Read Iban 1 Timoti 3 Bible Online

1 Timoti 3 - Iban bible

1 Timoti 3

¹Tu jaku ti bendar:[2] barang sapa ingin deka nyadi bishop,[3] iya inginka pengawa ti badas.

² Orang ke nyadi bishop enda tau enda orang ke nadai jalai mantah, siku aja bini,[4] nemu nagang diri, nemu bejimat mansutka runding, sereta manah ulah, nemu ngelaluka temuai, landik ngajar,

³ukai orang ke pemabuk, enda mangah tang siru enggau orang, ukai seruran deka belaya, lalu enda angkunka duit.

⁴Iya enda tau enda nemu ngintu ruang bilik diri empu enggau menyana, lalu ngajar bala anak iya ngasi sereta bebasaka iya;

⁵laban enti orang nya enda nemu ngintu ruang bilik diri empu, baka ni ku iya ulih ngintu eklisia Allah Taala?

⁶Iya enda tau orang ke baru udah nyadi orang Kristian, enggai ke iya ngerigangka diri laban sumbung, lalu diukum baka Sitan.

⁷Nambahka nya, iya enda tau enda orang ke dibasa orang ke ari luar eklisia, enggai ke iya dipechat lalu disintak panjuk Sitan.

⁸Baka nya mega orang ke nyadi dikon. Sida patut orang ke enda empelita ngereja pengawa, ukai orang ke aum-juak, ukai orang ke gian ngirup, lalu enda amuka duit.

⁹Sida enda tau enda, enggau ati ti beresi bepegai teguh ba misteri pengarap kitai.

¹⁰Lalu awakka sida diuji dulu. Udah nya, enti sida ditemu nadai udah ngereja penyalah, nya baru sida tau diambi nyadi dikon.[5]

¹¹Bini sida[6] mega patut orang ke manah ulah, enda bejakuka orang, tang nemu nagang diri, sereta tetap ati dalam semua utai.

¹²Dikon[7] enda tau bebini lebih ari siku, sereta nemu ngintu anak enggau ruang bilik diri enggau menyana,

¹³laban dikon ke ngereja pengawa sida enggau menyana deka dibasa orang, sereta berani bejakuka pasal pengarap sida ke Jesus Kristus.

¹⁴Aku ngarapka diri ulih nemuai ngagai nuan enda lama da agi, tang aku nuliska semua atur tu ngagai nuan ngambika,

¹⁵enti aku laun mimit datai, nuan nemu jalai diri patut begaya dalam ruang bilik Allah Taala, iya nya eklisia Allah Taala ti idup, ti nyadika tiang ti besai enggau sukung ke pemendar.

¹⁶Misteri agama kitai endang amat besai: Iya pegari ngena tubuh mensia. Roh Kudus madahka Iya endang amat, dipeda bala melikat, ditusui ngagai semua bansa, dikarapka mensia di serata dunya, dibai niki ke serega.