Read Iban Josua 8 Bible Online

Josua 8 - Iban bible

Josua 8

¹Ku TUHAN bejaku ngagai Josua, “Anang takut tauka lemi semengat; bai semua bala soldadu nuan, lalu mansang ngagai nengeri Ai. Aku udah nyerahka raja nengeri Ai, bala nembiak iya, nengeri iya, enggau menua iya, ngagai nuan;

²lalu nuan deka ngereja ngagai Ai enggau ngagai raja iya baka ke udah dikereja nuan ngagai nengeri Jeriko enggau ngagai raja nengeri nya; tang kita tau ngambi reta tengkira, enggau jelu tupi sida ke kita empu. Kita enda tau enda ngeramka ipa ari belakang nengeri nya.”

³Josua enggau semua bala soldadu iya lalu mansang ngagai nengeri Ai. Josua milih tiga puluh ribu iku orang ari bala soldadu ti pemadu kering, lalu ngasuh sida bejalai malam.

⁴Ku iya bejaku ngagai sida, “Kita enda tau enda ngeramka ipa ari belakang nengeri nya, tang anang jauh ari nengeri nya, lalu sedia nyerang;

⁵aku enggau bala aku deka mansang ngagai nengeri nya. Lebuh orang ari nengeri Ai pansut deka ngelaban kami, kami deka mutar lalu rari ari sida, baka ke dikereja kitai suba.

⁶Sida deka ngagai kami, datai ke kami udah ngumpan semua sida pansut ari nengeri nya; laban sida deka ngumbai kami rari ari sida baka ke dikereja kitai suba. Baka nya ku jalai kami rari ari sida;

⁷nya baru kita pansut ari endur alai kita ke ngeramka ipa, lalu ngalahka nengeri nya; laban TUHAN Allah Taala kita deka meri nengeri nya ngagai kita.

⁸Lebuh kita udah ngalahka nengeri nya, tunu nengeri nya, nitihka asuh TUHAN. Nya meh atur ti diberi aku ngagai kita.”

⁹Josua lalu ngasuh sida mupuk. Sida lalu mansang ngagai endur alai ngeramka ipa, lalu belalai entara Betel enggau Ai, tunga ke barat ari nengeri Ai; Tang malam nya Josua bemalam ba kem sida begulai enggau bala mayuh.

¹⁰Tumu pagi hari siti, Josua angkat lalu ngempuruka bala soldadu, lalu bejalai sama enggau bala tuai orang Israel mansang ngagai nengeri Ai, dipeda semua orang Israel.

¹¹Bala soldadu ke enggau iya lalu mansang nuju ngagai pintu besai nengeri nya, lalu nirika kem ba tisi utara nengeri nya, diseraraka siti lebak ari nengeri Ai.

¹²Josua lalu mai kira lima ribu iku lelaki, lalu ngasuh sida ngeramka ipa entara Betel enggau Ai, tunga ke barat ari nengeri Ai.

¹³Nya alai sida ngasuh bala soldadu bela ngambi endur diri, iya nya semua sida ke dalam kem ti muak ari utara nengeri nya, enggau bala sida ke ngeramka ipa, muak ke barat ari nengeri nya. Malam nya Josua bemalam ba lebak nya.

¹⁴Lebuh raja nengeri Ai meda nya, iya enggau semua bala iya, iya nya bala lelaki ari nengeri nya, lalu beguai-guai pansut ari nengeri nya tumu pagi hari, deka nyerang orang Israel, ba siti endur ti tunga ngagai Arabah; tang iya enda nemu diri deka diserang ari belakang.

¹⁵Josua enggau bala iya lalu ngaga diri baka ke deka nyurutka diri, lalu rari tunga ngagai menua puang.

¹⁶Nya alai semua lelaki ke dalam nengeri nya lalu diasuh begagaika orang Israel; lebuh sida begagaika orang Israel, sida makin jauh-sejauh ninggalka nengeri Ai.

¹⁷Nengeri Ai tauka nengeri Betel nadai agi lelaki; semua sida udah enggau begagaika orang Israel; sida ninggalka nengeri Ai nadai orang nyaga, lalu sida begagaika orang Israel.

¹⁸Udah nya TUHAN lalu bejaku ngagai Josua, “Kedar lalu tunjukka sangkuh nuan tunga ngagai nengeri Ai; laban Aku deka meri nengeri nya ngagai nuan.” Josua lalu ngedarka sangkuh iya tunga ngagai nengeri nya.

¹⁹Bala soldadu ti udah ngeramka ipa lalu angkat tekala nya ari endur sida, lalu lebuh Josua ngedarka jari iya, sida belanda lalu tama, lalu ngalahka nengeri nya. Sida lalu beguai-guai nyelup nengeri nya ngena api.

²⁰Lebuh orang Ai malik kebelakang, sida lalu tepedaka balun asap pansut ari nengeri nya. Sida nadai jalai rari, laban orang Israel ti udah rari tunga ngagai menua puang, diatu nyau mutarka nyerang sida.

²¹Lebuh Josua enggau semua orang Israel meda bala sida ke ngeramka ipa udah ngalahka nengeri nya, lalu meda asap bebalun pansut ari nengeri nya, sida mutar lalu munuh bala soldadu orang Ai.

²²Bala orang Israel ke di nengeri nya lalu nurun enggau ngelaban orang Ai. Orang ari nengeri Ai abis dikelulung orang Israel, lalu semua sida abis dibunuh. Nadai siku sida ulih ngerarika diri, tauka agi idup.

²³Tang orang Israel nangkap raja nengeri Ai, lalu mai iya ngagai Josua.

²⁴Lebuh orang Israel udah tembu bebunuhka orang Ai di menua puang, alai sida ke udah begagaika orang Ai, lalu semua orang Ai udah abis dibunuh sida, semua orang Israel lalu pulai ngagai nengeri Ai, lalu munuh semua orang ke diau dia.

²⁵Pemayuh orang Ai ke dibunuh sehari nya, nyengkaum lelaki enggau indu, nya dua belas ribu iku,

²⁶laban Josua enda badu ngedarka jari iya, ti dikena iya ngedarka sangkuh iya, datai ke udah munuh semua orang Ai.

²⁷Semina jelu tupi enggau barang aja dirampas orang Israel nyadika perapasan sida, nitihka pesan TUHAN ngagai Josua.

²⁸Nya alai Josua nunu nengeri Ai lalu ngaga nengeri nya nyadi tugung batu tembawai, nyentuk ngagai sehari tu.

²⁹Iya meri ukum gantung ngagai raja nengeri Ai, lalu raja nya digantung ari kayu datai ke lemai. Ba urung padam mata panas Josua lalu ngasuh orang nurunka bangkai nya, lalu muai bangkai nya ba pintu penama ngagai nengeri nya, lalu nugungka batu atas bangkai nya. Tugung batu nya agi mengkang dia nyentuk ngagai sehari tu.

³⁰ Udah nya Josua ngaga siti alta ba Bukit Ebal ke TUHAN Allah Taala ke disembah orang Israel,

³¹ nitihka atur ti udah diberi Moses, ke nembiak TUHAN, ngagai orang Israel, munyi ti ditulis dalam Adat Moses: “Siti alta deka digaga ari batu ti enda kala dipansap ngena pekekas besi.” Sida lalu ngenjuk piring tunu ngagai TUHAN ba alta nya, lalu sida mega ngenjuk piring pemaik.

³²Di mua orang mayuh, Josua lalu nuliska Adat ba batu nya, neladan Adat ti udah ditulis Moses.

³³ Semua orang Israel, enggau bala tuai sida, bala pemesai, enggau bala hakim, sereta enggau bala orang kampar ti diau enggau sida, lalu bediri ari dua piak Peti Lampang Batu Adat TUHAN, betunga mua enggau bala imam Lewi ke ngesan Peti nya. Setengah ari bala orang bediri nungaka belakang sida ngagai Bukit Gerisim, lalu setengah nungaka belakang sida ngagai Bukit Ebal, munyi ti udah diasuh Moses ti nyadi ulun TUHAN, kena sida merekatka orang Israel.

³⁴Udah nya, enggau nyawa ti inggar, Josua lalu macha semua Adat, nyengkaum jaku berekat enggau jaku sumpah, nitihka semua utai ti udah ditulis dalam Bup Adat.

³⁵Nadai seleka ari semua pesan Moses ti enda dibacha Josua di mua semua orang Israel, di mua semua indu-nembiak, enggau di mua semua orang kampar ti diau begulai enggau sida.