Read Iban James 5 Bible Online

James 5 - Iban bible

James 5

¹Dingaka aku, kita ke kaya. Nyabak duie-duie meh kita laban kita deka ditinggang pemerinsa.

² Pengaya kita udah buruk, lalu gari kita abis diempa indu gegat.

³ Perengka emas enggau pirak kita udah betegar, lalu tegar nya deka nyadika saksi kena ngelaban kita, lalu deka makai isi kita baka api. Kita udah nugungka pengaya ba[14] hari ti penudi.

⁴ Dinga kita! Gaji kuli ke bekereja ba umai kita ti enda dibayar kita, diatu ngangau, lalu sabak orang ke ngetau udah didinga Allah Taala, Tuhan ti Pemadu Bekuasa.

⁵Kita udah nyamai diau di dunya tu, ngelantangka diri. Kita udah nupi diri gemu nyendiaka diri disayat.

⁶ Kita udah ngukum lalu munuh orang ke lurus,[15] ke enda ngelaban kita.

⁷Nya alai, menyadi, kita enda tau enda liat ati nyentuk ngagai maya Tuhan datai. Peda kita pengeliat ati orang bumai nganti umai sida mansutka asil. Sida liat ati nganti hari ujan lebuh musin ruruh daun enggau lebuh musin bungai.

⁸Kita mega enda tau enda liat ati. Keringka ati kita, laban Tuhan nyau semak.

⁹Menyadi, anang mut-mut ngelaban pangan diri, enggai ke Allah Taala ngakim kita. Hakim diatu benung bediri ba mua pintu.

¹⁰Awakka kita, menyadi, beteladan liat ati ba sida nabi ke bejaku dalam nama Tuhan.

¹¹ Kitai ngumbai sida ke ngayanka ati ti tan nya beberekat. Kita udah ninga pasal Jop ke tan ati, lalu kita udah meda juluk ati Tuhan, pasal Tuhan ke penuh laban penyiru enggau pengasih.

¹² Lebih ari semua, menyadi, anang besumpah, nemuka atas nama serega tauka nama dunya, tauka besumpah ngena jalai bukai, tang semina sebut aja “Au” lebuh kita deka nyebut “Au”, tauka “Enggai” enti kita deka nyebut “Enggai,” ngambika kita enda kena ukum.

¹³Kati bala kita bisi merinsa? Iya patut besampi. Kati bala kita bisi lantang ati? Iya patut belagu pantun puji.

¹⁴ Kati bala kita bisi sakit? Iya patut mesanka bala tuai eklisia, minta sida besampika iya, nata iya ngena minyak dalam nama Tuhan.

¹⁵Sampi ti disebut ngena pengarap deka ngeraika orang ke sakit. Tuhan deka ngeraika sida, lalu enti sida udah bedosa, dosa sida deka diampun.

¹⁶ Nya alai, kita patut ngaku dosa kita ngagai pangan diri, lalu besampika pangan diri, ngambika kita digeraika. Sampi orang ke lurus endang bekuasa sereta bisa.

¹⁷ Elijah endang mensia baka kitai. Iya bebendar besampi minta hari enda ujan, lalu hari enda ujan di menua nya tiga taun setengah.

¹⁸ Udah nya iya besampi baru; hari lalu ujan, lalu tanah mansutka asil.

¹⁹Menyadi, enti bala kita bisi limpang ari pemendar, lalu siku ari bala kita mai iya pulai baru,

²⁰ awakka kita nemu tu: barang sapa mai orang ke bedosa pulai baru ari jalai ti salah, deka nyelamatka semengat orang nya ari pemati, lalu deka ngasuh mayuh dosa diampun.