Read Iban Josua 24 Bible Online

Josua 24 - Iban bible

Josua 24

¹Josua ngasuh semua raban bansa orang Israel begempuru di Sekem. Iya mesanka semua tuai, bala kepala, bala hakim, enggau bala pemesai orang Israel. Semua sida lalu datai magang di mua Allah Taala.

² Josua lalu bejaku ngagai semua orang Israel, “Ku TUHAN Allah Taala ke disembah orang Israel bejaku: ‘Dulu kelia bala aki ini kita, nyengkaum Terah, apai Abraham seduai Nahor, diau di seberai Sungai Eupratis, lalu nyembah petara bukai.

³ Udah nya Aku lalu ngambi aki kita Abraham, ari menua ti di seberai Sungai Eupratis, lalu mai iya nengah semua menua Kanaan. Aku meri iya mayuh peturun. Aku meri iya Isak,

⁴ lalu Aku meri Jakop seduai Esau ngagai Isak. Aku meri menua ti bebukit di Edom ngagai Esau nyadika pesaka iya, tang aki kita Jakop enggau bala anak iya nurun ngagai menua Ejip.

⁵ Udah nya Aku ngirumka Moses seduai Aron, lalu Aku ngasuh penusah ti besai ninggang menua Ejip. Tang Aku mai kita pansut.

⁶ Aku mai aki ini kita pansut ari menua Ejip, lalu orang Ejip begagaika sida ngena kerita perang enggau bala soldadu ti nepan kuda. Tang lebuh bala aki ini kita datai ba Tasik Mirah,

⁷sida lalu ngangau minta Aku nyaup sida. Aku lalu ngengkahka pemetang entara sida enggau orang Ejip. Aku ngasuh ai tasik ngelamun lalu ngelemaska orang Ejip. Kita nemu utai ti udah dikereja Aku ngagai menua Ejip; lalu kita lama diau di menua puang.

⁸ Udah nya Aku mai kita ngagai menua orang Amor, ti diau di timur Sungai Jordan. Sida nyerang kita, tang Aku nyerahka sida ngagai jari kita. Kita ngerampas menua sida, lalu Aku ngerusak sida lebuh kita majakka pejalai kita.

⁹ Udah nya raja orang Moap, Balak anak Sipor beperang ngelaban kita. Iya mesanka Balaam anak Beor, minta iya nyumpah kita.

¹⁰Tang Aku enggai mendingka Balaam. Nya alai Aku lalu merekatka kita. Nya meh jalai Aku ngelepaska kita ari Balak.

¹¹ Kita meraka Sungai Jordan, lalu datai di Jeriko. Orang ari Jeriko lalu beperang ngelaban kita. Orang Amor, orang Peris, orang Kanaan, orang Iti, orang Girgas, orang Ibi enggau orang Jebus mega beperang ngelaban kita. Tang Aku nyerahka sida ngagai jari kita.

¹² Lebuh kita majakka pejalai kita, Aku ngasuh sida begau abis ati, lalu Aku muru dua iku raja orang Amor. Ukai pedang tauka panah kita ke ngereja nya.

¹³ Aku udah meri ngagai kita menua ti nadai kala dipumai kita, enggau nengeri ti ukai digaga kita. Diatu kita diau dia, lalu makai buah anggur enggau buah kana ti ukai ditanam kita.

¹⁴Nya alai, kemesaika TUHAN lalu betuaika Iya ngena ati ti betul sereta tetap. Buai semua petara ti udah disembah aki ini kita di menua Mesopotamia, enggau di menua Ejip: sembah TUHAN siku aja.

¹⁵Enti kita enggai nyembah TUHAN, pilih sehari tu ni bagi petara ti deka dipetuaika kita, nemuka iya nya petara ti udah disembah aki ini kita di menua Mesopotamia, tauka petara orang Amor, ke bempu menua ti alai kita diau diatu. Tang aku enggau semua kami sebilik deka betuaika TUHAN.”

¹⁶Orang mayuh lalu nyaut, “Kami enggai sekali-kali ninggalka TUHAN lalu betuaika petara bukai!

¹⁷TUHAN Allah Taala kitai udah mai aki ini kitai enggau bala kitai pansut ari menua Ejip, alai kitai ti udah nyadi ulun, lalu kitai udah meda kereja ajih ti dikereja Iya. Iya udah nyaga kitai lebuh kitai nengah menua semua bansa ti ditengah kitai.

¹⁸Lebuh kitai majakka pejalai kitai tama menua tu, TUHAN muru semua orang Amor ti diau ditu. Nya alai kami deka mega betuaika TUHAN, laban Iya endang Allah Taala kitai.”

¹⁹Ku Josua bejaku ngagai orang Israel, “Kita enda ulih betuaika TUHAN, laban Iya Allah Taala ti kudus. Iya Allah Taala ti chemburu,[14] lalu Iya enggai ngampun penyalah tauka dosa kita.

²⁰Enti kita ninggalka TUHAN lalu betuaika petara orang bansa bukai, Iya deka mutar ngelaban kita lalu ngukum kita. Iya deka ngerusak kita, taja pen Iya udah manah enggau kita.”

²¹Orang mayuh lalu nyebut ngagai Josua, “Kami deka betuaika TUHAN.”

²²Josua lalu bejaku ngagai sida, “Kita empu besaksika diri madahka diri deka betuaika TUHAN.” Orang mayuh lalu nyaut, “Kami sigi amat besaksika nya.”

²³Lalu ku Josua bejaku ngagai sida, “Enti pia, buai magang semua petara orang bansa bukai ke dikembuan kita, lalu singitka pending kita ngagai TUHAN Allah Taala ke disembah orang Israel.”

²⁴Lalu ku orang mayuh bejaku ngagai Josua, “Kami deka betuaika TUHAN Allah Taala kami, lalu kami deka ngasika jaku Iya.”

²⁵Nya alai, sehari nya Josua lalu ngaga siti sempekat enggau orang mayuh, lalu meri sida adat enggau atur ti deka dititihka sida.

²⁶Josua nuliska semua jaku nya dalam Bup Adat Allah Taala. Udah nya iya lalu ngambi sigi batu ti besai, lalu ngengkahka batu nya di baruh sepun kayu oak ba endur alai TUHAN diau.

²⁷Josua lalu bejaku ngagai orang mayuh, “Batu tu deka nyadika saksi kitai; laban batu tu udah ninga semua leka jaku ti udah disebut TUHAN ngagai kitai; nya alai batu tu nyadika saksi ngelaban kita, enggai ke kita ngelaban Allah Taala kita.”

²⁸Udah nya Josua ngasuh orang mayuh pulai, lalu semua sida pulai ngagai menua diri empu.

²⁹Udah bekau nya, Josua anak Nun, ke nembiak TUHAN, mati lebuh umur iya seratus sepuluh taun.

³⁰ Sida lalu nguburka iya ba tanah iya empu di Timnat-serah, di menua ti bebukit dalam menua Epraim, tunga ke utara Bukit Gaas.

³¹Sekumbang Josua agi idup, orang Israel meruan betuaika TUHAN. Lebuh iya udah mati, orang Israel mengkang betuaika TUHAN, seagi-agi bala tuai bansa agi idup, ti udah meda semua pengawa ti dikereja TUHAN ti orang Israel.

³² Tulang Josep, ti udah dibai orang Israel ari menua Ejip, lalu dikuburka di Sekem, ba sebidang tanah ti udah dibeli Jakop ari bala anak Hamor, ti apai Sekem, ngena rega seratus singkap duit pirak. Tanah nya nyadika pesaka bala peturun Josep.

³³Eleasar anak Aron mati, lalu dikuburka di Gibe-ah, sebuah nengeri di menua ti bebukit dalam menua Epraim. Nengeri nya udah diberi ngagai anak iya Pinehas.