Read Iban Hebrew 4 Bible Online

Hebrew 4 - Iban bible

Hebrew 4

¹Nya alai, seagi-agi semaya ti ngasuh kitai tama ngagai endur alai Allah Taala belelak nya agi meruan, kitai enda tau enda bejimat ngambika nadai siku kitai ditemu enda patut tama ngagai endur nya.

²Laban Berita Manah ti didinga kitai sebaka enggau Berita Manah ti didinga sida, tang pesan ti didinga sida nadai pulai ke penguntung sida, laban sida enda nerima pesan nya ngena pengarap.

³ Nya alai kitai ke arap, tama ngagai endur alai Allah Taala belelak, munyi ti disebut Allah Taala, “Aku ringat lalu besumpah: ‘Sida enda tau tama ngagai endur alai Aku belelak,’ ”[3] taja pen pengawa Iya udah tembu kenyau ari penumbuh dunya.

⁴ Laban pasal hari ti ketujuh udah disebut munyi tu: “Lalu ba hari ti ketujuh Allah Taala belelak ari semua pengawa Iya.”

⁵ Lalu Iya bejaku baru: “Sida enda tau tama ngagai endur alai Aku belelak.”

⁶Nya alai sekeda orang deka tama ngagai endur alai belelak nya, lalu orang ke udah diajar pasal Berita Manah enda tama laban sida enda ngasi.

⁷ Nya alai Allah Taala ngeletak siti agi hari, ti dikumbai Iya “Sehari tu,” ti disebut Iya lama udah bekau nya ngena David, munyi ti udah disebut tadi: “Sehari tu, enti kita ninga nyawa Iya, anang ngasuh ati kita kieh.”

⁸ Laban enti Josua udah ngasuh sida belelak, Allah Taala tentu enda ibuh bejakuka pasal hari bukai, udah bekau nya.

⁹Nya alai bala nembiak Allah Taala agi ulih belelak lebuh hari Sabat;

¹⁰ laban orang ke tama ngagai endur alai Allah Taala belelak, mega ngetu ari pengawa sida, baka Allah Taala ke ngetu ari pengawa Iya.

¹¹Nya alai, aram kitai enggau naka ulih tama ngagai endur alai belelak nya, ngambika nadai siku kitai enda mujur baka sida ketegal enda ngasi.

¹²Laban jaku Allah Taala idup sereta bekuasa, tajam agi ari pedang ti bemata dua, ti ngerejang datai ke iya nyeraraka semengat ari roh, nyeraraka buku tulang ari untak tulang; iya ulih ngakim runding enggau niat ati mensia.

¹³ Nadai utai ulih dipelalaika ari Allah Taala. Semua deka dikebak lalu diayanka magang di mua Iya. Lalu semua kitai enda tau enda madahka pasal diri empu ngagai Iya.

¹⁴Nya alai, laban kitai bisi Imam Besai ti Pemadu Tinggi, ke udah pulai ke serega, iya nya Jesus, ti Anak Allah Taala, aram kitai bepegai teguh ba pengarap kitai.

¹⁵Laban Imam Besai kitai ukai enda nemu sinu ati ke pengelemi kitai. Iya udah diuji ngena semua macham chara baka kitai empu, tang Iya enda bedosa.

¹⁶Nya alai, aram kitai mansang enggau ati ti kempang ngagai kerusi diraja Allah Taala ti kasih, ngambika kitai ulih nerima pengasih lalu nemu berekat, kena nulung kitai lebuh kitai begunaka iya.