Read Iban Josua 23 Bible Online

Josua 23 - Iban bible

Josua 23

¹Nyau ke lama udah bekau nya, TUHAN meri orang Israel pengelikun. Sida nadai agi dikachau munsuh. Lebuh maya nya Josua udah tuai amat umur.

²Josua mesanka semua orang Israel, bala tuai bansa, bala kepala, bala hakim, enggau bala pemesai, lalu bejaku, “Aku diatu nyau tuai;

³lalu kita udah meda semua utai ti udah dikereja TUHAN Allah Taala kita ngagai semua bansa bukai ngarika kita, laban TUHAN Allah Taala kita udah beperang ngarika kita.

⁴Aku udah meri ngagai kita menua orang bansa bukai ke bedau dialahka aku, nyengkaum semua menua bansa orang ke udah dialahka aku, nyadika pesaka raban bansa kita, berengkah ari Sungai Jordan di timur nyentuk ngagai Tasik Tengah di barat.

⁵TUHAN Allah Taala kita deka ngasuh munsuh kita nyurutka diri ari kita, lalu Iya deka muru sida lebuh kita nyerang. Kita deka bempu menua sida, munyi ti udah disemaya Allah Taala kita ngagai kita.

⁶Nya alai kita mesti ngasi lalu ngereja semua utai ti ditulis dalam Bup Adat Moses. Kita mesti ngereja semua utai ti ditulis dalam bup nya,

⁷lalu anang bekaul enggau tugau bansa bukai ti tinggal ba bala kita. Nyebut nama petara sida deh kita enda tau. Anang besumpah atas nama petara sida, tauka nyembah tauka meremi ngagai petara sida,

⁸tang kita patut bepegai teguh ba TUHAN ti Allah Taala kita, baka ti udah dikereja kita nyentuk ngagai ke diatu.

⁹Laban TUHAN udah muru bansa ti kering sereta bekuasa lebuh kita majakka pejalai kita, lalu nadai orang udah kala tan ngelaban kita nyentuk ngagai sehari tu.

¹⁰ Siku-siku kita ulih ngasuh seribu iku munsuh rari, laban TUHAN Allah Taala kita beperang ngarika kita, munyi ti udah disemaya Iya.

¹¹Nya alai, kita mesti rinduka TUHAN Allah Taala kita.

¹²Enti kita enda taluk lalu bekaul enggau tugau orang bansa bukai ke agi tinggal, lalu jadi melaki-bini enggau sida,

¹³TUHAN Allah Taala kita deka badu agi muru bansa orang nya lebuh kita nyerang. Sida deka ngerusak kita baka panjuk, tauka baka lubang kebung, lalu ngemediska kita baka penyipat ti disipatka ngagai belakang kita, tauka baka duri dalam mata kita. Utai tu deka nyadi datai ke semua kita nadai agi tinggal di menua ti manah tu, ti udah diberi TUHAN Allah Taala kita ngagai kita.

¹⁴“Nyadi diatu, aku nyau deka mati. Genap iku kita nemu dalam ati enggau dalam semengat kita, TUHAN Allah Taala kita udah meri ngagai kita semua utai ti manah, ti udah disemaya Iya. Genap semaya ti udah digaga Iya, udah dikamatka Iya magang. Nadai siti semaya nya ti enda dikamatka Iya.

¹⁵Tang baka Iya ti udah ngamatka semua semaya ti udah digaga Iya enggau kita, baka nya mega Iya deka ninggang kita enggau penusah ti besai munyi ti udah disebut Iya ngagai kita.

¹⁶Enti kita ngelanggar sempekat ti udah diberi TUHAN Allah Taala kita ngagai kita, lalu kita betuaika sereta nyembah petara bukai, TUHAN deka ringat lalu ngukum kita, lalu kita deka jampat abis mati di menua ti manah ti udah diberi Iya ngagai kita.”