Read Iban Hebrew 12 Bible Online

Hebrew 12 - Iban bible

Hebrew 12

¹Nya alai, laban kitai dikelingi mayuh amat saksi, aram kitai mega muai semua utai ti berat ti nating kitai, enggau dosa ti balat lekat ba kitai, lalu awakka kitai belanda enggau ati ti liat dalam lumba kitai.

² Aram kitai merening ngagai Jesus ke ngemunka lalu ngaga pengarap kitai nyadi pemadu badas. Iya enda malu natka Diri diregang ketegal pengaga ti deka diasaika Iya, lalu diatu Iya duduk muak ari kanan kerusi diraja Allah Taala.

³Uji kita ngira pasal Iya ke natka diri dilaban orang ke bedosa, ngambika kita enda lelak tauka alah semengat.

⁴Dalam perang kita ngelaban dosa, kita nadai udah kala belaban datai ke kita nyau pansut darah.

⁵ Lalu kita enda ingatka jaku peransang ti ngumbai kita nya anak Allah Taala -- “Anak, anang enda bedulika disiplin Tuhan, tauka lemi ati lebuh Iya nganu kita.

⁶Laban Tuhan disiplin semua orang ke dikerinduka Iya, lalu nganu semua orang ke diterima Iya nyadi anak.”

⁷Tatka semua pemerinsa nyadika disiplin ari Allah Taala laban Iya ngaga kita nyadi anak Iya. Laban sapa anak ke nadai kala didisiplin apai iya?

⁸Enti Iya enda disiplin kita baka Iya ke disiplin semua anak Iya ti bukai, reti nya kita anak ampang, ukai anak ti bendar.

⁹Nambahka nya, indah apai ada kitai deh disiplin kitai, lalu kitai bebasaka sida ketegal nya. Kati kitai enda lebih agi patut nunduk ngagai Apai Roh kitai, lalu idup?

¹⁰Laban apai ada kitai semina disiplin kitai enda lama aja, nitihka pematut ku ati sida, tang Allah Taala disiplin kitai ke penguntung kitai, ngambika kitai nyadi kudus baka Iya Empu.

¹¹Lebuh kitai kena disiplin, utai nya asai ti pedis, ukai nyamai. Udah nya baru iya mai buah pengelurus ti meri pemaik ngagai orang ke dilatih ngena disiplin nya.

¹² Nya alai, kedarka jari kita ti lelak, lalu keringka patung kita ti lemi,

¹³ lalu gaga jalai kita rurus, ngambika kaki ti lemi enda selau, tang digeraika.

¹⁴Diau bebaik enggau semua orang, lalu diau kudus, laban enti kita enda, kita enda ulih meda Tuhan.

¹⁵ Kita enda tau enda nentuka nadai siku kita enda bulih pengasih Allah Taala; enda tau enda nentuka nadai siku kita bedendam ngagai pangan diri, ti tau ngasuh penyarut nyadi, lalu ngujungka mayuh orang enda tuchi.

¹⁶ Kita enda tau enda nentuka nadai siku kita baka Esau, ke nadai moral sereta enda nangika Allah Taala, lalu nyual waris iya ketegal semangkuk pemakai.

¹⁷ Kita nemu, udah bekau nya, lebuh iya minta berekat ari apai iya, peminta iya ditulak, laban iya nadai jalai nesal ati ke penyalah diri, taja pen iya minta berekat nya enggau ai mata.

¹⁸ Kita ukai datai ngagai utai ti ulih ditegu, ngagai api ti mau, ngagai mua hari ti petang, tauka ngagai kabut,

¹⁹tauka ngagai munyi terumpit, tauka ngagai nyawa ti bejaku, datai ke sida ke ninga nyawa nya minta nyawa nya badu agi bejaku ngagai sida,

²⁰ laban sida enda tan ninga pesan ti diberi ngagai sida, “Indah jelu ti negu bukit tu deh enda tau enda dituku ngena batu datai mati.”

²¹ Utai ti dipeda sida balat amat ngenakut, datai ke Moses empu nyau nyebut, “Aku getar-getar takut!”

²²Tang kita udah datai ngagai Bukit Sion, ngagai nengeri Allah Taala ti idup, ngagai nengeri Jerusalem ti di serega, enggau ngagai gempuru beribu-ribu iku melikat serega;

²³ngagai gempuru bala anak tuai ke bisi nama ditulis di serega. Kita udah datai ngagai Allah Taala, Hakim ke semua mensia, enggau ngagai roh orang ke lurus ke udah digaga nyadi pemadu badas,

²⁴ enggau ngagai Jesus, ke nyadi pengari ke sempekat ti baru, enggau ngagai darah ti dipechikka, ti bejaku badas agi ari darah Abel.

²⁵ Kita enda tau enda nentuka diri enda nulak Iya ke bejaku; laban enti sida ke dulu menya enda ulih ngerarika diri lebuh sida nulak Iya ke meri jaku tangkan ngagai sida di dunya tu, tentu lebih agi ga kitai enda ulih ngerarika diri, enti kitai nulak Iya ke meri kitai jaku tangkan ari serega!

²⁶ Lebuh maya nya menya, tanah berenyang laban penginggar nyawa Iya, tang diatu Iya udah besemaya, “Aku deka sekali agi, ukai semina ngusak dunya, tang langit mega.”

²⁷Leka jaku “sekali agi” terang nunjukka utai ti ulih digusak deka dibuai, iya nya utai ti udah digaga, ngambika semina utai ti enda ulih digusak aja tinggal.

²⁸Nya alai, laban kitai nerima Perintah ti enda ulih digusak, aram kitai meri terima kasih kena kita nyembah Allah Taala, sembah ti dikerinduka Iya, ngena ati ti nangi sereta enggau basa;

²⁹ laban “Allah Taala kitai [19] api ti ngerusak.”