Read Iban Hebrew 3 Bible Online

Hebrew 3 - Iban bible

Hebrew 3

¹Nya alai, menyadi ti kudus, ke sama udah dikangauka Allah Taala, peratika Jesus, ke nyadi Rasul sereta nyadi Imam Besai ke pengarap kitai.

² Iya udah tetap ati ngagai Allah Taala ke udah milih Iya, baka Moses ke udah tetap ati diau dalam rumah Allah Taala.

³Tang Jesus patut balat agi dibasa ari Moses, baka tukang rumah ke balat agi dibasa ari rumah ti digaga iya.

⁴Laban semua rumah endang digaga orang, tang Allah Taala ngaga semua utai.

⁵ Moses udah tetap ati gawa nyadi ulun dalam rumah Allah Taala, besaksika pasal utai ti deka disebut Allah Taala jemah ila.

⁶Tang Kristus tetap ati ngibun rumah Allah Taala laban Iya Anak. Lalu kitai tu rumah Allah Taala, enti kitai bepegai teguh[1] ba ati ti kempang enggau ba pengadang ti dikemegahka kitai.

⁷ Nya alai, munyi ti disebut Roh Kudus, “Sehari tu, enti kita ninga nyawa Iya,

⁸anang ngasuh ati kita kieh, baka aki ini kita ke angkat ngelaban, lebuh maya penguji di menua puang,

⁹alai aki ini kita ke nguji Aku, taja pen sida udah meda utai ti dikereja Aku dalam kandang empat puluh taun.

¹⁰Nya alai Aku ringat ngagai bala orang ke ari serak nya, lalu ku Aku nyebut, ‘Ati sida seruran limpang, lalu sida apin nemu jalai Aku.’

¹¹Aku ringat lalu besumpah: ‘Sida enda tau tama ngagai endur alai Aku belelak!’ ”[2]

¹²Bejimat kita, menyadi, enggai ke kita ngembuan ati ti jai, ati ti enda arap, lalu ninggalka Allah Taala ti idup.

¹³Tang peransang pangan diri tiap hari, seagi-agi hari tu dikumbai “Sehari tu,” ngambika nadai siku kita ditipu dosa lalu nyadi kieh.

¹⁴Laban kitai nyadi tawing Kristus enti kitai bepegai teguh ba ati ti kempang datai ke ujung, baka ti dikembuan kitai ba pun iya suba.

¹⁵ Munyi ti disebut dalam Bup Kudus: “Sehari tu, enti kita ninga nyawa Iya, anang ngasuh ati kita kieh, baka sida ke angkat ngelaban.”

¹⁶ Sapa orang ke ninga nyawa Allah Taala, tang angkat ngelaban Iya? Ukai enda semua sida nya orang ke pansut ari menua Ejip ke diuluka Moses?

¹⁷Lalu ngagai sapa Allah Taala ringat empat puluh taun? Ukai Iya enda ringat ngagai orang ke bedosa, lalu sida mati di menua puang?

¹⁸Lalu ngagai sapa Allah Taala besumpah, madahka sida enda tau tama ngagai endur alai Iya belelak, enti enda ngagai sida ke enda ngasi?

¹⁹Nya alai ari nya kitai meda, sida enda ulih tama ngaga endur alai Allah Taala belelak, laban sida enda arap.