Read Iban Hebrew 2 Bible Online

Hebrew 2 - Iban bible

Hebrew 2

¹Nya alai kitai enda tau enda bebendar agi bepegai ba ajar ti udah didinga kitai, ngambika kitai enda limpang.

²Laban enti pesan ti udah dipadahka melikat nya pesan ti bendar, lalu semua orang ke ngereja penyalah, tauka enda ngasi, udah diukum nitihka pematut,

³baka ni ku kitai ulih ngerarika diri enti kitai enggai ibuhka pengelepas ti besai baka nya? Pengelepas nya terubah dipadahka Tuhan Empu, lalu udah nya pengamat pesan nya dipadahka ngagai kitai ulih orang ke ninga Iya.

⁴Lalu Allah Taala udah mega besaksika pengamat pesan nya ngena tanda enggau kereja ti nyelai, ngena mayuh macham pemeri Roh Kudus ti diberi nitihka peneka Iya Empu.

⁵Ukai melikat ke diasuh Allah Taala merintah dunya ti deka datai, ti dikenang kitai diatu.

⁶ Utai tu bisi udah disebut, “Sapa mensia, alai Nuan deka ibuhka iya? Tauka anak mensia, alai Nuan deka ngibun iya?

⁷Nuan udah ngaga iya baruh mimit ari melikat enda lama aja. Nuan udah meri iya makota, mulia enggau basa,

⁸lalu ngengkahka semua utai di baruh kaki iya.” Lebuh Allah Taala ngengkahka semua utai di baruh kuasa iya, Allah Taala nadai ninggalka utai ti enda diengkahka di baruh kuasa iya. Tang diatu, kitai nadai meda semua utai diengkah di baruh kaki iya.

⁹Tang kitai meda Jesus, ke udah digaga baruh mimit ari melikat enda lama, diberi makota mulia enggau basa laban Iya udah merinsa natka pemati, ngambika, ulih pengasih Allah Taala, Iya mati ke semua mensia.

¹⁰Laban Allah Taala, ke ngaga sereta bempu semua utai, endang patut ngasuh Jesus nyadi pemadu badas ulih pemerinsa, lebuh Jesus muka jalai pengelepas ke mayuh anak Allah Taala lalu mai sida bempu mulia Iya.

¹¹Laban Iya ke ngudus, enggau orang ke dikuduska Iya, sama datai ari ruang bilik siti aja. Nya kebuah Jesus enda malu ngumbai sida menyadi Iya.

¹² Ku Iya, “Aku deka madahka nama Nuan ngagai sida menyadi Aku. Aku deka muji Nuan lebuh bala sida begempuru.”

¹³ Iya mega nyebut, “Aku deka manggaika pengarap Aku ba Iya.” Lalu Iya mega nyebut, “Tu Aku, enggau bala anak ke udah diberi Allah Taala ngagai Aku.”

¹⁴Nya alai, laban bala anak endang mensia, Jesus mega nyadi mensia baka sida, ngambika ulih pemati Iya, Iya ulih ngerusak Sitan ke megai kuasa pemati,

¹⁵lalu ngelepaska semua orang ke nyadi ulun seumur idup ari penakut sida ke pemati.

¹⁶ Laban utai tu terang, ukai melikat ke ditulung Iya, tang peturun Abraham.

¹⁷Nya alai Iya enda tau enda digaga sebaka enggau bala menyadi Iya dalam semua utai, ngambika Iya nyadi Imam Besai ti kasih, sereta tetap ati bekereja ke Allah Taala, ngambika Iya ngaga piring kena muai dosa orang mayuh.

¹⁸Laban Iya Empu udah merinsa lebuh Iya diuji, nya alai Iya ulih nulung orang ke kena laban penguji.