Read Iban 2 Tesalonika 1 Bible Online

2 Tesalonika 1 - Iban bible

2 Tesalonika 1

¹ Surat ari Paul, Silas[1] enggau Timoti, Ngagai eklisia di Tesalonika dalam Allah Taala ti Apai kitai enggau Tuhan Jesus Kristus:

² Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

³ Kami enda tau enda seruran meri terima kasih ngagai Allah Taala ke kita, menyadi, laban nya endang patut, laban pengarap kita deras amat mansang, lalu pengerindu genap iku kita ke pangan diri nambah-menambah.

⁴Nya alai kami empu temegahka kita di mua semua eklisia Allah Taala, ketegal kita tan ati, enggau ketegal pengarap kita, taja pen kita natka semua macham pemerinsa enggau penusah.

⁵Semua utai tu nunjukka Allah Taala endang ngakim ngena pengelurus, ngambika kita ulih tama ngagai Perintah Iya. Ketegal Perintah nya meh kita kena perinsa diatu.

⁶Laban Allah Taala ngereja utai ti lurus lebuh Iya merinsaka orang ke merinsaka kita,

⁷lalu meri pemaik ngagai kita ke kena perinsa, enggau ngagai kami, lebuh Tuhan Jesus nurun ari serega enggau bala melikat Iya ti bekuasa,

⁸ dalam daun api ti mau, ngukum orang ke enda ngelala Allah Taala, enggau orang ke enda ngasika Berita Manah Jesus Kristus Tuhan kitai.

⁹ Sida deka diukum lalu dirusak belama-lama iya, diseraraka ari Tuhan, enggau ari kuasa mulia Iya,

¹⁰lebuh Iya datai nerima puji ari semua nembiak Iya, sereta dibasa semua orang ke arap, laban pesan ti ditusui kami ngagai kita udah dikarapka kita.

¹¹ Nya meh kebuah kami seruran besampika kita, ngambika Allah Taala ngaga kita amat patut dikangauka Iya, lalu nembuka semua utai ti dikinginka Iya enggau semua kereja ti badas, ulih kuasa Iya,

¹²ngambika nama Jesus Kristus Tuhan kitai dimuliaka dalam kita, lalu kita dimuliaka dalam Iya, nitihka pengasih Allah Taala kitai enggau pengasih Tuhan Jesus Kristus.