Read Iban 1 Timoti 5 Bible Online

1 Timoti 5 - Iban bible

1 Timoti 5

¹Anang bejaku kasar enggau orang ke tuai agi umur ari nuan, tang bejaku enggau iya baka ke bejaku enggau apai nuan empu, lalu enggau orang ke biak agi ari nuan, baka ke bejaku enggau menyadi,

²enggau indu ke tuai agi, baka ke bejaku enggau indai nuan empu, enggau indu ke biak agi, baka ke bejaku enggau menyadi indu nuan, ngena ati ti tuchi.

³Bebasaka indu ke balu ke endang amat suntuk.[12]

⁴Enti indu ke balu nya bisi anak tauka uchu, sida patut dulu belajar ngereja tanggungjawap agama ngagai ruang bilik sida empu kena malas pemanah apai indai sida, laban nya ngerinduka ati Allah Taala.

⁵ Indu ke balu, ke diau kediri, udah manggaika pengadang iya ba Allah Taala, lalu majak besampi sereta mantaika peminta iya ngagai Allah Taala siang malam.

⁶Tang indu ke balu, ke rindu nurutka pengingin tubuh diri, endang udah mati, taja pen iya agi idup.

⁷Beri mega atur tu, ngambika sida nadai jalai orang mantah.

⁸Lalu barang sapa enda ngintu kaban belayan diri empu, kelebih agi sida sebilik, udah nulak pengarap, lalu jai agi ari orang ke enda arap.

⁹Awakka nama indu ke balu disimpan dalam list nama indu ke balu, enti umur iya lebih ari enam puluh taun, lalu iya semina sekali aja udah belaki.[13]

¹⁰Lalu iya pen endang selalu ditemu ngereja pengawa ti manah baka ngiring bala anak iya empu enggau menyana, ngelaluka temuai ngagai rumah iya, masu kaki[14] nembiak Tuhan, nulung orang ke kena perinsa, lalu angkun ngereja pengawa ti manah dalam semua utai.

¹¹Tang anang nyimpan nama indu ke balu ke agi biak umur dalam list nama indu ke balu, laban lebuh pengingin sida nyeraraka sida ari Kristus, sida deka belaki,

¹²lalu kena ukum laban sida udah bulaka semaya sida ti keterubah enggau Kristus.

¹³Kelimpah ari nya, sida masau jam mawa[15] ari rumah sebuah ngagai rumah sebuah, lalu ukai semina enda gawa, tang sida mega bejakuka orang, ngachau[16] pengawa orang, besebutka utai ti enda patut disebut sida.

¹⁴Nya alai, aku dekaka indu ke balu, ke agi biak umur, belaki baru, beranak, ngintu rumah tangga diri empu, lalu enda meri peluang ngagai munsuh ngeleseka kitai.

¹⁵Laban sekeda udah limpang lalu nitihka Sitan.

¹⁶Enti indu ke Kristian bisi kaban belayan ke balu, awakka iya nulung sida, ngambika sida enda nating eklisia, ngambika eklisia ulih nulung indu ke balu ke amat nadai orang nulung.[17]

¹⁷Bala tuai ke ngereja pengawa sida enggau menyana patut diberi dua kali lipat gaji, kelebih agi sida ke bebendar nusui Berita Manah enggau ngajar;

¹⁸ laban Bup Kudus nyebut, “Anang mampul mulut sapi lebuh iya ngindik gandum.” Bup Kudus mega nyebut, “Orang ke gawa patut diberi gaji.”

¹⁹ Anang mendingka jaku dawa ngelaban tuai eklisia, enti jaku dawa nya enda disukung dua tauka tiga iku saksi.

²⁰Nyadi pasal orang ke majak bedosa, rara sida di mua semua orang mayuh, ngambika orang bukai nemu takut.

²¹Di mua Allah Taala, enggau di mua Jesus Kristus, enggau di mua bala melikat ti kudus, aku ngasuh nuan nitihka atur tu enggau enda belampung ati sereta enda bepilih mata ngereja utai.

²²Anang kelalu beguai ngengkahka jari atas orang.[18] Lalu anang enggau orang ngereja dosa. Intu diri empu tuchi.

²³Anang semina ngirup ai amat aja, tang irup wain mimit kena nulung perut nuan, laban nuan selalu sakit.

²⁴Dosa sekeda orang amat nyata sebedau sida kena ukum, tang dosa orang bukai semina nyata ila.[19]

²⁵Pengawa ti manah deka mega nyata dipeda. Indah lebuh sida enda nyata, deh sida enda ulih dipelalaika belama.