Read Iban Josua 14 Bible Online

Josua 14 - Iban bible

Josua 14

¹Utai ti deka disebut diatu nya cherita pasal jalai menua Kanaan ti tunga ke barat Sungai Jordan dibagi ngagai orang Israel. Orang ke magi menua nya ngagai orang Israel nya Imam Eleasar, Josua anak Nun, enggau bala tuai bilik ari raban bansa orang Israel.

² Munyi ti udah dipesanka TUHAN ngagai Moses, menua ti diungkupka ngagai semilan setengah raban bansa di barat Sungai Jordan, deka dibagi ngena chara bechabut undi.[8]

³ Moses udah meri menua di timur Sungai Jordan ngagai dua setengah raban bansa. (Peturun Josep dibagi ngagai dua raban bansa: Manasi enggau Epraim.) Tang Moses enda meri menua ngagai orang Lewi. Sida semina nerima nengeri alai diau, sama enggau padang ke jelu sapi enggau jelu bedus sida.

⁵Orang Israel magi menua nya nitihka pesan TUHAN ngagai Moses.

⁶ Raban bansa Judah lalu datai ngagai Josua di Gilgal. Kalep anak Jepuneh, ari raban peturun Kenas, lalu bejaku ngagai Josua, “Nuan nemu utai ti udah disebut TUHAN ngagai nabi Moses di Kades-barnea pasal tua.

⁷ Umur aku empat puluh taun lebuh Moses ke nembiak TUHAN ngasuh aku bejalai ari Kades-barnea matau menua tu. Aku mai berita ti bendar ngagai iya.

⁸Tang orang ke bejalai enggau aku ngemba orang mayuh. Tang aku udah tetap ati deka ngasika TUHAN Allah Taala aku.

⁹ Nyadi laban aku udah tetap ati deka ngasika TUHAN, Moses besemaya, madahka aku enggau peturun aku deka nerima menua ti udah kena indik kaki aku, nyadika pesaka kami.

¹⁰Tang diatu nyau deka bulih empat puluh lima taun TUHAN udah nyebut nya ngagai Moses. Iya nyebut nya lebuh orang Israel benung bejalai nengah menua puang, lalu TUHAN, nitihka semaya Iya, udah ngasuh aku meruan idup ngelamatu. Peda nuan aku diatu! Umur aku nyau lapan puluh lima taun

¹¹lalu aku diatu agi kering baka aku ke menya lebuh Moses ngasuh aku bejalai. Pengering aku diatu agi baka pengering aku menya, kena aku beperang enggau ngereja utai bukai.

¹²Nya alai, beri ngagai aku diatu menua ti bebukit ti udah disemaya TUHAN lebuh aku enggau bala aku madahka berita nya ngagai nuan menya. Lebuh maya nya menya kami udah madahka ngagai nuan pasal bansa orang Anakim ti diau dalam nengeri ti besai sereta bekuta. TUHAN nyangka deka enggau aku, lalu aku ulih muru sida pansut, munyi ti dipadahka TUHAN.”

¹³Josua lalu merekatka Kalep anak Jepuneh, lalu meri nengeri Hebron ngagai iya nyadika pesaka iya.

¹⁴Hebron mengkang diempu peturun Kalep anak Jepuneh ke ari raban peturun Kenas, laban iya udah tetap ati ngasika TUHAN Allah Taala ke disembah orang Israel.

¹⁵Sebedau nya suba, Hebron dikumbai nengeri Arba. (Arba nya orang Anakim ti pemadu kering.) Menua lalu nadai agi pengachau.