Read Iban Josua 20 Bible Online

Josua 20 - Iban bible

Josua 20

¹ Udah nya TUHAN lalu ngasuh Josua

²bejaku ngagai orang Israel, “Pilih nengeri alai ngerarika diri ti udah dipadahka Aku ngagai kita nengah Moses.

³Enti bala kita bisi tekelanjur munuh orang, iya tau ngerarika diri ngagai nengeri nya ari orang ke ngiga balas.

⁴Orang nya tau ngerarika diri ngagai sebuah nengeri nya, mansang ngagai endur alai bechara ba pintu penama ngagai nengeri nya, lalu madahka ngagai bala tuai nengeri nya pasal utai ti udah nyadi. Udah nya baru sida deka nejuka iya tama ngagai nengeri nya, lalu meri iya endur alai diau, ngambika iya tau diau dia.

⁵Enti orang ke ngiga balas datai ngagai nengeri nya nitihka iya, orang di nengeri nya enda tau nyerahka iya ngagai orang nya. Orang di nengeri nya enda tau enda nyaga iya, laban iya tekelanjur tebunuhka orang nya, lalu ukai laban iya ringat.

⁶Orang nya enda tau enda diau di nengeri nya datai ngagai maya iya udah kena pechara di mua orang mayuh, lalu datai ngagai maya orang ke nyadi Imam Besai udah mati. Udah nya baru iya tau pulai baru ngagai nengeri iya empu, ti udah ditinggalka iya rari.”

⁷Nya alai, di barat Sungai Jordan sida milih Kedes di menua Galili, ba menua ti bebukit di menua Naptali. Sida milih Sekem, ba menua ti bebukit di menua Epraim, enggau Hebron, di menua ti bebukit di menua Judah.

⁸Di timur Sungai Jordan, di menua puang ti tunga ke timur nengeri Jeriko, sida milih Beser di menua Reuben, Ramot-giliat, dalam menua Gat, enggau Golan di Basan, dalam menua Manasi.

⁹Nya meh nengeri ti udah dipilih alai semua orang Israel tauka orang kampar ti diau enggau sida, tau ngerarika diri lalu ngidupka nyawa diri. Barang sapa tekelanjur tebunuhka orang, tau diau likun di nengeri nya, ari orang ke ngiga balas. Sida nadai tau dibunuh, sebedau sida kena pechara di mua orang mayuh.