Read Iban 1 Peter 2 Bible Online

1 Peter 2 - Iban bible

1 Peter 2

¹Nya alai, buai semua penyai, semua penipu, semua pemula, semua ati ti kepapas, semua tebiat bejakuka orang.

²Baka anak mit ke baru ada, seruran auska ai tusu Roh, ngambika ulih nya kita tau mansang dalam pengelepas kita,

³ enti kita amat udah ngasaika pemadas Tuhan.

⁴ Datai meh kita ngagai Iya, laban Iya batu ti idup, ti ditulak mensia, tang dipilih Allah Taala nyadika batu ti berega.

⁵Lalu baka batu ti idup, awakka kita ngelakka diri digaga nyadi rumah Roh Kudus, nyadi bala imam ti kudus ke ngenjuk piring ti dikerinduka Allah Taala, ulih Jesus Kristus.

⁶ Laban Bup Kudus nyebut, “Aku ngengkahka sigi batu di Sion, batu pemun, batu ti dipilih sereta berega, lalu barang sapa arapka Iya, sigi enda malu.”

⁷ Nya alai, ba kita ke arap, batu nya endang amat berega. Tang ba orang ke enda arap, “Batu ti ditulak tukang rumah, udah nyadi batu ti pemadu beguna.”

⁸ Siti agi ayat dalam Bup Kudus nyebut, “Batu ti ngasuh sida tesangkut, batu ti ngasuh sida rebah.” Sida tesangkut laban sida enda ngasika jaku Allah Taala. Tu endang udah diletak Allah Taala ke sida.

⁹ Tang kita tu bansa ti dipilih, bala imam diraja, bansa ti kudus, nembiak Allah Taala, ngambika kita madahka pasal pemanah pengawa Allah Taala ke udah ngangauka kita pansut ari pemetang ngagai penampak Iya ti badas.

¹⁰ Dulu suba kita ukai nembiak Allah Taala, tang diatu kita nembiak Iya. Dulu suba kita nadai nerima pengasih, tang diatu kita udah nerima pengasih.

¹¹Menyadi ke dikerinduka aku, aku bejaku ngagai kita ke nyadi orang kampar, ke tasah di dunya tu: anang nurutka pengingin tubuh ti seruran beperang ngelaban semengat kita.

¹²Diau menyana begulai enggau orang bansa bukai, ngambika, taja pen sida ngumbai kita ngereja penyai, sida tau meda pemadas pengawa kita lalu muji Allah Taala lebuh Iya datai ngakim.[5]

¹³Nunduk ngagai semua institusi mensia, ketegal Tuhan, ngagai Raja Besai, ke nyadi tuai megai menua,

¹⁴tauka ngagai gabenor, ke diasuh iya ngukum orang ke ngereja penyalah lalu muji orang ke ngereja utai ti ngena.

¹⁵Laban Allah Taala dekaka kita ngereja utai ti badas, laban lebuh kita ngereja nya kita nutup mulut orang ke nadai nemu utai sereta beli.

¹⁶Diau baka orang ke udah dilepaska, tang anang nguna pengelepas nya kena ngelalaika penyai, tang diau nyadi ulun Allah Taala.

¹⁷Bebasaka semua orang. Rinduka orang ke arap. Nangika Allah Taala. Bebasaka Raja Besai.[6]

¹⁸Kita ti ulun, nunduk ngagai tuan kita enggau pengabis basa, ukai semina ngagai sida ke nelap sereta nemu siru enggau kita, tang mega ngagai sida ke kasar enggau kita.

¹⁹Laban Allah Taala deka merekatka kita ketegal nya, enti kita liat ati natka pemedis ti ukai patut ditatka kita ketegal kita nemu peneka Iya.

²⁰Laban, nama penguntung kita, enti kita liat ati natka diri dipalu ketegal penyalah kita? Tang enti kita natka diri kena perinsa ketegal kita ngereja utai ti ngena, Allah Taala deka merekatka kita.

²¹Laban kita udah dikangauka Allah Taala ngagai pemerinsa nya, laban Kristus udah mega merinsa ngarika kita, ninggalka siti teladan ke kita, ngambika kita nitihka singkang Iya.

²² Iya nadai kala bedosa. Lalu Iya nadai kala nipu orang.

²³ Lebuh Iya dikeduan, Iya enda malas. Lebuh Iya diperinsa, Iya enda ngemba orang, tang Iya nyerahka Diri ngagai Allah Taala ke ngakim ngena pengelurus.

²⁴ Iya udah mai dosa kitai dalam tubuh Iya ba[7] kayu regang, ngambika kitai dilepaska ari dosa, lalu idup ke pengelurus. Ulih bakal Iya, kita digeraika.

²⁵Laban kita udah tesat baka bedus, tang diatu kita udah dibai pulai baru ngagai Pengibun enggau Penyaga semengat kita.