nadai siku sida agi idup.

⁹Josua ngereja ngagai sida nitihka asuh TUHAN. Iya mutuska rakat kuda sida, lalu nunu kerita perang sida.

¹⁰Josua nikal lalu ngalahka Hasor sereta munuh raja nengeri nya; laban Hasor nya indu nengeri menua nya.

¹¹Sida munuh semua orang ke diau dia abis lengis. Nadai orang dia ditejuka idup, lalu nengeri nya ditunu.

¹²Josua ngalahka semua nengeri nya enggau raja sida, munuh semua orang dalam semua nengeri nya, nitihka asuh Moses ke nembiak TUHAN.

¹³Tang orang Israel enda nunu nengeri ti digaga ba atas munggu, kelimpah ari Hasor, ti ditunu Josua.

¹⁴Orang Israel ngambi semua utai ti berega enggau semua jelu tupi ari semua nengeri nya, ke sida empu. Tang sida munuh semua orang ke diau dia. Semua orang nya abis dibunuh sida.

¹⁵TUHAN udah meri atur ngagai nembiak Iya Moses, nya alai Moses meri atur nya ngagai Josua, lalu Josua udah nitihka atur nya. Iya ngereja semua utai ti udah dipesanka TUHAN ngagai Moses.

¹⁶Nya alai Josua ngalahka semua menua nya, iya nya menua ti bebukit, enggau menua ti ba kaki bukit, ti di utara enggau di selatan, semua menua di Gosen, enggau menua ti rangkai tunga ke selatan menua nya, enggau Lebak Jordan.

¹⁷Menua nya berengkah ari Bukit Halak di selatan semak Edom, nyentuk ngagai Baal-gat di utara, dalam lebak Lebanon ti tunga ke selatan Bukit Hermon. Josua lama amat beperang ngelaban bala raja di menua nya, tang iya ngalahka semua sida, lalu munuh sida.

¹⁹Ka semina Gibeon aja nengeri ti bebaik enggau orang Israel, ti alai sekeda orang Ibi diau. Semua sida ti bukai alah magang dalam perang nya.

²⁰ Laban TUHAN udah ngasuh sida kieh deka ngelaban orang Israel, ngambika semua sida dibunuh magang enggau nadai pengasih, munyi ti udah dipesanka TUHAN ngagai Moses.

²¹Lebuh maya nya Josua mansang lalu ngerusak orang Anakim, ke datai ari menua ti bebukit, iya nya ari Hebron, Debir, Anap, enggau ari semua menua ti bebukit di menua Judah, enggau ari menua ti bebukit di menua Israel. Josua ngerusak semua sida, enggau nengeri sida.

²²Nadai orang Anakim agi idup di menua Israel. Semina di Gasa, di Gat, enggau di Asdot aja sekeda sida agi idup.

²³Josua ngalahka semua menua nya, munyi ti udah dipesanka TUHAN ngagai Moses. Josua meri menua nya ngagai orang Israel nyadika menua sida empu, lalu magi menua nya ngagai raban bansa orang Israel. Orang Israel lalu ngetu beperang.