Read Iban Josua 4 Bible Online

Josua 4 - Iban bible

Josua 4

¹Lebuh semua orang Israel udah meraka Sungai Jordan, TUHAN lalu bejaku ngagai Josua,

²“Pilih dua belas iku lelaki, siku ari siti-siti raban bansa,

³lalu asuh sida mai dua belas igi batu ari tengah-tengah Sungai Jordan, ari endur alai bala imam ke bediri. Asuh sida mai lalu ngengkahka batu nya ba kem kita malam tu.”

⁴Udah nya Josua lalu mesanka dua belas iku lelaki orang Israel ti udah dipilih, siku ari genap bengkah raban bansa,

⁵lalu bejaku ngagai sida, “Alai kita bejalai dulu ari Peti Lampang Batu Adat TUHAN Allah Taala kita, ngagai tengah-tengah Sungai Jordan. Genap iku kita enda tau enda ngesan sigi batu, sigi ke genap raban bansa orang Israel.

⁶Batu nya deka nyadika tanda ke orang mayuh. Lebuh anak kita nanya ngagai kita jemah ila reti batu nya,

⁷kita enda tau enda madahka ngagai sida pasal ai Sungai Jordan ti badu agi rarat. Batu nya deka nyadika batu pengingat ke orang Israel belama iya.”

⁸Bala lelaki nya lalu ngereja nitihka asuh Josua. Sida lalu mai dua belas igi batu ari tengah-tengah Sungai Jordan, sigi ke genap raban bansa orang Israel, munyi ti udah dipadahka TUHAN ngagai Josua, lalu sida mai batu nya ngagai kem sida, lalu ngengkahka batu nya dia.

⁹(Josua lalu nusun dua belas igi batu ba tengah-tengah Sungai Jordan, ba endur alai bala imam ke ngesan Peti Lampang Batu Adat nya udah bediri; lalu batu nya mengkang dia datai ke sehari tu.)

¹⁰Bala imam ke ngesan Peti nya mengkang bediri ba tengah-tengah Sungai Jordan, datai ke semua utai ti udah diasuh TUHAN padahka Josua ngagai orang mayuh, nitihka jaku Moses ngagai Josua, tembu magang dikereja sida. Orang Israel lalu beguai-guai meraka sungai nya.

¹¹Lebuh semua sida udah meraka magang, Peti Lampang Batu Adat TUHAN enggau bala sida imam lalu meraka, bejalai dulu ari bala mayuh.

¹²Bala lelaki ari raban bansa Reuben enggau raban bansa Gat, enggau setengah ari raban bansa Manasi, ti udah nyikap diri deka beperang, lalu meraka dulu ari orang bukai, munyi ti udah diasuh Moses.

¹³Kira empat puluh ribu iku lelaki, ke sedia deka beperang, meraka sungai nya di mua TUHAN ngagai emperan Jeriko, mansang beperang.

¹⁴Nya meh hari alai TUHAN ngemesaika Josua di mua semua orang Israel, lalu sida bebasaka iya sepemanjai umur iya, baka sida ke udah bebasaka Moses.

¹⁵Udah nya TUHAN lalu bejaku ngagai Josua,

¹⁶“Asuh bala imam ke ngesan Peti Lampang Batu Adat nya, angkat ari Sungai Jordan.”

¹⁷Josua lalu bejaku ngagai sida imam nya, “Angkat kita ari Sungai Jordan.”

¹⁸Lebuh bala imam ke ngesan Peti nya angkat ari tengah-tengah Sungai Jordan, lalu tapa kaki sida terengkah ba tanah ti rangkai, ai sungai nya lalu belabuh rarat baru lalu ngampuhka tebing baru.

¹⁹Orang Israel meraka Sungai Jordan kena sepuluh hari bulan ti kesatu, lalu sida nirika kem sida di Gilgal, tunga ke timur menua Jeriko.

²⁰Dua belas igi batu ti diambi ari Sungai Jordan, lalu ditusun Josua di Gilgal.

²¹Lalu ku iya bejaku ngagai orang Israel, “Lebuh anak kita nanyaka reti batu tu ngagai kita jemah ila,

²²kita enda tau enda madahka ngagai sida, ‘Orang Israel bejalai meraka Sungai Jordan ba senentang tu nengah tanah ti rangkai.’

²³Laban TUHAN Allah Taala kita udah ngerangkaika Sungai Jordan ke kita, datai ke semua kita udah meraka magang ke seberai, baka ke udah dikereja TUHAN Allah Taala kita ba Tasik Mirah[1] ti diasuh Iya rangkai ngambika kitai ulih meraka tasik nya,

²⁴ngambika semua bansa di dunya tu nemu pemesai kuasa TUHAN, sereta ngambika kita nangika TUHAN Allah Taala kita belama iya.”