Read Iban James 2 Bible Online

James 2 - Iban bible

James 2

¹Menyadi, kati kita ke arapka Jesus Kristus Tuhan kitai ti bemulia enda bepilih mata?

²Enti sema siku orang ke ngena tinchin emas, enggau gari ti manah, datai ngagai gempuru kita, lalu siku orang ke seranta, ke ngena gari ti kamah mega datai,

³lalu kita ibuhka orang ke ngena gari ti manah nya, lalu bejaku ngagai iya, “Duduk ditu,” tang bejaku ngagai orang ke seranta nya, “Bediri din”, tauka “Duduk semak kaki aku,”[6]

⁴enda ke kita bepilih mata, lalu ngakim orang ngena runding ti jai?

⁵Pendingka tu, menyadi[7] ke dikerinduka aku! Kati Allah Taala nadai udah milih orang ke seranta di dunya tu nyadi orang ke kaya dalam pengarap, sereta bempu Perintah ti udah disemaya Iya ke orang ke rinduka Iya?

⁶Tang kita udah ngeleseka orang ke seranta! Ukai enda orang ke kaya ke nekanka pengidup kita? Ukai enda orang ke kaya ke ngirit kita ngagai kot?

⁷Ukai enda orang ke kaya ke bejaku busung ngelaban nama ti badas ti udah diberi ngagai kita?

⁸ Kita ngereja utai ti manah enti kita ngasika Adat Perintah Allah Taala ti ditulis dalam Bup Kudus, “Rinduka pangan diri baka kita ke rinduka diri empu.”

⁹Tang enti kita bepilih mata, kita bedosa, lalu kita deka diukum Adat laban kita ngelanggar Adat.

¹⁰Laban barang sapa nitihka Adat, tang ngelanggar siti ari Adat nya, udah ngelanggar semua Adat.

¹¹ Laban Iya ke nyebut, “Anang butang,” mega nyebut, “Anang munuh orang.” Laban enti kita enda butang, tang munuh orang, kita udah ngelanggar Adat.

¹²Nya alai, bejaku lalu kereja utai baka orang ke deka diukum Adat ti ngelepaska kitai.

¹³Laban lebuh Allah Taala ngakim, Iya enda ngayanka pengasih ngagai orang ke enda ngayanka pengasih ngagai orang bukai. Pengasih lebih agi bekuasa ari ukum.

¹⁴Nama penguntung kita, menyadi, enti kita ngumbai diri bisi pengarap, tang pengarap nya nadai ngereja utai? Kati pengarap ti baka nya ulih nyelamatka kita?

¹⁵Enti sema menyadi lelaki tauka menyadi indu kita begunaka gari[8] lalu nadai pemakai,

¹⁶lalu kita nyebut ngagai iya, “Mupuk meh nuan enggau selamat. Awakka nuan enda chelap, sereta bisi utai diempa,” tang kita enda meri iya utai ti dipeguna iya, nama guna nya?

¹⁷Baka nya mega pengarap; pengarap mati enti iya nadai pengawa.

¹⁸Tang sekeda orang deka nyebut, “Nuan bisi pengarap; aku bisi pengawa.” Pandangka ngagai aku pengarap nuan ti nadai pengawa, lalu aku deka mandangka ngagai nuan pengarap aku ngena pengawa ti dikereja aku.

¹⁹Kita arapka Allah Taala endang siku aja. Manah! Indah antu deh arapka nya, lalu getar-getar takut.

²⁰Kita tu amat beli. Kati kita ngasuh orang nunjukka ngagai kita, pengarap ti nadai pengawa nya pengarap ti nadai guna?

²¹ Kati aki kitai Abraham enda dikumbai lurus ketegal pengawa ti dikereja iya, lebuh iya nyerahka anak iya, Isak, ba alta?

²²Nya alai, pengarap diayanka ulih pengawa, lalu pengarap nyadi chukup menyana ulih pengawa.

²³ Tu ngamatka jaku ti disebut dalam Bup Kudus, “Abraham arapka Allah Taala, lalu ketegal nya Allah Taala ngumbai iya lurus,”[9] lalu iya dikumbai pangan Allah Taala.

²⁴Nya alai, orang digaga lurus [10] ulih pengawa, lalu ukai semina ulih pengarap aja.

²⁵ Baka nya mega indu sundal ke benama Rahap. Iya digaga lurus ulih pengawa ti dikereja iya, lebuh iya nyambut pematau orang Israel, lalu ngasuh seduai iya mupuk nengah jalai bukai.

²⁶Baka tubuh ti mati enti iya nadai roh, baka nya mega pengarap; iya mati enti iya nadai pengawa.