Read Iban 2 Timoti 3 Bible Online

2 Timoti 3 - Iban bible

2 Timoti 3

¹Tang nuan enda tau enda nemu tu: ba hari ti penudi mayuh macham penusah deka nyadi.

²Laban orang deka semina berundingka diri empu aja, angkunka duit, temegah, sumbung, bejai orang, enda ngasika apai indai, enda nemu meri terima kasih, enda kudus,

³kasar enggau orang, nadai nemu siruka orang, bejakuka orang, enda nemu nagang diri, mangah, begedika utai ti badas,

⁴aum-juak, enda berunding ngereja utai, ngerigangka diri laban sumbung, semina deka ngelantangka diri lalu enda rinduka Allah Taala,

⁵baka ke bepegai ba agama, tang sida besangkalka kuasa agama nya. Anang begulai enggau sida!

⁶Laban sekeda bala sida tama ngagai rumah orang, lalu bekuasa atas indu ke beli, ke alah ditating dosa sereta alah laban semua macham pengingin,

⁷ke seruran diajar tang nadai tetemuka penemu pasal pemendar.

⁸ Baka Jannes seduai Jambres ke ngelaban Moses, baka nya meh orang tu nyakal pemendar. Runding sida jai, lalu pengarap sida pelesu.

⁹Tang sida enda ulih majakka pengawa nya laban, baka ti nyadi ba Jannes seduai Jambres, semua orang deka meda pemeli sida.

¹⁰Tang nuan udah nemu ajar aku, ulah aku, tuju pengidup aku, pengarap aku, pengeliat ati aku, pengerindu aku, penegap aku,

¹¹ pemerinsa aku, penusah aku, utai ti nyadi ba aku di Antiok, di Ikonium, enggau di Listra, pasal pemalat pemerinsa ti ditatka aku! Tang Tuhan udah ngelepaska aku ari semua utai nya.

¹²Iya ti bendar, semua orang ke keran deka diau kudus dalam Jesus Kristus, deka kena perinsaka magang.

¹³Tang orang ke jai, enggau orang ke pura-pura ngapa,[7] deka majak jai se-jai, nipu orang, lalu sida empu deka kena tipu.

¹⁴Tang nuan enda tau enda majak bepegai ba utai ti udah dipelajar sereta dikarapka nuan laban nuan nemu sapa ke udah ngajar nuan utai nya,

¹⁵lalu nuan, kenyau ari nuan agi mit, endang udah nemu Bup Kudus ulih ngajar nuan ngulihka pengelepas ulih pengarap ke Jesus Kristus.

¹⁶Semua Bup Kudus endang bepun ari[8] Allah Taala magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus,

¹⁷ngambika semua nembiak Allah Taala chukup disikap ngereja genap macham pengawa ti badas.