Read Iban 2 Timoti 2 Bible Online

2 Timoti 2 - Iban bible

2 Timoti 2

¹Nya alai, anak, anang enda ngeringka diri dalam pengasih Jesus Kristus,

²lalu jaku ti udah didinga nuan ari aku di mua orang mayuh, serahka jaku nya ngagai orang ke tetap ati, ke ulih ngajar orang bukai.

³Awakka nuan sama enggau kami taluk natka pemerinsa nyadi soldadu Jesus Kristus.

⁴Nadai orang ke nyadi soldadu malut diri enggau pengawa orang periman, laban tuju ati iya endang keran deka ngelantangka ati komandant iya.

⁵Baka nya mega, orang ke belumba enda bulih prais enti iya enda nitihka atur lumba.

⁶Orang bumai ke bebendar gawa, sigi patut diberi ungkup ari utai ti terubah diketau.

⁷Belematika utai ti disebut aku, laban Tuhan deka ngasuh nuan meretika semua utai nya.

⁸Kingatka Jesus Kristus, ke udah diangkatka ari mati, ke datai ari peturun David, munyi ti udah dipadahka aku dalam Berita Manah.

⁹Ketegal Berita Manah nya meh aku kena perinsa, datai ke aku ditanchang ngena rantai baka orang ke udah ngereja penyalah. Tang jaku Allah Taala enda ditanchang.

¹⁰Nya alai aku natka semua utai ke penguntung orang ke udah dipilih Allah Taala, ngambika sida mega tau bulih pengelepas enggau mulia ti meruan belama iya dalam Jesus Kristus.

¹¹Tu jaku ti bendar: “Enti kitai udah mati enggau Iya, kitai deka mega idup enggau Iya.

¹² Enti kitai tan, kitai deka mega merintah enggau Iya. Enti kitai besangkalka Iya, Iya deka mega besangkalka kitai.

¹³Enti kitai enda tetap ati, Iya meruan tetap ati laban Iya enda ulih besangkalka Diri Empu.”

¹⁴Asuh sida ngingatka tu, lalu beri sida jaku tangkan di mua Allah Taala[5] ngambika sida enda betalatka leka jaku, laban utai nya nadai pulai ke penguntung, tang semina ngerusak orang ke mending.

¹⁵Enggau naka ulih serahka diri empu ngagai Allah Taala, laban Iya udah ngemendarka nuan, ke enda malu ke pengawa diri, ngajar pesan ti bendar ngena jalai ti betul.

¹⁶Seliahka semua jaku ti nadai guna ti ngeleseka Allah Taala, laban jaku nya semina ngasuh orang ngejangka diri jauh agi ari Allah Taala.

¹⁷Jaku ajar sida nya baka rumbak ti enda nemu gerai. Orang ke bejaku baka nya nyengkaum Himineus seduai Pilitus,

¹⁸ti udah limpang ari pemendar, laban seduai iya ngumbai pengangkat ari mati udah nyadi. Seduai iya ngachau pengarap sekeda orang.

¹⁹ Tang pugu ti didudukka Allah Taala endang meruan tegap. Pugu nya ngundan tulis ti munyi tu: “Tuhan nemu sapa ke enggi Iya” enggau leka jaku, “Awakka semua orang ke ngangauka nama Tuhan, ngelengkaka penyai.”

²⁰Dalam sebuah rumah ti besai bisi mayuh macham mangkuk ti digaga ari pirak enggau emas, tang sekeda mega digaga ari kayu enggau ari tanah liat. Sekeda dikena lebuh maya rami, lalu sekeda dikena sebarang maya.

²¹Enti orang nuchi diri empu ari semua penyai, iya nyadi pekekas ti dikena ngereja pengawa ti menyana, digaga kudus, ti tau diguna Tuan iya sereta disediaka ngereja pengawa ti badas.

²²Seliahka semua pengingin nembiak, lalu bebendar ngulihka pengelurus, pengarap, pengerindu, enggau pemaik, sama enggau orang ke ngangauka nama Tuhan ngena ati ti tuchi.

²³Seliahka semua kelikuh ti beli ti nadai reti. Nuan nemu, utai nya semina ngasuh belaya ngapa.

²⁴Lalu ulun[6] Tuhan enda tau belaya, tang patut nelap enggau semua orang, landik ngajar, liat ati,

²⁵lalu enggau penyiru ngerara orang ke ngelaban, ngarapka Allah Taala deka ngasuh sida nesal ati ke dosa sida lalu nemu pemendar,

²⁶lalu ulih ngelepaska diri ari panjuk Sitan ti udah nangkap lalu ngasuh sida ngereja utai ti dikedekaka iya.