Read Iban 1 Timoti 6 Bible Online

1 Timoti 6 - Iban bible

1 Timoti 6

¹Semua ulun enda tau enda bebasaka tuan sida, ngambika nama Allah Taala enggau ajar kitai enda dikeleseka orang.

²Orang ke nyadi ulun orang Kristian, enda tau enda bebasaka tuan sida, laban tuan sida mega orang Kristian baka sida empu. Utai ti patut dikereja sida nya, sida patut bebendar agi bekereja ke tuan sida, laban orang ke bulih penguntung ari pengawa ti dikereja sida nya orang ke arap, ke dikerinduka sida. Ajar sereta peransang orang ngereja tanggungjawap nya.

³Barang sapa mai ajar ti lain agi ari nya, ti enda besetuju enggau jaku ti bendar ari Jesus Kristus Tuhan kitai, lalu enda nitihka ajar pasal idup nangika Allah Taala,

⁴orang nya semina ngerigangka diri lalu nadai nemu utai. Iya seruran ingin deka bekelikuh, deka betalatka leka jaku ti semina nyungkak orang kepapas, beserekang penemu, bejai pangan diri, besangkaka pangan diri,

⁵belaya enggau pangan diri, jai runding, sereta nadai nemu pemendar, ngarapka diri tau bulih pengaya ari pengawa agama.

⁶Agama amat tau ngasuh kitai balat kaya, enti kitai nemu puas ati ke utai ti dikemisi kitai,

⁷laban kitai nadai mai utai ngagai dunya tu, lalu kitai pen enda mega ulih mai utai ari dunya tu;

⁸tang enti kitai bisi pemakai enggau gari, kitai patut nemu puas ati ke nya.

⁹Tang orang ke keran deka nyadi kaya, deka kena laban penguji, lalu dipanjuk mayuh macham pengingin ti beli, ti ngemedis, ti ngerusak.

¹⁰Laban pengangkun ke duit nya pun semua macham penyai. Pengangkun ti baka nya ti mai sekeda orang limpang ari pengarap, lalu ngachuk sida ngena mayuh macham pemedis.

¹¹Tang nuan, nembiak Allah Taala, enda tau enda nyeliahka semua utai nya. Ulihka pengelurus, ati ti nangika Allah Taala, pengarap, pengerindu, ati ti tan, enggau penelap.

¹²Gawa bebendar ke pengarap. Ulihka pengidup ti meruan belama iya laban nuan udah dikangauka ngagai pengidup nya lebuh nuan ngaku diri arap di mua bala saksi.

¹³ Di mua Allah Taala, ke meri pengidup ngagai semua utai, enggau di mua Jesus Kristus, ke ngaku Diri di mua Pontius Pilate, aku ngasuh nuan

¹⁴ngasika pesan enggau nadai penimpang, enggau nadai jalai mantah nyentuk ngagai Hari Jesus Kristus Tuhan kitai dipandangka,

¹⁵ti deka dikereja Allah Taala ba maya ti patut--Allah Taala ti beberekat, Raja ti siku aja, ke ari atas semua raja, enggau Tuhan ari atas semua tuhan.

¹⁶Semina Iya siku aja ke enda nemu mati, ke diau dalam penampak ti enda ulih digagai mensia, ke nadai kala dipeda, tauka ulih dipeda mensia. Beri meh basa enggau kuasa ti meruan belama-lama ngagai Iya! Amin.

¹⁷Nyadi pasal orang ke kaya di dunya tu, padahka ngagai sida, sida enda tau sumbung, tauka manggaika pengadang sida ba pengaya ti tau lenyau, tang ba Allah Taala ke meri kitai semua utai kena kitai ngelantangka diri.

¹⁸Sida enda tau enda ngereja pemadas, kaya dalam pengawa ti badas, ngembuan ati ti gerah mudah, sereta sedia deka bekunsika utai enggau orang bukai.

¹⁹Nya meh jalai sida besimpanka pengaya ke diri empu nyadika pugu ti badas ke jemah ila, ngambika sida tau bulih pengidup, iya nya pengidup ti bendar.

²⁰Timoti, jaga utai ti udah diserahka ngagai nuan. Seliahka jaku ti kamah, enggau kelikuh pasal utai ti dikumbai sekeda orang “Penemu,”

²¹laban sekeda orang udah madahka diri bisi “penemu”, lalu nya ngujungka sida limpang ari pengarap. Awakka berekat Allah Taala meruan enggau kita.[20]