Read Iban Hebrew 9 Bible Online

Hebrew 9 - Iban bible

Hebrew 9

¹ Indah sempekat ti keterubah deh ngundan atur kena besembah, lalu bisi langkau sembiang.

² Laban sebuah langkau kain udah disediaka. Iya ti di luar nya alai nyimpan penuduk lampu enggau mija enggau roti Allah Taala. Endur tu dikumbai Endur ti Kudus.

³ Ari belakang tirai ti kedua bisi siti langkau kain ti dikumbai Endur ti Pemadu Kudus.

⁴ Dalam Endur ti Pemadu Kudus nya bisi alta emas alai nunu menyan, enggau Peti Lampang Batu Adat ti disampak enggau emas. Peti nya ngundan kebuk emas alai nyimpan mana, tungkat Aron ti bekantuk, enggau dua iti lampang batu ti alai sempekat ditulis.

⁵ Ari atas Peti nya bisi dua iku melikat cherub, nandaka mulia Allah Taala, ngelindung endur alai dosa diampun. Tang kitai enda ulih berandauka semua utai tu enggau silik diatu.

⁶ Lebuh semua utai nya udah disediaka magang, sida imam tama tiap hari ngagai langkau kain ti di luar, ngereja pengawa sida,

⁷ tang semina imam besai aja tau tama ngagai langkau kain ti kedua, tang semina sekali aja dalam setaun, mai darah ti dienjuk iya ngagai Allah Taala ke dosa iya empu, enggau ke dosa orang mayuh, dosa ti dikereja sida enggau enda sengaja.

⁸Nya chara Roh Kudus nunjukka jalai ngagai Endur ti Pemadu Kudus enda dibuka seagi-agi langkau kain ti di luar nya mengkang bediri.

⁹Tu ngambarka maya ti diatu, alai pemeri enggau piring ti dienjuk enda ulih meresi ati orang ke nyembah Allah Taala,

¹⁰laban pengawa nya semina pasal pemakai enggau utai ti diirup aja, atur kena nuchi tubuh ti dipejalaika nyentuk ngagai maya Allah Taala ngaga atur ti baru.

¹¹Lebuh Kristus datai nyadi Imam Besai ke utai ti badas, ti endang udah bisi ditu diatu,[11] Iya tama nengah langkau sembiang ti besai sereta badas agi ti ukai digaga mensia, reti nya, ukai digaga ari utai ti udah digaga Iya Empu.

¹²Iya tama sekali aja ke belama-lama iya ngagai Endur ti Kudus, ukai ngena darah kambin tauka darah sapi, tang ngena darah Iya Empu, lalu bulih pengelepas ti meruan belama iya.

¹³ Laban enti darah kambin enggau darah sapi enggau amau [12]sapi ti dikerabuka ngagai orang ke enda tuchi, ulih nuchi sida ngambika sida nyadi beresi,

¹⁴tentu balat agi ga darah Kristus, ke udah nyerahka Diri ulih Roh Kudus nyadika piring ti nadai penimpang ngagai Allah Taala, deka nuchi ati kitai ari pengawa ti jai ti ngujung ngagai pemati, ngambika kitai ulih betuaika[13] Allah Taala ti idup.

¹⁵Nya kebuah Kristus nyadi pengari ke sempekat ti baru, ngambika orang ke dikangauka Allah Taala, ulih nerima pesaka ti meruan belama iya, ti udah disemaya Allah Taala, laban ulih pemati Iya, Iya nebus orang ari penyalah ti dikereja sida di baruh sempekat[14] ti keterubah.

¹⁶Ba pasal will, [15] pemati orang ke ngaga will nya enda tau enda ditentuka dulu.

¹⁷Laban will[16] nya semina tau diguna lebuh orang ke bempu will nya udah mati. Atur dalam will nya enda tau dipejalaika enti orang ke ngaga will nya agi idup.

¹⁸Indah sempekat ti keterubah deh enda tau enda dipejalaika ngena darah.

¹⁹ Laban lebuh Moses udah madahka semua pesan dalam Bup Adat ngagai semua orang Israel, iya ngambi darah sapi enggau darah kambin, ai, bulu bedus ti ungu, enggau pating isop, lalu mechikka utai nya ngagai Bup Adat, enggau ngagai semua orang mayuh,

²⁰lalu bejaku, “Tu darah sempekat ti diasuh Allah Taala titihka kita.”

²¹ Moses mega mechikka darah nya ngagai langkau sembiang, enggau ngagai semua perengka ti dikena sida nyembah Allah Taala.

²² Iya ti bendar, nitihka Adat, nyauka semua utai dituchi ngena darah, lalu enti nadai genselan darah, dosa enda diampun.

²³Nya kebuah utai ti ngambarka utai serega enda tau enda dituchi ngena genselan nya, tang utai serega empu begunaka piring ti badas agi ari nya.

²⁴Laban Kristus ukai tama ngagai Endur ti Kudus ti digaga jari mensia, ti semina ngambarka utai serega, tang Iya tama ngagai serega empu, lalu pegari ngarika kitai di mua Allah Taala.

²⁵Lalu Iya pen enda mega suah nyerahka Diri baka imam besai ke tama ngagai Endur ti Kudus tiap taun mai darah ti ukai darah Iya empu,

²⁶laban enti Iya suah tama kia, Iya tentu enda tau enda suah natka Diri merinsa kenyau ari penumbuh dunya. Tang diatu, Iya udah ngayanka Diri sekali aja ba pengujung dunya, nyerahka Diri Empu nyadika piring kena muai dosa.

²⁷Genap iku mensia enda tau enda mati sekali aja, lalu udah nya diakim.

²⁸ Baka nya mega Kristus. Lebuh Iya udah diserahka sekali aja ngambika Iya muai dosa orang mayuh, Iya deka pegari kedua kali, ukai muai dosa, tang deka nyelamatka orang ke nganti Iya.