Read Iban 1 Peter 4 Bible Online

1 Peter 4 - Iban bible

1 Peter 4

¹Nya alai laban Kristus udah natka tubuh Diri diperinsa, [10] runding kita pen enda tau enda mega sebaka enggau runding Kristus, laban barang sapa udah natka diri diperinsa batang tubuh, enda agi bedosa,

²ngambika iya, kenyau ari diatu nyentuk ngagai umur iya abis, enda agi idup nitihka pengingin mensia, tang nitihka peneka Allah Taala.

³Udah chukup meh kita dulu suba ngereja utai baka ti dikerinduka orang bansa bukai: kereja ti jai, ti kamah, mabuk, berami enda beiga-iga, berami ngirup, enggau besembahka engkeramba.

⁴Diatu sida tekenyit ati meda kita enda agi enggau sida ngereja utai nya, lalu sida bejai kita.

⁵Tang sida enda tau enda madahka pasal diri empu ngagai Iya ke sedia deka ngakim orang ke idup enggau orang ke mati.

⁶Laban nya meh kebuah Berita Manah udah ditusui ngagai orang ke mati,[11] ngambika, taja pen sida udah diakim lebuh sida agi idup baka semua orang bukai ketegal semua utai ti udah dikereja sida, sida tau idup dalam roh baka [12] Allah Taala.

⁷Pengujung semua utai nyau semak. Nya alai diau menyana lalu disiplin diri empu, ngambika kita ulih besampi.

⁸ Iya ke lebih agi, seruran rinduka pangan diri, laban pengerindu muai mayuh macham dosa.

⁹Sambut pangan diri ngagai rumah kita, tang anang mut-mut ngereja nya.

¹⁰Laban kita udah diasuh Allah Taala ngibun pemeri ti diberi Iya, kena meh pemeri nya nulung pangan diri.

¹¹Lebuh kita bejaku, kita patut bejaku baka ke nyebut jaku Allah Taala. Lebuh kita mela orang, kita enda tau enda ngereja nya ngena pengering ti diberi Allah Taala, ngambika Allah Taala dipuji dalam semua utai, ulih Jesus Kristus. Awakka Iya bempu mulia enggau kuasa belama-lama iya. Amin.

¹²Pangan ke dikerinduka aku, anang tekenyit ati ke pemerinsa ti balat ninggang kita, kena nguji kita. Utai ti nyadi ba kita nya baka ke nyelai.

¹³Tang awakka kita rami gaga ati laban kita sama enggau natka pemerinsa Kristus, ngambika kita tau mega manjung gaga ati sereta lantang lebuh mulia Iya dipandangka.

¹⁴ Enti kita dikeleseka orang ketegal nama Kristus, kita bulih berekat, laban Roh mulia, [13] enggau Roh Allah Taala bisi enggau kita.

¹⁵Tang enti kita kena perinsa, awakka kita ukai diperinsa ketegal kita udah munuh orang, tauka udah ngenchuri, tauka udah ngereja penyalah, tauka udah tuyu ngachau orang.

¹⁶Tang enti kita kena perinsa ketegal kita nya orang Kristian, anang malu ke nya, tang beri puji ngagai Allah Taala laban kita nyandang nama Kristus.

¹⁷Laban maya udah datai alai raban ruang bilik Allah Taala Empu deka belabuh diakim. Enti pengawa ngakim nya berengkah ba kitai, namaka penyadi orang ke enda ngasika Berita Manah Allah Taala?

¹⁸ Lalu “Enti orang ke lurus nyau deka enda ulih diselamatka, namaka penyadi orang ke bedosa, enggau orang ke enda arapka Allah Taala?”

¹⁹Nya alai, awakka orang ke kena perinsa ari peneka Allah Taala, nyerahka diri ngagai Allah Taala ke tetap ati, lalu awakka sida majak ngereja kereja ti badas.