Read Iban Titus 3 Bible Online

Titus 3 - Iban bible

Titus 3

¹Asuh bala nembiak nuan nunduk ngagai orang ke megai perintah enggau ngagai orang ke megai kuasa, ngasika sida, lalu sedia deka ngereja pengawa ti badas,

²enda bejaku jai pasal orang, enda belaya, siru enggau orang, sereta bebasaka semua orang.

³Laban dulu menya kitai empu udah beli, enda ngasi, tesat, nyadi ulun semua macham pengingin enggau nyadi ulun ati ti selalu deka ngelantangka diri, jai ati ngagai orang, kepapaska[10] orang, dipegedika orang lalu begedika pangan diri.

⁴Tang lebuh pemadas, penelap enggau pengerindu Allah Taala ti nyadi Juruselamat kitai pegari,

⁵Iya nyelamatka kitai, ukai laban kitai udah ngereja pengawa ti lurus, tang ulih pengasih Iya. Iya nyelamatka kitai ulih Roh Kudus, ke masu kitai, lalu ngadaka kitai baru, lalu meri kitai pengidup ti baru.

⁶Roh Kudus nya dituang Allah Taala ngagai kitai belimpah-limpah, ulih Jesus Kristus ti Juruselamat kitai,

⁷ngambika kitai digaga lurus[11] ulih pengasih Allah Taala, lalu bempu pengidup ti meruan belama iya ti disadang kitai.

⁸Tu jaku ti bendar. Aku dekaka nuan bebendar ngemeranka semua pekara nya, ngambika orang ke udah arapka Allah Taala nemu ngereja pengawa ti badas. Semua utai nya badas magang sereta beguna ke semua orang.

⁹Tang seliahka kelikuh ti beli, tauka tusut pasal penatai aki ini, tauka penyerekang, enggau laya pasal Adat, laban utai nya nadai pulai ke penguntung, sereta nadai guna.

¹⁰Beri jaku tangkan enda kurang ari dua kali ngagai orang ke mai penyerekang ngagai gerija[12] udah nya anang agi bekaul enggau iya,

¹¹laban nuan nemu, orang ke baka nya endang jai sereta bedosa. Iya ngukum diri empu.

¹² Lebuh aku ngasuh Artemas, tauka Tikikus, nemuai ngagai nuan, aku minta nuan enggau naka ulih nemuai ngagai aku di Nikopolis, laban aku udah mutuska runding deka ngenduh dia lebuh musin chelap.

¹³Enggau naka ulih, tulung lawyer Senas enggau Apollos nyendiaka diri mupuk. Anang nejukka seduai iya suntuk sebarang utai.

¹⁴Lalu awakka bala kitai belajar ngereja pengawa ti badas, ngambika sida ulih nulung orang ke suntuk, lalu enda masau jam ngapa.

¹⁵Semua orang ke enggau aku bela ngirumka tabi basa ngagai nuan. Beri tabi basa kami ngagai pangan ke sama pengarap enggau kitai. Awakka berekat Allah Taala meruan enggau kita semua. [13]