Read Iban Hebrew 8 Bible Online

Hebrew 8 - Iban bible

Hebrew 8

¹ Batang penemu ti disebut kami nya baka tu: kitai bisi Imam Besai ti baka nya, ke duduk muak ari kanan kerusi diraja Allah Taala ti Pemadu Tinggi di serega.

²Iya bekereja dalam langkau sembiang, iya nya, dalam langkau kain ti bendar, ti didirika Tuhan, ukai didirika mensia.

³Genap iku imam besai endang diletak ngenjuk pemeri enggau piring; nya alai, Imam Besai kitai tu pen enda tau enda mega bisi utai diberi.

⁴Enti sema Iya di dunya tu, Iya tetap enda nyadi imam, laban kitai endang bisi imam, ke ngenjuk pemeri nitihka Adat.

⁵ Sida nyembah dalam langkau kain ti semina gambar enggau ayuk Langkau Kain ti di serega. Laban lebuh Moses baru deka nirika langkau kain, Allah Taala bejaku munyi tu ngagai iya, “Nuan enda tau enda ngaga semua utai nitihka pelan ti udah ditunjukka ke nuan ba bukit nya.”

⁶Tang diatu, Jesus udah diberi pengawa ti lebih badas agi. Iya nyadi pengari ke sempekat ti lebih agi bemulia, ti beduduk ba semaya ti badas agi.

⁷Laban enti sempekat ti keterubah nya udah chukup badas, kitai tentu enda ibuh begunaka sempekat ti kedua.

⁸ Tang Allah Taala besalahka sempekat ti keterubah lebuh Iya nyebut, “Maya deka datai, ku Tuhan bejaku, alai Aku deka ngaga sempekat ti baru enggau orang Israel, sereta enggau orang Judah,

⁹ti enda baka sempekat ti digaga Aku enggau aki ini sida lebuh Aku megai jari sida lalu nguluka sida pansut ari menua Ejip. Laban sida enda tetap ati ngagai sempekat Aku, nya alai Aku enggai ibuhka sida, ku Tuhan bejaku.

¹⁰Tu sempekat ti deka digaga Aku enggau orang Israel jemah ila, ku Tuhan bejaku: Aku deka nyimpan Adat Aku dalam runding sida lalu nuliska Adat nya ba ati sida, lalu Aku deka nyadi Allah Taala sida, lalu sida deka nyadi nembiak Aku.

¹¹Sida enda ibuh ngajar pangan diri tauka nyebut ngagai pangan diri, ‘Kelala meh Tuhan.’ Laban semua sida deka ngelala Aku, kenyau ari sida ke pemadu mit nyentuk ngagai sida ke pemadu besai.

¹²Laban Aku deka ngampun penyalah sida lalu enda agi ngingatka dosa sida.”

¹³Lebuh Allah Taala bejakuka sempekat ti baru, Iya nunjukka sempekat ti keterubah nadai agi diguna, luya lalu deka jampat lesap.