Read Iban Josua 18 Bible Online

Josua 18 - Iban bible

Josua 18

¹Lebuh sida udah ngalahka menua nya, semua orang Israel lalu begempuru di Siloh, lalu nirika Langkau Kain TUHAN dia. Semua menua nya dipegai sida magang.

²Tujuh bengkah raban bansa mengkang apin diberi menua.

³Nya alai Josua lalu bejaku enggau orang Israel. Ku iya, “Ni pengelama kita nganti diri ngalah lalu bempu menua ti udah diberi TUHAN Allah Taala aki ini kita ngagai kita?

⁴Beri aku tiga iku lelaki ari siti-siti raban bansa. Aku deka ngasuh sida bejalai nengah menua nya, lalu nuliska gaya menua ti deka nyadika pesaka kita. Udah nya sida enda tau enda pulai baru ngagai aku.

⁵Menua nya deka dibagi ngagai tujuh bengkah bagi. Judah deka diau ba menua iya empu di selatan, lalu Josep deka diau ba menua iya empu di utara.

⁶Tuliska gaya tujuh bengkah menua nya, lalu bai utai ti ditulis nya ngagai aku. Udah nya baru aku deka enchabut undi [10] ke kita, kena betanya ngagai TUHAN Allah Taala kitai.

⁷Tang orang Lewi enda enggau kita nerima bagi ari menua nya, laban ungkup sida nya bekereja nyadi imam TUHAN. Nyadi raban bansa Gat, Reuben, enggau raban bansa Manasi ti di timur, udah nerima menua sida di timur Sungai Jordan. Menua nya udah diberi Moses, ti nembiak TUHAN, ngagai sida.”

⁸Nya alai bala sida mupuk, deka matau menua nya udah bekau sida ke nerima atur ari Josua munyi tu: “Teresa lalu tuliska gaya semua menua nya. Udah nya pulai kitu baru ngagai aku. Udah nya baru aku, deka enchabut undi ngarika kita betanya ngagai TUHAN di Siloh ditu.”

⁹Sida lalu neresa semua menua nya, lalu nuliska chara sida magi menua nya ngagai tujuh bengkah bagi, sereta nuliska nama nengeri ti di menua nya. Udah nya sida pulai baru ngagai Josua ba kem sida di Siloh.

¹⁰Josua lalu enchabut undi ngarika sida, kena betanya ngagai TUHAN. Iya lalu magi menua nya ngagai raban bansa orang Israel ti bukai.

¹¹Benjamin nya terubah raban bansa ti diberi menua. Menua sida nya entara menua raban bansa Judah enggau Josep.

¹²Garis entara menua sida di utara berengkah ba Sungai Jordan lalu niki ngagai bukit ti tunga ke utara Jeriko, lalu ngerejang tunga ke barat nengah menua ti bebukit nyentuk ngagai menua puang Bet-aben.

¹³Garis entara menua nya lalu niki serimbing bukit ti ba tisi Lus ari selatan (Lus mega dikumbai Betel), lalu nurun ari nya ngagai Atarot Adar, ti ba bukit muak ke timur Bet-horon ti di baruh.

¹⁴Garis entara menua nya lalu nguing tunga ke selatan ari serimbing barat bukit nya, lalu terus ngagai Kiriat-baal (tauka Kiriat-jearim), ti diempu raban bansa Judah. Nya garis entara menua di barat.

¹⁵Garis entara menua di selatan berengkah ba tisi Kiriat-jearim lalu nuju ke barat ngagai mata ai ti di Neptoah.

¹⁶Ari nya garis entara menua nya lalu nurun ngagai kaki bukit ti ari atas Lebak Hinom, ba ujung utara Lebak Repaim. Ari nya gari entara menua nya lalu nuju ke selatan nengah Lebak Hinom, muak ari selatan gerinjing Jebus, tunga ngagai En-rogel.

¹⁷Garis entara menua nya lalu nguing ke utara ngagai En-semes, lalu terus ngagai Gelilot, di seberai Genting Adumim. Garis entara menua nya lalu nurun ngagai Batu Bohan (Bohan nya anak Reuben)

¹⁸lalu nuju ke utara mansa gerinjing tanah ba atas Lebak Jordan, lalu nurun ngagai emperan nya

¹⁹tunga ke utara, mansa gerinjing tanah ba Bet-hoglah, lalu tepantup ba endur alai ai Sungai Jordan tama ngagai Tasik Mati di utara. Nya meh garis entara menua ti di selatan.

²⁰Sungai Jordan nyadika garis entara menua di timur. Nya meh garis entara menua ke menua ti diterima ruang bilik ari raban bansa Benjamin nyadika pesaka sida.

²¹Nengeri ti diempu ruang bilik raban bansa Benjamin nya Jeriko, Bet-hoglah, Emek-kesis,

²²Bet Arabah, Semaraim, Betel,

²³Abim, Parah, Oprah,

²⁴Cheparamoni, Opni, enggau Geba - dua belas buah nengeri, sama enggau nengeri ti mit ti ngelingi sida.

²⁵Nengeri ti bukai nyengkaum Gibeon, Ramah, Berot,

²⁶Mispah, Chepirah, Mosah,

²⁷Rekem, Irpil, Taralah,

²⁸Sela, Halep, Jebus (tauka Jerusalem), Gibe-ah, enggau Kiriat-jearim - empat belas buah nengeri semua iya, sama enggau nengeri ti mit ti ngelingi sida. Nya meh menua ti diterima ruang bilik raban bansa Benjamin nyadika pesaka sida.