Read Iban 1 John 1 Bible Online

1 John 1 - Iban bible

1 John 1

¹ Kami madah ngagai kita pasal Jaku ti meri pengidup, ti endang udah bisi kenyau ari pun. Kami udah ninga Iya lalu mata kami empu udah meda Iya. Kami sigi amat udah meda Iya, lalu jari kami empu udah negu Iya.

² Pengidup nya udah dipandangka, lalu kami udah meda Iya, lalu besaksika pasal Iya, lalu madahka ngagai kita pengidup ti meruan belama iya, pengidup ti begulai enggau Apai, lalu udah dipandangka ngagai kami.

³Kami madahka ngagai kita utai ti udah dipeda enggau didinga kami ngambika kita mega bisi kaul enggau kami. Kami endang amat bisi kaul enggau Apai sereta enggau Anak Iya Jesus Kristus.

⁴ Kami nuliska utai tu ngambika ati kami [1] chukup gaga.

⁵ Tu pesan ti udah didinga kami ari Iya, lalu dipadahka kami ngagai kita, iya nya, Allah Taala nya penampak, lalu dalam Iya nadai pemetang.

⁶ Enti kitai ngumbai diri bisi kaul enggau Iya, tang agi diau dalam pemetang, kitai bula lalu ukai idup nitihka pemendar.[2]

⁷ Tang enti kitai diau dalam penampak, baka Iya ke diau dalam penampak, kitai bisi kaul enggau pangan diri, lalu darah Anak Iya, Jesus, nuchi kitai ari semua dosa.

⁸Enti kitai madahka diri nadai dosa, kitai nipu diri empu, lalu pemendar nadai dalam kitai.

⁹Enti kitai ngaku dosa kitai, Iya endang tau dikarapka sereta lurus, lalu Iya deka ngampun kitai ari dosa kitai, lalu nuchi kitai ari semua penyai.

¹⁰ Enti kitai madahka diri nadai dosa, kitai ngumbai Allah Taala bula, lalu jaku Iya nadai dalam kitai.