Read Iban Titus 2 Bible Online

Titus 2 - Iban bible

Titus 2

¹Tang nuan empu enda tau enda meri ajar ti bendar.

²Asuh sida ke lelaki, ke tuai agi umur, nagang diri, enda empelita diau, bejimat berunding, tegap dalam pengarap, dalam pengerindu, sereta ngembuan ati ti tan.

³Baka nya mega, asuh sida indu ke tuai agi umur diau tuchi, enda bejakuka orang, enda pengirup. Asuh sida ngajar utai ti badas,

⁴ngambika sida ulih matihka indu ke agi biak rinduka laki enggau anak sida,

⁵nagang diri, diau tuchi, ngintu ruang bilik sida enggau menyana, nelap, sereta nunduk ngagai laki sida, ngambika jaku Allah Taala nadai jalai mantah.

⁶Baka nya mega, peransang lelaki ke agi biak belajar nagang diri.

⁷Ayanka diri empu nyadika teladan ti badas dalam semua utai ti dikereja nuan, lalu dalam semua ajar nuan, ayanka diri amat lurus ati, enda empelita ulah,

⁸bejaku menyana lalu nadai jalai mantah, ngambika orang ke ngelaban nuan nemu malu laban sida nadai jalai bejaika kitai.

⁹Asuh[8] ulun nunduk ngagai tuan sida lalu ngemuaska ati tuan sida dalam semua utai. Sida enda tau besaut enggau tuan sida,

¹⁰tauka ngenchuri utai ari sida, tang ngayanka diri endang seruran manah sereta tetap ati, ngambika dalam semua utai sida mai puji ngagai ajar ti diberi Allah Taala ti Juruselamat kitai.

¹¹Laban pengasih Allah Taala udah pegari, mai pengelepas ngagai semua mensia,

¹²ngajar kitai muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Allah Taala dalam dunya tu,

¹³sekumbang kitai ke nganti pengadang ti beberekat, enggau mulia Allah Taala, enggau Jesus Kristus ti Juruselamat kitai, pegari

¹⁴ ke udah nyerahka Diri ketegal kitai, ngambika Iya ulih nebus kitai ari semua penyai, lalu nuchi kitai ngambika kitai diempu Iya siku aja, lalu gagit ati ngereja pengawa ti badas.

¹⁵Padahka utai tu ngagai orang. Peransang lalu rara orang ngena semua kuasa.[9] Anang nejuka orang ngemaruhka nuan.