Read Iban Hebrew 6 Bible Online

Hebrew 6 - Iban bible

Hebrew 6

¹Nya alai, aram kitai ninggalka pun pelajar pasal Kristus, lalu mansang ngagai ajar ke orang ti besai tuai, lalu enda agi ibuh bejakuka pasal nesal ati ari kereja ti ngujung ngagai pemati,

²ajar pasal pemaptisa, [6] pasal ngengkahka jari atas orang, pasal pengangkat ari mati, enggau pasal ukum ti meruan belama iya.

³Lalu kitai deka ngereja nya, enti Allah Taala ngemendar.

⁴Laban orang ke udah ngelengkaka pengarap enda ulih dibai nesal ati baru, laban sida udah meda penampak Allah Taala, udah ngasaika pemeri ari serega, lalu udah dipenuhka enggau Roh Kudus,

⁵udah ngasaika pemadas jaku Allah Taala, lalu udah ngasaika kuasa dunya ti deka datai,

⁶lalu udah nya sida ngelengkaka pengarap, laban lebuh sida ngereja nya sida ngeregang Anak Allah Taala baru, lalu ngeleseka Iya di mua orang mayuh.

⁷Tanah ti nginsap ai ujan ti selalu labuh ninggang iya, lalu ngasuh utai tumbuh ke guna orang ke nanam utai dia, nerima berekat ari Allah Taala.

⁸ Tang enti tanah nya mansutka duri enggau emperingat, tanah nya nadai guna, lalu iya deka disumpah. Ke pengujung iya, iya deka ditunu.

⁹Tang taja pen kami bejaku munyi tu, menyadi, tang ba pasal kita, kami nemu kita deka bulih utai ti manah agi, utai ti nyempulang pengelepas kita.

¹⁰Laban Allah Taala ukai enda lurus. Iya deka mengkang ingatka pengawa ti udah dikereja kita, enggau pengerindu ti dipandangka kita lebuh kita bekereja nulung nembiak Tuhan, baka ti agi dikereja kita diatu.

¹¹Kami dekaka genap iku kita mengkang rajin datai ke ujung ngambika kita ulih nerima utai ti disadang kita.

¹²Kami enggai ke kita ngelusu, tang dekaka kita nunda teladan orang ke arap sereta liat ati, ngambika kita nerima utai ti udah disemaya Allah Taala.

¹³ Lebuh Allah Taala ngaga semaya enggau Abraham, Iya nadai orang ke besai agi ari Iya Empu alai Iya manggaika sumpah Iya. Nya alai Iya besumpah atas nama Iya Empu.

¹⁴ Ku Iya, “Aku tetap deka merekatka nuan lalu meri nuan mayuh peturun.”

¹⁵Nya alai lebuh Abraham udah nganti enggau ati ti liat, iya nerima utai ti udah disemaya Allah Taala.

¹⁶Mensia endang besumpah atas nama utai ti besai agi ari sida empu, lalu semua kelikuh ditelesai ngena sumpah.

¹⁷Baka nya mega, lebuh Allah Taala deka ngayanka enggau terang agi ngagai orang ke deka nerima semaya, pasal juluk ati Iya ti enda berubah, Iya netapka semaya nya ngena sumpah.

¹⁸Ulih jaku sumpah enggau jaku semaya ti enda ulih diubah nya, Allah Taala nunjukka Diri enda bula. Nya alai kitai ke udah belindung ba Allah Taala balat agi diperansang bepegai ba pengadang ti di mua kitai.

¹⁹ Pengadang kitai nya nyadika sauh ti tegap ke semengat kitai. Ulih pengadang nya kitai ngarapka diri deka tama ngagai Endur ti Pemadu Kudus ti ari belakang tirai,

²⁰ alai Jesus ke udah dulu tama ngarika kitai, lebuh Iya udah nyadi Imam Besai belama iya, murihka Melkisedek.[7]