Read Iban Josua 22 Bible Online

Josua 22 - Iban bible

Josua 22

¹Udah nya Josua lalu ngempuruka orang ari raban bansa Reuben, Gat, enggau Manasi Timur.

² Ku iya bejaku enggau sida, “Kita udah ngereja semua utai ti udah diasuh Moses ke nembiak TUHAN, lalu kita udah ngasika semua pesan aku.

³Kenyau ari menya nadai sekali kita udah ninggalka orang Israel ti bukai. Kita udah bejimat ngasika pesan TUHAN Allah Taala kita.

⁴Diatu, munyi ti udah disemaya Iya, TUHAN Allah Taala kita udah ngasuh orang Israel ti bukai diau dalam pemaik. Nya alai pulai meh kita ngagai menua kita empu, di timur Sungai Jordan, ti udah diberi Moses, ke nembiak TUHAN, ngagai kita.

⁵Kita enda tau enda ngasika adat ti udah diberi Moses ngagai kita, iya nya, rinduka TUHAN Allah Taala kita, ngereja utai ti dikedekaka Iya, ngasika pesan Iya, tetap ati ngagai Iya, lalu nyembah Iya enggau pengabis ati, enggau pengabis semengat kita.”

⁶Nya alai Josua merekatka sida, lalu ngasuh sida pulai ngena jaku berekat tu: “Kita pulai kaya amat, mai mayuh jelu tupi, pirak, emas, temaga, besi, enggau kain. Bagi enggau raban bansa kita empu utai ti udah dirampas kita ari munsuh kita.” Udah nya sida pulai ngagai menua diri.

⁷Nyadi Moses udah meri menua di timur Sungai Jordan ngagai setengah ari raban bansa Manasi. Setengah ari raban bansa Manasi ti bukai diberi iya menua di barat Sungai Jordan, sama enggau raban bansa orang Israel ti bukai. Lebuh Moses ngasuh sida pulai ngagai langkau kain sida, lalu merekatka sida,

⁸iya bejaku ngagai sida, “Pulai kita ngagai langkau kain kita mai mayuh pengaya, mayuh jelu tupi, mai pirak, emas, temaga, enggau besi, mayuh kain; bagi perapasan kita enggau kaban belayan kita.”

⁹Nya alai orang ari raban bansa Reuben, Gat, enggau Manasi Timur, pulai ngagai menua diri. Sida ninggalka orang Israel ti bukai di Siloh, di menua Kanaan, lalu mupuk ngagai menua sida empu, iya nya menua Giliat, ti udah dialahka sida nitihka jaku ti dipesanka TUHAN ngagai sida, ngena Moses.

¹⁰Lebuh raban bansa Reuben, Gat enggau Manasi Timur datai di Gelilot, lebuh sida agi ba tebing barat [13] Sungai Jordan, sida lalu ngaga siti alta ti besai, sereta manah gaya ba tebing sungai nya.

¹¹Orang lalu madahka pasal nya ngagai orang Israel ti bukai, “Pendingka tu ulih kita! Raban bansa Reuben, Gat enggau Manasi Timur udah ngaga siti alta di Gelilot, ba tebing barat Sungai Jordan!”

¹²Lebuh orang Israel ninga nya, semua sida lalu begempuru di Siloh deka nyerang raban bansa ti di timur.

¹³Udah nya orang Israel lalu ngasuh Pinehas, anak Imam Eleasar, mansang ngagai raban bansa Reuben, Gat enggau Manasi Timur di menua Giliat.

¹⁴Sepuluh iku tuai bejalai enggau Pinehas, siku ari siti-siti raban bansa ti di barat, genap iku sida nya endang tuai ke suku raban bansa sida empu.

¹⁵Sida datai di menua Giliat, ngagai raban bansa Reuben, Gat, enggau Manasi Timur,

¹⁶ lalu bejaku ngarika semua nembiak TUHAN. Ku sida, “Nama kebuah kita ngereja utai ti jai tu lalu ngelaban Allah Taala ke disembah orang Israel? Kita udah ngelaban TUHAN, laban kita udah ngaga alta tu ke diri empu, lalu enda agi nitihka Iya!

¹⁷ Kingatka dosa kitai di Peor, lebuh TUHAN ngukum bala nembiak Iya ngena penyakit ti balat berampit? Kitai agi natka pemerinsa ketegal nya. Kati dosa nya enda chukup ba kita?

¹⁸Kati kita diatu enggai agi nitihka Iya? Enti kita ngelaban TUHAN sehari tu, Iya deka ringat ngagai semua orang Israel pagila.

¹⁹Nya alai, enti menua kita enda chukup manah alai nyembah Iya, kita tau datai ngagai menua TUHAN, alai Langkau Kain TUHAN bediri. Ambi menua ari bala kami. Tang anang ngelaban TUHAN, tauka ngaga kami nyadi orang ke angkat ngelaban ketegal kita begagaka alta nambahka alta TUHAN Allah Taala kitai.

²⁰ Kingatka pasal Achan ari raban peturun Serah ti enda ngasika pesan pasal utai ti deka dirusak. Semua orang Israel udah diukum ketegal nya. Ukai semina Achan siku aja ke mati ketegal dosa iya.”

²¹Raban bansa Reuben, Gat enggau Manasi Timur lalu nyaut bala tuai bilik ari raban bansa ti di barat:

²²“TUHAN nya meh Allah Taala ti ari atas semua petara! TUHAN nya meh Allah Taala ari atas semua petara! Iya sigi nemu; lalu Iya ngasuh Israel nemu! Enti kami tu udah angkat ngelaban tauka enda agi tetap ati ngagai TUHAN, anang nejuka kami idup sehari tu!

²³Enti kami udah enda ngasika TUHAN, lalu udah ngaga alta ke kami empu alai kami nunu piring pemaik, awakka TUHAN Empu ngukum kami.

²⁴Kami ngereja utai tu laban kami takutka peturun kita jemah ila nyebut ngagai peturun kami, ‘Kita nadai kaul enggau TUHAN Allah Taala ke disembah orang Israel!

²⁵Iya udah ngaga Sungai Jordan nyadika garis entara menua kena nyeraraka kami ari kita raban bansa Reuben enggau Gat. Kita nadai kaul enggau TUHAN.’ Udah nya, kada enda peturun kita deka nagang peturun kami nyembah TUHAN.

²⁶Nya kebuah kami ngaga siti alta, ukai alai nunu piring, tauka alai ngenjuk piring,

²⁷tang nyadika tanda ke bala kami enggau ke kita, enggau ke rebak ti nangkanka kitai, pasal kami ke endang amat nyembah TUHAN di mua Langkau Kain Iya ti kudus, mai piring ti deka ditunu, sereta mai pemeri enggau piring pemaik. Alta tu kena nagang peturun kita ngumbai peturun kami nadai kaul enggau TUHAN.

²⁸Ku runding kami, enti utai baka nya nyadi, peturun kami ulih nyebut, ‘Peda kita! Aki ini kami udah ngaga siti alta sebaka enggau alta TUHAN. Alta nya ukai alai nunu pemeri tauka piring, tang nyadi tanda ke bala kami enggau ke bala kita.’

²⁹Kami tetap enggai ngelaban TUHAN, tauka badu agi nitihka Iya lalu begagaka alta alai nunu piring, tauka piring tepung, tauka pemeri. Kami enggai ngaga alta bukai kelimpah ari alta TUHAN Allah Taala kitai ti bediri di mua Langkau Kain Iya.”

³⁰Lebuh imam Pinehas enggau bala tuai orang Israel ke bejalai enggau iya, bala tuai bilik ari raban bansa ti di barat, ninga jaku orang ari raban bansa Reuben, Gat enggau Manasi Timur, sida puas ati.

³¹Ku Pinehas anak Imam Eleasar bejaku enggau sida, “Diatu baru kami nemu TUHAN bisi enggau kitai. Kita ukai angkat ngelaban Iya, lalu ketegal nya kita udah ngelepaska orang Israel ari ukum TUHAN.”

³²Udah nya Pinehas enggau bala tuai lalu ninggalka raban bansa Reuben enggau Gat di menua Giliat, lalu mulaika diri ngagai menua Kanaan, ngagai orang Israel, lalu madahka berita nya ngagai sida.

³³Orang Israel puas ati, lalu muji Allah Taala. Sida nadai agi bejakuka pasal sida ke deka nyerang lalu ngerusak menua ti alai raban bansa Reuben enggau raban bansa Gat ngentapka diri.

³⁴Ku raban bansa Reuben enggau Gat bejaku, “Alta tu nyadika saksi ke semua kitai, pasal TUHAN ti endang Allah Taala kitai.” Nya alai sida lalu ngumbai alta nya “Saksi.”