Read Iban Pilimon 1 Bible Online

Pilimon 1 - Iban bible

Pilimon 1

¹Surat ari Paul, ke nyadi orang jil Jesus Kristus, enggau ari menyadi kitai Timoti, Ngagai pangan kami Pilimon ke sama bekereja enggau kami,

² enggau ngagai menyadi indu kami Apia, enggau ngagai Arkipus ke sama nyadi soldadu enggau kami, enggau ngagai raban eklisia ke begempuru dalam rumah nuan.

³ Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

⁴Lebuh aku ngingatka nuan dalam sampi aku, aku selalu meri terima kasih ngagai Allah Taala aku,

⁵laban aku ninga pasal pengerindu nuan ke semua nembiak Tuhan, enggau pasal pengarap nuan ke Tuhan Jesus.

⁶Aku besampi ngambika nuan cheregas bekunsika pengarap, ngambika nuan meretika semua utai ti badas ti dikembuan kitai dalam Kristus.

⁷Pengerindu nuan udah ngasuh ati aku balat gaga, lalu aku berasai diperansang, laban nuan, menyadi, udah ngelantangka ati bala nembiak Tuhan.

⁸Nya alai, taja pen dalam Kristus aku berani sereta tau ngasuh nuan ngereja utai ti patut dikereja nuan,

⁹tang aku semina minta aja, ketegal pengerindu. Nya alai, aku, Paul -- orang tuai lalu diatu nyadi orang jil Kristus,[1]

¹⁰ aku minta utai ari nuan ngarika anak aku, Onisimus, laban aku udah nyadi apai iya sekumbang aku ke dalam rumah jil tu.

¹¹Dulu suba iya nadai guna ba nuan, tang diatu iya besai amat guna ba nuan enggau ba aku. [2]

¹²Aku diatu ngirumka iya pulai baru ngagai nuan, taja pen aku balat sayauka iya.

¹³Aku bisi amat ati deka ngetanka iya ditu, ngambika iya nyadika pengari nuan nulung aku, lebuh aku ditan dalam rumah jil tu ketegal Berita Manah.

¹⁴Tang aku enggai ngereja utai enti nuan enda dulu ngemendarka nya, ngambika sebarang utai ti dikereja nuan, semina dikereja nuan nitihka ati nuan empu, ukai ari pejal.

¹⁵Nyangka nya kebuah iya beserara enda lama ari nuan, ngambika nuan tau bempu iya baru belama iya,

¹⁶ukai nyadi ulun, tang lebih agi ari nya, nyadi menyadi ke dikesayau - ke dikesayauka aku tang kelebih agi, dikesayauka nuan, dalam batang tubuh enggau dalam Tuhan.

¹⁷Nya alai, enti nuan ngira aku tu tawing nuan ngereja pengawa,[3] sambut meh iya, baka nuan ke nyambut aku.

¹⁸Enti iya bisi udah ngereja utai ti salah ngagai nuan, tauka berutang ba nuan, simpan utang nya dalam akaun aku.

¹⁹Aku, Paul, nulis tu ngena jari aku empu: Aku, Paul, deka mayar utang nya -- enda ngira nuan empu ke berutang nyawa ba aku.

²⁰Sigi amat, menyadi, aku minta utai siti tu ari nuan dalam Tuhan: Asuh ati aku lantang dalam Kristus.

²¹Aku enda ngarapka nuan deka ngereja utai ti dipinta aku, nya kebuah aku nulis ngagai nuan, laban aku nemu nuan deka ngereja lebih agi ari ti dipinta aku.

²²Siti agi utai--sediaka siti bilik ke aku, laban aku ngarapka diri ulih nemuai baru ngagai kita, ari sampi semua kita.

²³ Epapras, ke sama ditan dalam rumah jil enggau aku ketegal Jesus Kristus, ngirumka tabi basa ngagai nuan,

²⁴ lalu baka nya mega Mark, Aristarkus, Demas enggau Luke ke sama bekereja enggau aku.

²⁵Awakka pengasih Tuhan Jesus Kristus meruan enggau nuan. [4]