Read Iban Hebrew 1 Bible Online

Hebrew 1 - Iban bible

Hebrew 1

¹Dulu kelia Allah Taala suah bendar bejaku ngagai aki ini kitai, ngena mayuh macham chara, beseruanka sida nabi,

² tang ba hari ti penudi tu, Iya udah bejaku ngagai kitai ngena Anak Iya Empu, ke diletak Iya bempu semua utai. Lalu ulih Anak Iya, Iya udah mega ngaga dunya.

³ Anak Iya nya mandangka penampak mulia Allah Taala. Lalu gamal Iya mega betul-betul sebaka enggau gamal Allah Taala, lalu Iya ngempung semua utai di dunya enggau di dunya luar ngena jaku Iya ti bekuasa. Lebuh Iya udah ngaga chara kena muai dosa, Iya duduk muak ari kanan Allah Taala ti Pemadu Tinggi di serega.

⁴Nya alai Iya jauh lebih agi tinggi ari sida melikat, baka nama Iya ti jauh lebih agi manah ari nama sida melikat.

⁵ Laban Allah Taala nadai kala nyebut ngagai melikat, “Nuan tu Anak Aku, sehari tu Aku udah nyadi Apai nuan.” Tauka, “Aku deka nyadi Apai iya, lalu iya deka nyadi Anak Aku.”

⁶ Lalu lebuh Allah Taala ngasuh Anak Tuai Iya datai ngagai dunya, Iya bejaku munyi tu, “Awakka semua melikat Allah Taala nyembah Iya.”

⁷ Tang ba pasal melikat, Allah Taala bejaku munyi tu, “Allah Taala ngaga melikat Iya nyadi ribut, lalu bala nembiak Iya nyadi daun api.”

⁸ Tang ba pasal Anak Iya, Iya bejaku munyi tu, “Tang kerusi diraja Nuan, O Allah Taala, deka meruan belama-lama iya! lalu Nuan deka merintah ngena pengelurus.

⁹Nuan rinduka pengelurus, lalu begedika penyai. Nya alai Allah Taala, iya nya Allah Taala Nuan, udah nata Nuan ngena minyak pengaga lebih ari sida pangan Nuan.”

¹⁰ Allah Taala mega bejaku munyi tu: “Ba pun iya kelia, Tuhan, Nuan udah ngaga dunya, lalu langit digaga Nuan ngena jari Nuan.

¹¹Semua utai nya deka lesap magang, tang Nuan deka meruan belama iya. Semua utai nya deka luya baka kain.

¹²Nuan deka ngelipatka sida baka ke ngelipatka kelambi, lalu sida deka berubah baka gari. Tang Nuan enda berubah, lalu umur Nuan enda nemu abis.”

¹³ Allah Taala nadai kala bejaku munyi tu ngagai melikat, “Duduk muak ari kanan Aku datai ke Aku udah ngaga munsuh Nuan nyadika pelasar kaki Nuan.”

¹⁴ Kati semua melikat ukai roh, ke diasuh Allah Taala bekereja ke orang ke deka nerima pengelepas?