Read Iban Josua 3 Bible Online

Josua 3 - Iban bible

Josua 3

¹Tumu pagi hari siti, Josua enggau semua orang Israel angkat, lalu mupuk ari Sitim, lalu datai ba Sungai Jordan. Dia sida lalu nirika kem sebedau sida meraka sungai nya.

²Tiga hari udah bekau nya bala tuai lalu bejalai nengah kem,

³madahka ngagai orang mayuh, “Lebuh kita meda Peti Lampang Batu Adat TUHAN Allah Taala kita, disan bala imam Lewi, kita mesti angkat ari endur kita. Titihka Peti Lampang Batu Adat nya,

⁴ngambika kita nemu jalai ti patut ditengah kita, laban kita nadai udah kala nengah jalai nya. Tang anang datai semak ngagai Peti Lampang Batu Adat. Kita bejalai kira setengah batu ngentudika Peti nya.”

⁵Josua lalu madahka ngagai orang mayuh, “Tuchi diri empu, laban pagila TUHAN deka ngereja kereja ajih ba bala kita.”

⁶Udah nya iya lalu bejaku ngagai bala imam, “San Peti Lampang Batu Adat, lalu bejalai dulu ari orang mayuh.” Sida lalu ngesan Peti Lampang Batu Adat, lalu bejalai dulu ari orang mayuh.

⁷Ku TUHAN bejaku ngagai Josua, “Sehari tu Aku deka belabuh ngemesaika nuan di mua orang Israel, ngambika sida nemu Aku bisi enggau nuan, baka Aku ti udah enggau Moses.

⁸Padahka ngagai bala imam ke ngesan Peti Lampang Batu Adat, ‘Lebuh kita datai ba ai sungai nya, kita mesti bediri dia enda engkebut.’ ”

⁹Udah nya Josua bejaku ngagai orang mayuh, “Datai kitu, lalu pendingka jaku TUHAN Allah Taala kita.

¹⁰Lebuh kita nyerang, Allah Taala deka muru orang Kanaan, orang Iti, orang Ibi, orang Peris, orang Girgas, orang Amor enggau orang Jebus. Nya baru kita deka nemu Allah Taala ti idup bisi ba tengah-tengah kita,

¹¹lebuh Peti Lampang Batu Adat ti enggi TUHAN ti bekuasa di serata dunya, disan dulu ari kita meraka Sungai Jordan.

¹²Nya alai pilih dua belas iku orang, siku ari siti-siti raban bansa.

¹³Lebuh tapa kaki bala imam ke ngesan Peti Lampang Batu Adat ti diempu TUHAN ti bekuasa di serata dunya, ngindik ai Sungai Jordan, ai nya deka badu rarat, lalu deka nyegang ke ulu.”

¹⁴Lebuh orang Israel mupuk ari kem sida deka meraka Sungai Jordan, bala imam ke ngesan Peti Lampang Batu Adat bejalai dulu ari orang mayuh.

¹⁵Nyadi Sungai Jordan bah ampuh tebing sepemanjai musin ngetau. Nya alai lebuh orang ke ngesan Peti nya udah datai ba Sungai Jordan, lalu kaki bala imam ke ngesan Peti nya ngindik tisi ai sungai nya,

¹⁶ai ti rarat ari ulu lalu badu anyut, lalu nyegang ke ulu nyentuk ngagai Adam, iya nya nengeri ti semak Saretan, lalu semua ai ti rarat ngagai Tasik Mati putus. Udah nya orang Israel lalu meraka ke seberai semak nengeri Jeriko.

¹⁷Lebuh orang Israel meraka sungai nya nengah tanah ti rangkai, bala imam ke ngesan Peti Lampang Batu Adat TUHAN bediri ba tanah ti rangkai ba tengah-tengah sungai nya, datai ke semua orang Israel udah meraka magang ngagai tebing seberai Sungai Jordan.