Read Iban 1 Timoti 4 Bible Online

1 Timoti 4 - Iban bible

1 Timoti 4

¹Roh Kudus terang amat madahka, jemah ila sekeda orang deka ngelengkaka pengarap laban sida mendingka roh ti nipu, enggau ajar antu,

²ti dikerembaika ulih orang ke pura-pura ngapa[8] sereta bula, ke bempu ati ti asai ke disar ngena besi ti angat.

³Sida nagang orang belaki bebini, nagang orang makai sekeda pemakai ti digaga Allah Taala ngambika bisi diterima enggau sampi terima kasih ulih orang ke arap sereta nemu pemendar.

⁴ Laban semua utai ti digaga Allah Taala endang manah magang, lalu nadai siti ari utai nya tau ditulak, enti iya diterima ngena sampi terima kasih,

⁵ laban iya dikuduska ulih jaku Allah Taala sereta enggau sampi.

⁶Enti nuan meri ajar tu ngagai bala menyadi[9] kitai, nuan nyadi ulun[10] ti badas ke Jesus Kristus, ulun ke beridup ba jaku pengarap, enggau ba ajar ti badas ti udah dititihka nuan.

⁷Seliahka semua cherita kelulu, laban utai nya ukai ari Allah Taala. Patihka diri idup nangika Allah Taala,

⁸laban taja pen matihka tubuh beguna, tang matihka diri nangika Allah Taala lebih agi beguna dalam semua pekara, laban ati ti nangi baka nya ngundan semaya ke pengidup ti diatu, enggau pengidup ti deka datai.

⁹Jaku tu amat, lalu patut diterima magang.

¹⁰Laban nya meh tuju kitai bebendar bekereja,[11] laban kitai manggaika pengadang kitai ba Allah Taala ti idup, ke nyadi Juruselamat ke semua mensia, kelebih agi ke orang ti arap.

¹¹Beri ajar tu ngagai sida, lalu asuh sida nitihka iya.

¹²Anang nejuka orang ngemaruhka nuan ketegal nuan agi biak, tang awakka nuan empu, ari jaku, ulah, pengerindu, pengarap enggau pengidup nuan ti tuchi, nyadi teladan ke orang ti arap.

¹³Sekumbang nuan ke nganti penatai aku, bacha Bup Kudus di mua orang mayuh, tusui Berita Manah, lalu ajar sida.

¹⁴Anang enda ngena pemeri Roh Kudus ti dikemisi nuan, ti udah diberi ngagai nuan lebuh jaku ti benabi disebut bala tuai lebuh sida ngengkahka jari sida atas nuan.

¹⁵Kena semua pemeri nya enggau pengabis ati nuan, ngambika semua orang ulih meda pemansang nuan.

¹⁶Jaga diri empu, lalu jaga mega ajar ti diberi nuan ngagai orang. Majak ngereja nya, laban enti nuan ngereja nya, nuan deka nyelamatka diri empu enggau orang ke mendingka nuan.