Read Iban 1 Peter 5 Bible Online

1 Peter 5 - Iban bible

1 Peter 5

¹Nya alai aku ke tuai eklisia, lalu udah meda pemerinsa Kristus, lalu deka sama enggau bempu mulia ti deka dipandangka, aku meransang kita ke nyadi tuai:

² ibun bala nembiak Allah Taala ke diasuh ibun kita, ukai ari pejal, tang enggau ati ti ransing, baka ti dikedekkaka Allah Taala kereja kita, lalu ukai laban kita minta gaji.

³Anang ngaga diri nyadi tuan atas orang ke diibun kita, tang nyadi teladan ke sida.

⁴Lalu lebuh Tuai Pengibun pegari, kita deka nerima makota mulia ti enda nemu abis.

⁵ Baka nya mega kita ke agi biak; nunduk ngagai bala tuai kita. Lalu semua kita enda tau enda baruh ati lebuh kita begulai enggau pangan diri, laban “Allah Taala ngelaban orang ke sumbung, tang ngayanka pengasih ngagai orang ke baruh ati.”

⁶ Nya alai, diau enggau ati ti baruh, di baruh jari Allah Taala ti bekuasa, ngambika Iya ngangkatka kita tinggi ba maya ti patut.

⁷ Serahka semua pengirau kita ngagai Iya, laban Iya ngibun kita.

⁸Disiplin diri empu sereta bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya.

⁹Laban meh Sitan, bediri tegap dalam pengarap, laban kita nemu, semua orang bukai ke arap di serata dunya tu sama natka pemerinsa nya baka kita.

¹⁰Lalu lebuh kita udah natka pemerinsa nya enda lama, Allah Taala ti pun semua pengasih, ti udah ngangauka kita ngagai mulia Iya ti meruan belama iya dalam Kristus, deka ngaga kita nyadi baru, ngering sereta negapka kita.

¹¹Awakka Iya bempu kuasa belama-lama iya! Amin.

¹² Silas, menyadi aku ke tetap ati, udah nulung aku nulis surat ti pandak tu ngagai kita kena aku meransang kita sereta madahka ngagai kita pengasih Allah Taala ti bendar. Bediri tegap dalam pengasih nya.

¹³ Menyadi kita ke di Babilon,[14] ke udah dipilih baka kita empu, ngirumka tabi basa ngagai kita, lalu baka nya mega anak aku Mark.

¹⁴Beri tabi basa ngagai pangan diri ngena pengerindu orang Kristian. Awakka pemaik meruan enggau semua kita ke nembiak Kristus. [15]