Read Iban Josua 16 Bible Online

Josua 16 - Iban bible

Josua 16

¹Garis entara menua ari selatan menua ti diberi ngagai peturun Josep berengkah ari Sungai Jordan semak Jeriko, ba endur ti tunga ke timur mata ai Jeriko, lalu nuju tunga ngagai menua puang. Garis entara menua nya ngerejang ari Jeriko, niki ngagai menua ti bebukit nyentuk ngagai Betel.

²Ari Betel, garis entara menua nya nuju ngagai Lus, terus ngagai Atarot, ti alai orang Arki diau.

³Garis entara menua nya lalu nuju ke barat ngagai menua Japlet, nyentuk ngagai Bet-horon Ili. Ari nya garis entara menua nya nuju terus ngagai Geser, lalu tepantup ba Tasik Tengah.

⁴Peturun Josep, iya nya raban bansa Epraim enggau raban bansa Manasi di barat nerima menua nya nyadika pesaka sida.

⁵Tu menua ke raban peturun ari raban bansa Epraim. Garis entara menua sida berengkah ari Atarot nuju ke timur ngagai Bet-horon Ulu,

⁶lalu ari nya nuju ngagai Tasik Tengah. Mikmetat nya tunga ke utara ari menua sida. Tunga ke timur, garis entara menua nya nguing ngagai Tanah Siloh, lalu terus ari nya ngagai timur nengeri Janoah.

⁷Garis entara menua nya lalu nurun ari Janoah ngagai Atarot enggau Narah, terus ngagai Jeriko, lalu tepantup ba Sungai Jordan.

⁸Garis entara menua nya lalu ngerejang ke barat ari Tapuah ngagai Sungai Kanah, lalu tepantup ba Tasik Tengah. Nya meh menua ti udah diberi ngagai ruang bilik raban bansa Epraim nyadika pesaka sida,

⁹nyengkaum sekeda nengeri ti mit enggau genturung pendiau ti dalam kandang menua Manasi, tang diberi ngagai orang ari raban bansa Epraim.

¹⁰ Tang sida enda muru orang Kanaan ti diau di Geser. Nya alai, orang Kanaan mengkang diau begulai enggau orang ari raban Epraim nyentuk ke sehari tu, tang orang Kanaan udah dipejalka bekereja nyadi ulun.