Read Iban Titus 1 Bible Online

Titus 1 - Iban bible

Titus 1

¹Surat ari Paul, ulun[1] Allah Taala sereta nyadi rasul Jesus Kristus, ketegal pengarap orang ke udah dipilih Allah Taala enggau ketegal penemu pasal pemendar ti mai ngagai pengidup ti nangika Allah Taala,

²pengarap enggau penemu ti beduduk ba pengadang ke pengidup ti meruan belama iya, ti udah disemaya Allah Taala (Allah Taala enda kala bula) kenyau ari sebedau penumbuh dunya,

³lalu ba maya ti patut, Iya udah mandangka semaya nya ngena pesan Iya. Pesan nya udah diserahka ngagai aku, lalu aku nusui pesan nya nitihka asuh Allah Taala ti Juruselamat kitai.

⁴ Ngagai Titus, anak aku ti bendar dalam pengarap kitai: Awakka Allah Taala ti Apai, enggau Jesus Kristus ti Juruselamat kitai meri nuan berekat enggau pemaik.[2]

⁵Kebuah aku ninggalka nuan di Krit, nya ngambika nuan ulih mutarka semua pekara ti apin diputarka, lalu ngeletak orang nyadika tuai eklisia ba genap bengkah nengeri nitihka atur ti diberi aku ngagai nuan.

⁶ Tuai eklisia enda tau enda orang ke nadai penyalah, ke bisi siku aja bini,[3] lalu anak iya endang orang ke arap, ke nadai kala didinga enda manah ulah, tauka enda ngasi.[4]

⁷Laban bishop,[5] ke ngemataka pengawa Allah Taala, enda tau enda orang ke nadai jalai mantah, enda sumbung, tauka jampat ringat, tauka pemabuk,[6] tauka mangah, tauka amuka duit.

⁸Tang iya enda tau enda rindu nyambut temuai, rinduka utai ti badas, ulih nagang diri, lurus, kudus sereta nemu disiplin diri empu.[7]

⁹Iya enda tau enda bepegai teguh ba pesan ti tau dikarapka, ti udah diajar, ngambika iya ulih meransang orang ngena ajar ti betul, lalu nyakal orang ke ngelaban ajar nya.

¹⁰Laban mayuh orang deka ngelaban, orang ke semina bejaku ngapa, ke nipu, kelebih agi orang Judah.

¹¹Padamka jaku sida nya, laban sida ngachau ruang bilik orang ngena ajar ti enda patut diberi, ketegal sida ngulihka duit.

¹²Siku ari bala sida, ke endang nabi sida empu, udah nyebut, “Orang Krit endang seruran bula, mangah baka jelu, ngelusu, bam.”

¹³Nya endang amat. Nya alai rara sida enggau terit, ngambika sida kering dalam pengarap,

¹⁴lalu enda mendingka cherita kelulu orang Judah, tauka mendingka pesan ti diberi orang ke nulak pemendar.

¹⁵Ba orang ke tuchi, semua utai tuchi magang, tang ba orang ke jai sereta enda arap, nadai siti utai ti tuchi. Runding enggau ati sida endang jai.

¹⁶Sida ngumbai diri nemu Allah Taala, tang utai ti dikereja sida besangkalka nya. Sida dipegedika, enda ngasi, enda tau dikarapka ngereja pengawa ti badas.