Read Iban 2 Tesalonika 3 Bible Online

2 Tesalonika 3 - Iban bible

2 Tesalonika 3

¹ Ke pengujung iya, menyadi, besampika kami, ngambika pesan Tuhan majak ngelekai lalu dibasa,[2] di semua endur[3] baka ti udah nyadi ba bala kita,

² lalu besampi mega minta Allah Taala ngelepaska kami ari orang ke jai; laban ukai semua orang arap.

³ Tang Tuhan endang tau dikarapka. Iya deka meri kita pengering, lalu nyaga kita ari iya ti jai.[4]

⁴Lalu dalam Tuhan kami nemu kita diatu benung ngereja, sereta deka majak ngereja utai ti diasuh kami kereja kita.

⁵Awakka Tuhan nujuka ati kita ngagai pengerindu Allah Taala, enggau ngagai pengeliat ati Kristus.

⁶ Dalam nama Jesus Kristus Tuhan kitai, menyadi, kami ngasuh kita ngejangka diri ari menyadi ke ngelusu, ke enda nitihka ajar ti diterima kita ari kami.

⁷ Laban kita empu nemu jalai kita patut nunda teladan kami; kami enda ngelusu lebuh kami begulai enggau kita,

⁸ lalu kami enda makai utai orang enti kami enda mayar utai nya; tang kami bebendar gawa siang malam, ngambika kami enda nating kita.

⁹ Kami ngereja nya ukai laban kami nadai hak nating kita, tang ngambika kami nyadika teladan ti tau ditunda kita.

¹⁰ Indah lebuh kami begulai enggau kita suba, deh kami meri atur tu ngagai kita: Barang sapa enggai gawa, awakka iya enda makai.

¹¹ Laban kami bisi ninga sekeda kita ngelusu, kiruhka pengawa orang, lalu enggai gawa.

¹² Dalam nama Jesus Kristus Tuhan kitai, kami ngasuh sereta meransang orang ke baka nya ngeringak ngereja pengawa diri, ngiga pengidup ke diri empu.

¹³Menyadi, anang leju ngereja utai ti ngena.

¹⁴Enti orang enggai ngasika utai ti disebut kami dalam surat tu, kita enda tau enda nemu sapa orang nya. Anang begulai enggau iya, ngambika iya nemu malu.

¹⁵Tang anang ngaga iya nyadi munsuh, tang beri iya jaku tangkan, laban iya menyadi dalam Tuhan.

¹⁶ Awakka Tuhan Empu, ke pun pemaik, seruran meri kita pemaik ngena semua macham chara. Awakka Tuhan meruan enggau kita semua.

¹⁷Aku, Paul, ke nulis leka jaku tabi basa tu ngena jari aku empu. Tu endang jalai aku nyain semua surat aku. Tu endang jalai aku nulis.

¹⁸Awakka pengasih Jesus Kristus Tuhan kitai meruan enggau kita semua.