Read Iban Josua 9 Bible Online

Josua 9 - Iban bible

Josua 9

¹Lebuh semua raja di menua ti bebukit ti di barat Sungai Jordan, enggau sida raja ti diau ba emperan ti nebing Tasik Tengah tunga ngagai menua Lebanon, orang Iti, orang Amor, orang Kanaan, orang Peris, orang Ibi enggau orang Jebus, ninga nya,

²sida begempuru lalu berakupka ngelaban Josua enggau orang Israel.

³Tang lebuh orang ke diau di Gibeon ninga pasal utai ti udah dikereja Josua ngagai nengeri Jeriko enggau nengeri Ai,

⁴sida lalu nipu Josua: sida nyendiaka bekal, mai kain guni ti udah luya amat ke keledai sida, mai kambut wain ti lama, charik sereta abis ditampal,

⁵ngena kasut ti abis ditampal, enggau gari ti lama udah luya, enggau roti ti nyau rangkai sereta bekuap.

⁶Sida mansang ngagai Josua ba kem di Gilgal, lalu bejaku enggau iya sereta enggau orang Israel, “Kami tu datai ari menua jauh deka ngaga sempekat enggau kita.”

⁷ Tang ku orang Israel bejaku enggau orang Ibi nya, “Kada enda kita diau semak kami; enti pia, baka ni ku kami ngaga sempekat enggau kita?”

⁸Ku sida bejaku enggau Josua, “Kami sedia deka bekereja ke kita.” Josua lalu nanya sida, “Sapa kita tu? Ari ni penatai kita?”

⁹Sida lalu madahka cherita tu ngagai iya: “Tuan, kami tu datai ari menua ti jauh, laban kami udah ninga pasal TUHAN Allah Taala kita. Kami udah ninga pasal Iya, pasal semua utai ti udah dikereja Iya di menua Ejip,

¹⁰ enggau pasal utai ti udah dikereja Iya ngagai dua iku raja bansa Amor di timur Sungai Jordan, Raja Sihon di Hesbon enggau Raja Og menua Basan ke merintah di Astarot.

¹¹Nya alai bala tuai kami enggau semua orang ke diau di menua kami, ngasuh kami nyendiaka bekal lalu mupuk kitu lalu betemu enggau nuan. Kami udah diasuh nyerahka diri bekereja ke nuan, lalu minta nuan ngaga sempekat enggau kami.

¹²Peda nuan roti kami tu. Lebuh kami bekejang ari menua, bekal tu agi angat, tang peda nuan tu! Roti tu nyau rangkai sereta bekuap;

¹³kambut wain tu endang agi baru lebuh kami ngisi iya enggau wain, tang diatu kambut tu nyau charik; lalu gari kami enggau kasut kami nyau jai magang, empa pengelama kami udah bejalai.”

¹⁴Orang Israel makai pemakai sida mimit, lalu sida nadai betanya ngagai TUHAN.

¹⁵Josua lalu ngaga sempekat pemaik enggau sida, besemaya enda munuh sida; lalu bala tuai orang Israel besumpah atas sempekat nya.

¹⁶Tiga hari udah bekau sempekat nya disain, orang Israel lalu nemu orang nya endang diau semak sida, begulai enggau sida.

¹⁷Nya alai orang Israel mupuk, lalu tiga hari udah nya, sida lalu datai ba nengeri ti alai orang nya diau, iya nya nengeri Gibeon, Chepirah, Berot enggau Kiriat-jearim.

¹⁸Tang orang Israel enda nyerang sida, laban bala tuai sida udah besumpah enggau bala orang nya dalam nama TUHAN Allah Taala ke disembah orang Israel. Semua orang Israel lalu mutap ngelaban bala tuai sida.

¹⁹Tang ku bala tuai nyaut, “Kitai udah besumpah enggau sida dalam nama TUHAN Allah Taala ke disembah orang Israel. Diatu kitai enda tau negu sida.

²⁰Tu utai ti deka dikereja kitai ngagai sida: kita enda munuh sida, ngambika Allah Taala enda ringat ngagai kitai, laban kitai udah besumpah enggau sida.”

²¹Ku bala tuai bejaku ngagai sida, “Awakka sida idup.” Nya alai orang nya lalu bekereja ngambi kayu enggau nyauk ai ke orang Israel, nitihka pemutus penemu bala tuai.

²²Josua lalu mesanka orang Gibeon datai ngagai iya, lalu ku iya bejaku ngagai sida, “Nama kebuah kita ngelakar kami, lalu madahka diri diau jauh ari kami, taja pen kita diau begulai enggau kami?

²³Nya alai, diatu kita kena sumpah, lalu sekeda kita deka mengkang nyadi ulun, ngambi kayu api enggau nyauk ai ke rumah Allah Taala aku.”

²⁴Ku sida nyaut Josua, “Kami deka ngereja nya, tuan, laban kami nemu, TUHAN Allah Taala kita endang amat udah ngasuh nembiak Iya Moses meri semua menua tu ngagai kita, lalu munuh semua orang ke diau dalam menua tu lebuh kita majakka pejalai kita. Nya alai kami takutka kita. Nya kebuah kami ngereja tu.

²⁵Diatu kami dipegai kita: kereja aja meh ngagai kami utai ti patut ku ati kita.”

²⁶Nya alai, tu utai ti dikereja Josua ke sida: iya nyaga sida ari orang Israel; lalu orang Israel enda munuh sida.

²⁷Tang sehari nya Josua ngeletak sida bekereja nyadi ulun ngambi kayu enggau nyauk ai ke orang Israel, enggau ke alta Allah Taala. Sida mengkang ngereja pengawa nya nyentuk ngagai sehari tu ba endur ti dipilih TUHAN.