Read Iban 2 Tesalonika 2 Bible Online

2 Tesalonika 2 - Iban bible

2 Tesalonika 2

¹ Nyadi pasal penatai Jesus Kristus Tuhan kitai, enggau pasal kitai ke deka digempuruka begulai enggau Iya, kami minta kita, menyadi,

²anang mudah irau ati tauka teguran ketegal orang bisi ngumbai Hari Tuhan udah datai. Sida nyangka madahka diri udah ninga utai nya ari Roh Kudus, tauka ari orang bukai, tauka ari surat ti ditulis kami.

³Tang anang sekali-kali nejuka orang nipu kita; laban Hari Tuhan apin datai, sebedau Pengawa Ti Ngelaban nyadi, lalu orang siku ti enda beradat nya dipandangka, ke diletak deka dirusak.

⁴ Iya ngelaban sereta ngeninggika diri ari atas semua utai ti dikumbai petara tauka utai ti disembah, lalu nudukka diri dalam Rumah Sembiang Allah Taala, lalu madahka diri Allah Taala.

⁵ Kati kita enda ingatka semua nya? Aku udah madahka semua utai nya ngagai kita lebuh aku agi begulai enggau kita.

⁶Lalu kita nemu utai ti nagang iya ti enda beradat nya diatu, ngambika iya dipandangka ba maya ti patut.

⁷Laban diatu misteri ti enda beradat nya udah berengkah bekereja, tang semina nyentuk ngagai maya iya ke nagang iya ke enda beradat nya dibai ke tisi.

⁸ Udah nya baru iya ke enda beradat nya dipandangka, lalu dibuai Tuhan Jesus ngena kesuh nyawa Iya, lalu ngabiska iya lengis ngena mulia Iya lebuh Iya datai.

⁹ Penatai iya ti enda beradat nya nyata dalam semua pengawa Sitan ke ngena semua kuasa, tanda, kereja ajih ti pelesu,

¹⁰enggau semua macham tipu ti jai, ba orang ke deka mati, laban sida enggai rinduka pemendar ti ulih nyelamatka sida.

¹¹ Nya kebuah Allah Taala ngirumka siti kuasa penipu ti besai ngambika sida arapka utai ti pelesu,

¹²ngambika semua orang ke enda arapka pemendar tang rinduka dosa, diukum.

¹³ Tang kami enda tau enda seruran meri terima kasih ngagai Allah Taala ke kita, menyadi ke dikerinduka Tuhan, laban Allah Taala udah milih kita ngambika kita diselamatka ulih Roh Kudus ti nguduska kita, enggau ulih pengarap kita ke pemendar.

¹⁴Nya meh kebuah Allah Taala udah ngangauka kita ulih Berita Manah ti ditusui kami, ngambika kita tau bulih mulia Jesus Kristus Tuhan kitai.

¹⁵ Nya alai, menyadi, bediri tegap lalu bepegai teguh ba ajar ti diberi kami ngagai kita, nemuka ngena mulut tauka ngena surat kami.

¹⁶ Awakka Jesus Kristus Tuhan kitai, enggau Allah Taala ti Apai kitai, ke rinduka kitai, lalu udah meri kitai peransang ti meruan belama iya, enggau pengadang, ulih pengasih Iya,

¹⁷meransang sereta ngeringka ati kita ngereja enggau nyebut semua utai ti manah.