Read Iban 2 Peter 2 Bible Online

2 Peter 2 - Iban bible

2 Peter 2

¹ Tang nabi ti pelesu udah mega ngayanka diri ba bala orang mayuh, lalu pengajar ti pelesu deka mega pegari ba bala kita. Sida deka belalai mai ajar ti ngerusak. Sida deka besangkalka Jesus Kristus ke udah nebus sida -- minta diri ngenyit dirusak.

²Tang taja pia, mayuh orang deka nitihka ulah sida ti kamah, lalu ketegal sida,[5] jalai pemendar deka dikeleseka.

³Lalu ketegal pengamu sida, sida deka ngambi ulih ba kita ngena jaku tipu. Ukum ti lama udah disebut ngelaban sida, sigi agi mengkang, lalu sida deka dirusak!

⁴Laban enti Allah Taala enda ngalau sida melikat lebuh sida bedosa, tang muai sida ngagai neraka,[6] lalu nanchang sida ngena rantai ba endur ti pemadu petang [7] nyentuk ngagai Hari Pechara;

⁵ lalu enti Iya [8] enda ngalau dunya ti dulu kelia, taja pen Iya nyelamatka Noah, ke ngajar pasal pengelurus, sama enggau tujuh iku orang bukai, lebuh Iya [9] ngampuhka dunya orang ke bedosa ngena ai bah;

⁶ lalu enti Iya ngeretungka nengeri Sodom enggau Gomorah abis lengis, kena Iya [10] ngajar orang ke enda nangika Allah Taala;

⁷ lalu enti Iya nyelamatka Lot, orang ke lurus, ke balat tusah ati ke pengamah ulah orang ke jai,

⁸(laban orang ke lurus nya diau begulai enggau sida tiap hari, lalu balat tusah ati ketegal utai ti enda beradat ti dipeda enggau didinga iya),

⁹Tuhan tentu nemu nyelamatka orang ke nangika Allah Taala, ari penguji ti nuntung sida, lalu ngetanka orang ke enda lurus dalam ukum nyentuk ngagai Hari Pechara,

¹⁰kelebih agi orang ke ngereja ulah ti kamah, sereta ngeleseka kuasa Allah Taala. Sida tu berani sereta sumbung, lalu enda takut ngeleseka utai ti bemulia, [11]

¹¹Indah sida melikat, taja pen sida lebih agi kering sereta lebih agi bekuasa ari sida,[12] deh enda besalah sida melikat [13] nya ngena jaku kelese di mua Tuhan.

¹²Tang sida pengajar ti pelesu tu baka jelu - enda nemu berunding, ada ngambika sida ditangkap lalu disayat. Sida ngeleseka utai ti enda ditemu sida reti, lalu sida deka mega dirusak baka jelu nya,

¹³natka ukum ketegal penyalah sida. Sida ngumbai diri tau ngelantangka diri ngemuaska pengingin tubuh diri lebuh siang hari. Sida nya orang ke jai, ke berami enda beiga-iga lebuh sida begulai makai enggau kita.

¹⁴Mata sida seruran jelik-jelik deka butang, enda nemu puas ati bedosa. Sida nipu orang ke enda nemu berunding. Ati sida udah dipatihka nyadi amu. Sida nya kena sumpah!

¹⁵ Sida udah limpang ari jalai ti rurus, lalu udah tesat niti jalai ti ditengah Balaam anak Beor, ke rindu ngulihka duit ngereja penyalah.

¹⁶ Tang iya dirara ketegal penyalah iya. Keledai ke bisu, bejaku ngagai iya ngena nyawa mensia, ngasuh nabi nya badu agi gila.

¹⁷Orang tu baka mata ai ti rangkai, baka ambun ti dipuputka kabut. Allah Taala udah nyendiaka siti endur ti pemadu petang ke sida.

¹⁸Laban sida bejaku sumbung sereta nadai reti, lalu ngena pengamah pengingin mensia nipu orang ke baru udah ngerarika diri ari bala orang ke diau dalam penyalah.

¹⁹Sida besemaya deka ngelepaska orang nya, tang sida empu agi mengkang nyadi ulun penyai, laban mensia endang nyadi ulun utai ti ngalahka sida.

²⁰Laban enti orang udah ngerarika diri ari pengamah dunya ulih penemu pasal Jesus Kristus ti Tuhan enggau Juruselamat kitai, lalu udah nya sida dipanjuk kuasa pengamah nya baru lalu alah, ba pengujung iya, pendiau orang nya deka jai agi ari ti keterubah.

²¹Manah agi enti sida tak terus nadai kala nemu jalai pengelurus, ari ke nemu jalai nya, lalu udah nya nikal ari pesan ti kudus ti udah diberi ngagai sida.

²² Utai nya udah nyadi ba sida nitihka jaku-dalam ti bendar: “Ukui pulai ngagai mutah iya empu” “Babi ti udah diberi mandi, pulai baru ngagai pelangkan iya.”