Read Iban 2 Peter 3 Bible Online

2 Peter 3 - Iban bible

2 Peter 3

¹Pangan ke dikerinduka aku, tu surat ti kedua ti ditulis aku ngagai kita. Dalam surat ti dua iti tu, aku udah ngasuh kita berunding, ngambika kita ngingatka

²jaku ti udah disebut bala nabi ti kudus dulu kelia, enggau pesan ti diberi Tuhan enggau Juruselamat, ngena bala sida rasul kita.

³ Tang kita enda tau enda dulu nemu tu: ba hari ti penudi, orang ke ngelese deka datai, ngelese sereta nurutka pengingin sida ti kamah,

⁴lalu bejaku, “Ni Tuhan kita ke besemaya deka datai? Kenyau ari aki ini kitai udah mati kelia, semua utai mengkang enda berubah baka lebuh penumbuh dunya!”

⁵ Sida endang sengaja enggai arapka langit udah digaga dulu kelia ulih jaku Allah Taala, lalu dunya ditempa ari ai, ulih ai,

⁶ lalu dunya nya udah mega diampuhka ulih ai lalu dirusak.

⁷Tang ulih jaku nya mega langit enggau dunya ti diatu mengkang digalau ngambika sida dirusak ngena api, digalau nyentuk ngagai Hari Pechara lebuh orang ke enda nangika Allah Taala diakim lalu dirusak.

⁸ Tang anang enda ingatka utai siti tu, menyadi: Ba Tuhan, sehari baka seribu taun, lalu seribu taun baka sehari.

⁹Tuhan ukai lubah ngamatka semaya Iya, munyi ku sekeda orang, tang Iya sabar enggau kita, laban Iya enggai nejuka indah siku kita dirusak, tang semua nesal ati.

¹⁰ Tang Hari Tuhan deka datai baka penchuri. Langit deka lesap enggau munyi ti inggar, lalu semua utai deka luluh magang laban api, lalu dunya enggau semua utai ti udah dikereja di dunya tu deka diayanka [14] magang.

¹¹Nya alai laban semua utai deka dirusak magang ngena chara nya, baka ni ku gaya kita patut idup? Kita patut diau kudus sereta nangika Allah Taala,

¹²nganti sereta minta Hari Allah Taala datai enggau jampat. Ba Hari nya, langit deka dirusak ngena api lalu semua utai deka luluh magang laban api nya.

¹³ Tang nitihka semaya Allah Taala, kitai nganti langit ti baru enggau dunya ti baru, endur alai pengelurus diau.

¹⁴Nya alai, menyadi, lebuh kita nganti semua utai nya, kita enda tau enda enggau naka ulih diau bebaik enggau Iya, nadai bepenyalah, nadai penimpang,

¹⁵lalu ngira pengeliat ati Tuhan nya peluang kena nyelamatka kita, munyi ti udah ditulis menyadi kitai Paul ngagai kita ngena penemu-dalam ti diberi Allah Taala[15] ngagai iya.

¹⁶Nya meh jalai iya nuliska pasal utai nya dalam semua surat iya. Sekeda utai ti disebut dalam surat iya mar diperatika, lalu orang ke nadai nemu utai sereta enda tetap dalam pengarap, nyarutka utai nya baka ti dikereja sida ngagai jaku bukai dalam Bup Kudus, ti ngujungka sida empu dirusak.

¹⁷Nya alai, menyadi, laban kita udah diberi jaku tangkan[16] tu, anang enda bejaga, enggai ke kita dibai orang ke enda beradat ngereja penyalah, lalu labuh ari penuduk kita ti likun.

¹⁸Tang mansang kita dalam pengasih enggau penemu pasal Jesus Kristus ti Tuhan enggau Juruselamat kitai. Beri meh mulia ngagai Iya[17] diatu enggau belama-lama iya! Amin.[18]