Read Iban 1 Timoti 2 Bible Online

1 Timoti 2 - Iban bible

1 Timoti 2

¹Nya alai, ke lumur satu, aku minta jaku peminta, sampi, sampi ke orang bukai, enggau sampi terima kasih disebut ke semua orang,

²ke raja enggau ke semua orang ke megai kuasa, ngambika kitai diau likun dalam pemaik, nangi sereta bebasaka Allah Taala ngena chara ti patut.

³Tu meh utai ti manah, ti ngerinduka ati Allah Taala ke Juruselamat kitai,

⁴ke dekaka semua mensia diselamatka, lalu nemu penemu pasal pemendar.

⁵Laban Allah Taala endang siku aja, lalu semina siku aja orang ke mai pemaik entara Allah Taala enggau mensia, iya nya Jesus Kristus,

⁶ke udah nyerahka Diri nyadika penebus semua mensia, ke udah dipadahka ba maya ti patut.

⁷ Nya meh kebuah aku udah diasuh nyadi penginjil enggau nyadi rasul -- aku madahka utai ti bendar, aku enda bula -- nyadi pengajar ke orang bansa bukai ba pasal pengarap enggau pemendar.

⁸Aku dekaka orang ke lelaki di semua endur besampi, ngangkatka jari ti kudus sereta nadai mai ati ti pedis tauka kelikuh.

⁹ Aku mega dekaka sida ke indu begari penumbas iya sereta menyana, ngena gari ti patut, ukai ngena buk ti kelalu balat gaya, tauka bekenaka perengka emas, tauka batu mutiara, tauka bekenaka gari ti mar rega,

¹⁰tang ngereja pengawa ti badas, baka ti patut dikereja indu ke nangika Allah Taala.

¹¹Awakka sida ke indu belajar enggau enda bemunyi sereta baruh ati.

¹²Aku enda ngemendarka indu ngajar, tauka bekuasa atas lelaki. Sida enda tau bemunyi.

¹³ Laban Adam dulu agi ditempa, udah nya baru Awa;

¹⁴ lalu ukai Adam ke kena tipu, tang indu nya ke kena tipu lalu bedosa.

¹⁵Tang taja pia, indu deka diselamatka laban iya beranak, enti iya, enggau ati ti baruh, majak dalam pengarap, pengerindu enggau pengudus.