Read Iban Josua 2 Bible Online

Josua 2 - Iban bible

Josua 2

¹ Udah nya Josua anak Nun lalu ngasuh dua iku orang belalai mupuk ari Sitim nyadi pematau. Ku iya, “Mupuk seduai, lalu peratika menua nya, kelebih agi Jeriko.” Seduai iya mupuk lalu tama rumah siku indu sundal ke benama Rahap, lalu bemalam dia.

²Nyadi raja nengeri Jeriko bisi dipadahka munyi tu: “Sekeda orang Israel udah datai ditu malam tu deka matau menua tu.”

³Raja nengeri Jeriko lalu ngirumka pesan ngagai Rahap, “Bai pansut orang ke udah tama ngagai rumah nuan, laban sida nya pematau.”

⁴Tang indu nya udah ngelalaika lelaki dua iku nya. Udah nya iya lalu bejaku, “Sida amat bisi datai ngagai aku, tang aku enda nemu ari ni penatai sida.

⁵Lalu lebuh pintu nengeri nyau deka ditutup lebuh hari nyau petang, sida mupuk. Kini ke tunga sida mupuk, aku enda nemu. Mupuk kita enggau jampat, ngambika kita ulih tetitihka sida.”

⁶Tang Rahap udah mai seduai iya ngagai perabung rumah, lalu ngelalaika seduai iya dalam tugung takang linin ti dijembui iya ba perabung rumah nya.

⁷Bala soldadu raja lalu nitihka seduai iya nengah jalai ngagai Sungai Jordan, nyentuk ngagai pemeraka ba sungai nya. Lebuh bala soldadu nya udah pansut, pintu nengeri nya lalu ditutup.

⁸Sebedau pematau dua iku nya nindukka diri, Rahap niki ngagai perabung rumah nya ngagai seduai iya

⁹lalu bejaku, “Aku nemu TUHAN udah meri menua tu ngagai kita, lalu semua kami ke di menua tu bela takutka kita magang.

¹⁰ Laban kami bisi udah ninga pasal TUHAN ti ngerangkaika Tasik Mirah, lebuh kita pansut ari menua Ejip. Kami mega bisi udah ninga pasal kita ke munuh Sihon enggau Og, dua iku raja orang Amor di timur Sungai Jordan.

¹¹Lebuh kami ninga nya, kami takut, lalu kami enda berani ngelaban kita. TUHAN Allah Taala kita endang amat Allah Taala ti bekuasa di serega enggau di dunya.

¹²Nya alai, laban aku udah manah enggau seduai, aku minta seduai besumpah atas nama TUHAN, deka manah enggau kami sebilik. Beri siti tanda ngagai aku

¹³kena nunjukka kita enda munuh apai enggau indai aku, menyadi lelaki enggau menyadi indu aku, enggau semua sida sebilik! Anang munuh kami!”

¹⁴Ku orang dua iku nya bejaku enggau iya, “Awakka Allah Taala munuh kami enti kami enda ngereja utai nitihka semaya kami. Enti nuan enda madahka ngagai orang utai ti dikereja kami, kami deka manah enggau kita, lebuh TUHAN meri menua tu ngagai kami.”

¹⁵Nyadi rumah Rahap digaga dalam dinding kuta nengeri, nya alai Rahap ngulurka seduai iya ngena tali nengah jenila.

¹⁶Ku Rahap bejaku, “Mupuk seduai ngagai menua ti bebukit, ngambika bala soldadu enda tetemuka seduai. Belalai tiga hari dia, datai ke sida udah pulai. Nya baru seduai tau angkat ari endur nya.”

¹⁷Ku seduai iya bejaku enggau iya, “Kami deka ngamatka semaya ti diasuh nuan gaga kami enggau nuan.

¹⁸Nuan mesti ngereja tu: lebuh kami nyerang menua kita, tanchangka tali ti mirah tu ba jenila ti alai nuan ngulurka kami duai. Bai apai enggau indai nuan, bala menyadi lelaki nuan, enggau semua kita sebilik ngagai rumah tu.

¹⁹Sebarang sapa pansut ari rumah tu ngagai jalai raya, deka betanggungjawapka pemati iya empu; kami enda betanggungjawapka nya; tang enti orang ngenataika jari ba kita ke diau enggau nuan dalam rumah tu, kami deka betanggungjawapka pemati kita.

²⁰Tang enti nuan madahka ngagai orang utai ti dikereja kami duai, kami pen enggai mega ngamatka semaya kami duai enggau nuan.”

²¹Rahap besetuju, lalu ngasuh seduai iya mupuk. Lebuh seduai iya udah mupuk, iya lalu nanchangka tali mirah ba jenila nya.

²²Pematau nya lalu mansang ngagai menua ti bebukit lalu belalai dia tiga hari. Bala soldadu begigaka seduai iya di semua endur, tang nadai tetemuka seduai iya. Nya alai sida mulaika diri.

²³Udah nya pematau dua iku nya nurun ari menua ti bebukit nya, meraka Sungai Jordan, betemu ngagai Josua, lalu madahka ngagai iya semua utai ti udah nyadi.

²⁴Ku seduai iya bejaku, “TUHAN sigi amat meri semua menua nya ngagai kitai. Nambahka nya, semua orang di menua nya bela takutka kitai.”