Read Iban James 1 Bible Online

James 1 - Iban bible

James 1

¹ Surat James, ulun[1] Allah Taala enggau ulun[2] Tuhan Jesus Kristus: Ngagai dua belas raban bansa[3] ke diau ngachir di serata dunya.

² Menyadi, lebuh kita dituntung mayuh macham penguji, kita patut gaga ati,

³laban kita nemu, lebuh pengarap kita diuji, iya ngadaka ati ti tan.

⁴Lalu awakka ati ti tan nya nembuka pengawa iya, ngambika kita nyadi orang ke besai tuai sereta nyadi pemadu badas, nadai kurang utai.

⁵ Enti kita nadai penemu-dalam, pinta ngagai Allah Taala ke meri enggau gerah mudah sereta enda mansik penyalah, lalu utai nya deka diberi ngagai kita.

⁶Tang pinta ngena pengarap, enggau ati ti enda kakang, laban orang ke kakang ati nya baka gelumbang ti di tasik, ti dipuput lalu dikebuka ribut.

⁷Orang nya enda tau ngarapka diri deka nerima sebarang utai ari Tuhan.

⁸laban iya ati dua ati tiga, enda tetap ati dalam semua utai ti dikereja iya.

⁹Awakka menyadi[4] ke baruh pendiau temegahka diri ke diberi Allah Taala pangkat ti tinggi,

¹⁰ lalu awakka orang ke kaya temegahka diri ke baruh pendiau, laban orang ke kaya deka lesap baka bungai rumput.

¹¹Laban mata panas niki, hari lalu angat, lalu ngelayuka rumput. Bungai rumput nya labuh, lalu pemajik iya nadai agi. Baka nya meh orang ke kaya deka lesap lebuh sida benung ngereja pengawa sida.

¹²Beberekat meh orang ke tan natka penguji, laban lebuh iya tan diuji, iya deka nerima makota pengidup ti udah disemaya Tuhan[5] ke orang ke rinduka Iya.

¹³ Orang ke kena laban penguji, enda tau nyebut, “Aku diuji Allah Taala,” laban Allah Taala enda ulih diuji penyai, lalu Iya Empu enda nguji orang.

¹⁴Tang kitai diuji pengingin kitai empu, ti ngumpan lalu manjuk kitai;

¹⁵udah nya, lebuh pengingin nya udah ngandung, iya ngadaka dosa, lalu dosa, lebuh iya udah chukup tuai, ngadaka pemati.

¹⁶Menyadi ke dikerinduka aku, anang nejuka diri kena tipu.

¹⁷Semua pemeri ti menyana, ti pemadu badas endang datai ari atas magang, nurun ari Apai penampak ke enda berubah, ke enda mindah kin kitu baka ayuk.

¹⁸Ari peneka Iya Empu Iya udah ngadaka kitai, ulih jaku pemendar, ngambika kitai nyadi lumur satu ari semua utai ti idup ti digaga Iya.

¹⁹ Kita, menyadi ke dikerinduka aku, enda tau enda nemu tu: genap iku orang enda tau enda jampat mending, lubah mansutka jaku, lubah ringat,

²⁰laban pengeringat kita enda ulih mansutka pengelurus ti dikedekaka Allah Taala.

²¹Nya alai buai semua ulah ti kamah enggau semua penyai ti balat mayuh ba kita, lalu terima enggau ati ti baruh jaku ti ditanam, ti bisi kuasa nyelamatka semengat kita.

²²Tang anang semina mendingka jaku nya, lalu nipu diri empu. Kereja utai ti diasuh jaku nya.

²³Laban enti orang semina mending lalu enda ngereja utai ti diasuh jaku nya, sida nya baka orang ke meda gamal diri empu ba cheremin;

²⁴laban sida meda gamal diri, lalu mupuk, lalu tekala nya enda ingatka gamal diri agi.

²⁵Tang orang ke merening ngagai adat ti pemadu badas, adat pengelepas, lalu majak ngasika adat nya, lalu ukai semina mending lalu udah nya enda ingatka adat nya agi, tang ngereja utai ti diasuh adat nya, orang nya deka diberekatka dalam semua utai ti dikereja iya.

²⁶Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.

²⁷Pengarap ti tuchi, ti bendar di mua Allah Taala ti Apai nya: ngintu orang ke patu balu, ke merinsa, sereta ngintu diri tuchi ari penyai dunya.