Read Iban Hebrew 11 Bible Online

Hebrew 11 - Iban bible

Hebrew 11

¹Reti pengarap nya arapka utai ti disadang, arapka utai ti enda dipeda.

² Sida ke dulu kelia dikerinduka Allah Taala, ulih pengarap.

³ Ulih pengarap, kitai nemu langit enggau dunya digaga ulih jaku Allah Taala, ngambika utai ti dipeda, digaga ari utai ti enda dipeda.

⁴ Ulih pengarap, Abel ngenjuk piring ti lebih agi dikerinduka Allah Taala ari piring ti diberi Kain. Ulih pengarap, Abel dikumbai Allah Taala lurus, laban Allah Taala rinduka pemeri iya. Abel mati, tang ulih pengarap iya, iya agi mengkang bejaku diatu.

⁵ Ulih pengarap, Enok dibai ke atas ngambika iya enda mati, lalu nadai orang nemu endur alai iya, laban Allah Taala udah nabanka iya. Tang sebedau iya ditabanka, iya udah ngerinduka ati Allah Taala.

⁶Nadai orang ulih ngerinduka ati Allah Taala enti iya enda arapka Allah Taala, laban barang sapa datai ngagai Allah Taala enda tau enda arapka Allah Taala endang amat bisi, lalu arapka Iya deka ngupah orang ke ngiga Iya.

⁷ Ulih pengarap, Noah, lebuh iya diberi Allah Taala jaku tangkan pasal utai ti deka nyadi, ngasi lalu ngaga sebuah bandung kena iya ngidupka sida sebilik. Nya meh jalai orang di dunya tu diukum, lalu Noah nerima ari Allah Taala pengelurus ti datai ulih pengarap.

⁸ Ulih pengarap, Abraham ngasi lebuh iya diasuh bejalai ngagai siti endur ti deka diterima iya nyadika pesaka. Iya mupuk, taja pen iya enda nemu tunga pejalai diri.

⁹ Ulih pengarap, iya diau di menua ti udah disemaya, nyadi orang kampar, diau dalam langkau kain, lalu baka nya mega Isak enggau Jakop, ke nerima semaya nya baka iya.

¹⁰Laban Abraham nganti sebuah nengeri ti bisi batu pemun, ti diperambu lalu digaga Allah Taala.

¹¹ Ulih pengarap, Abraham ulih nyadi apai, taja pen iya kelalu tuai umur, lalu Sarah empu pen mandul, laban iya arapka Allah Taala deka ngamatka semaya Iya.[18]

¹² Nya alai orang siku, ke nyau deka mati, ngadaka peturun ngemayuh bintang ti di langit, ti enda ulih diitung baka igi pasir ti ba tebing tasik.

¹³ Semua sida nya mengkang arap datai ke sida mati. Sida nadai nerima utai ti udah disemaya, tang sida udah meda lalu ngelaluka utai nya ari jauh, lalu ngaku diri orang kampar, ke tasah di dunya tu,

¹⁴laban orang ke bejaku munyi nya terang madahka diri ngiga menua sida empu.

¹⁵Enti sema sida berundingka menua ti udah ditinggalka sida, sida tentu bisi peluang mulaika diri.

¹⁶ Tang sida inginka menua ti manah agi, iya nya menua serega. Nya alai Allah Taala enda malu dikumbai sida Allah Taala sida, laban Iya udah nyendiaka sebuah nengeri ke sida.

¹⁷ Ulih pengarap, Abraham nyerahka anak iya Isak nyadika piring lebuh iya diuji, lalu iya tke udah nerima semaya, sedia deka nyerahka anak tunggal iya,

¹⁸ ke udah dikenang Allah Taala munyi tu, “Peturun nuan deka datai nengah Isak.”

¹⁹Abraham ngira Allah Taala ulih ngangkatka orang ari mati, nya alai, ba reti iya, Abraham amat nerima Isak ari mati.

²⁰ Ulih pengarap, Isak merekatka Jakop seduai Esau.

²¹ Ulih pengarap, Jakop, lebuh iya nyau deka mati, merekatka genap iku anak Josep, meremika diri bekering ba tungkat iya nyembah Allah Taala.

²² Ulih pengarap, Josep, lebuh iya nyau deka mati, bejakuka pasal orang Israel ke deka pansut ari menua Ejip, lalu meri atur pasal chara sida patut nguburka iya.

²³ Ulih pengarap, apai indai Moses ngelalaika iya tiga bulan udah bekau iya ada, laban sida meda gamal iya sigat, lalu sida enda takutka adat raja.

²⁴ Ulih pengarap, Moses enggai dikumbai uchu raja lebuh iya nyau besai tuai,

²⁵tang ingin deka natka pemerinsa sama enggau bala nembiak Allah Taala, lalu enda ngelantangka diri ngereja utai ti tau ngasuh bedosa.

²⁶Iya ngira, natka diri diperinsa ketegal Kristus nya berega agi ari semua pengaya menua Ejip, laban iya seruran merening ke mua ngagai upah ti deka diterima iya.

²⁷ Ulih pengarap, iya ninggalka menua Ejip, lalu enda takutka pengeringat raja. Iya majak ngasuh ati diri tan, indah-indah baka ke meda Allah Taala ti enda ulih dipeda.

²⁸ Ulih pengarap, iya ngintu Gawai Paska, lalu mechikka darah, ngambika Melikat Pemati ti munuh anak tuai, enda negu anak tuai orang Israel.

²⁹ Ulih pengarap, orang Israel meraka Tasik Mirah baka ke bejalai nengah tanah ti rangkai. Tang lebuh orang Ejip nguji bejalai nengah nya, sida lemas.

³⁰ Ulih pengarap, dinding kuta nengeri Jeriko runtuh, lebuh orang Israel udah bejalai ngelingi nengeri nya tujuh hari.

³¹ Ulih pengarap, indu sundal ke benama Rahap enda mati sama enggau orang ke enda ngasika Allah Taala, laban iya udah ngelaluka pematau orang Israel.

³² Nama utai bukai ti patut dikenang aku? Aku enda chukup jam kena aku bejakuka pasal Gideon, Barak, Samson, Jeptah, David, Samuel enggau bala sida nabi

³³ ke ngalahka mayuh bengkah menua ulih pengarap, ke bejalaika atur ti lurus, nerima semaya, nutup mulut singa,

³⁴ madamka api ti mau, ngerarika diri ari pedang, ke ngalihka pengelemi nyadi pengering, ke kering beperang, lalu ngalahka bala soldadu orang menua bukai.

³⁵ Sida ke indu nerima kaban belayan sida ke udah mati, ke diangkatka idup baru. Sekeda sida ti bukai kena perinsa lalu enggai dilepaska, laban sida ngarapka diri deka bulih pengangkat ari mati ti menyana agi.

³⁶ Sida ke bukai dikeleseka lalu disipat, ditanchang ngena rantai, lalu ditutup dalam rumah jil.

³⁷ Sida dituku ngena batu, ditetak putus dua. Sida dibunuh ngena pedang. Sida segau-segau, begari ngena kulit bedus enggau kulit kambin, seranta, diperinsa, dikeduan.

³⁸Dunya endang amat enda chukup badas ke sida! Sida bejalai segau-segau ba sebelah menua puang enggau ba sebelah bukit, diau dalam lubang gua, enggau dalam lubang tanah.

³⁹Semua sida nadai nerima utai ti disemaya, taja pen sida dipuji ketegal pengarap sida,

⁴⁰laban Allah Taala udah nyendiaka utai ti badas agi, iya nya, sida deka nyadi pemadu badas enti sida begulai enggau kitai.