Read Iban 1 John 2 Bible Online

1 John 2 - Iban bible

1 John 2

¹ Anak, aku nuliska tu ngagai kita, ngambika kita enda bedosa. Tang enti orang ngereja dosa, kitai endang bisi siku Penyaup ke bejaku ngagai Apai ngarika kitai, iya nya Jesus Kristus ti lurus,

² ke nyadi piring kena muai dosa kitai, lalu ukai semina dosa kitai aja, tang mega dosa semua mensia.[3]

³ Enti kitai ngasika pesan Allah Taala, nya tanda kitai amat nemu[4] Iya.[5]

⁴ Barang sapa nyebut, “Aku nemu[6] Iya,”[7] tang enda ngasika pesan Iya, orang nya bula, lalu pemendar nadai dalam iya.

⁵ Tang barang sapa ngasika jaku Allah Taala, pengerindu Allah Taala amat digaga nyadi pemadu badas dalam orang nya. Baka tu ku jalai kitai nemu diri amat dalam Allah Taala:

⁶ barang sapa madahka diri meruan dalam Allah Taala patut idup baka Jesus Kristus.

⁷ Pangan ke dikerinduka aku, aku ukai nuliska pesan ti baru ngagai kita, tang pesan ti lama ti endang udah dikemisi kita kenyau ari pun. Pesan ti lama nya meh pesan ti udah didinga kita.

⁸ Tang taja pia, aku nulis ngagai kita pesan ti baru ti amat bisi dalam Kristus enggau dalam kita, laban pemetang nyau deka nadai agi, lalu penampak ti bendar udah belabuh manchar.

⁹Barang sapa ngumbai diri diau dalam penampak tang begedika menyadi [8]diri, agi diau dalam pemetang.

¹⁰ Barang sapa rinduka menyadi [9] diri, diau dalam penampak, lalu orang ke baka nya nadai ngembuan utai ti tau ngasuh bedosa.

¹¹Tang barang sapa begedika orang ke sama pengarap enggau iya,[10] agi mengkang dalam pemetang, agi idup nitihka jalai pemetang lalu enda nemu tunga pejalai diri, laban pemetang udah ngasuh iya buta.

¹²Aku nulis ngagai kita, anak, laban dosa kita udah diampun ketegal nama Kristus.

¹³ Aku nulis ngagai kita ke apai, laban kita ngelala Iya ke endang udah bisi kenyau ari pun. Aku nulis ngagai kita ke agi biak, laban kita udah ngalahka Sitan.[11]

¹⁴Aku nulis ngagai kita, anak, laban kita ngelala Apai. Aku nulis ngagai kita ke apai, laban kita ngelala Iya endang udah bisi kenyau ari pun. Aku nulis ngagai kita ke biak, laban kita kering, lalu Jaku Allah Taala meruan dalam kita, lalu kita udah ngalahka Sitan.[12]

¹⁵Anang angkunka dunya tauka utai dunya. Enti kita angkunka dunya, kita enda angkunka Apai.

¹⁶Laban semua utai di dunya tu -- utai ti dikinginka tubuh, utai ti dikinginka mata, temegahka pengaya -- ukai datai ari Apai, tang datai ari dunya.

¹⁷Lalu dunya enggau pengingin iya[13] deka lenyau, tang orang ke ngereja peneka Allah Taala deka idup belama iya.

¹⁸ Anak, tu meh pengujung dunya! Munyi ti udah didinga kita, Munsuh Kristus deka datai. Nya alai diatu mayuh Munsuh Kristus udah datai. Nya meh jalai kitai nemu pengujung dunya udah datai.

¹⁹Sida pansut ari bala kitai, tang sida ukai raban kitai, laban enti sida raban kitai, sida tentu agi meruan begulai enggau kitai. Tang lebuh sida pansut ari bala kitai, nya nyata nunjukka sida ukai raban kitai.

²⁰Tang kita udah ditata Iya ti Kudus,[14] lalu semua kita bisi penemu.[15]

²¹Aku nulis ngagai kita, ukai laban kita enda nemu pemendar, tang laban kita nemu pemendar, lalu kita nemu, nadai pemula kala datai ari pemendar.

²² Sapa orang ke bula? Orang ke bula nya orang ke ngumbai Jesus nya ukai Kristus.[16] Nya meh Munsuh Kristus, orang ke besangkalka Apai enggau Anak.

²³ Nadai orang ke besangkalka Anak, bisi Apai dalam iya; barang sapa ngaku Anak, bisi Apai dalam iya.

²⁴Awakka utai ti didinga kita kenyau ari pun, meruan dalam kita.[17] Enti utai ti didinga kita kenyau ari pun meruan dalam kita, kita deka meruan dalam Anak, enggau dalam Apai.

²⁵Tu utai ti udah disemaya Iya ngagai kitai [18]- pengidup ti meruan belama iya.

²⁶Aku nuliska tu ngagai kita pasal orang ke deka nipu kita.

²⁷ Tang ba pasal kita empu, Roh ti udah diterima kita ari Iya[19] meruan dalam kita. Nya alai kita enda begunaka orang ngajar kita, laban Roh Iya ngajar kita semua utai. Lalu ajar Iya endang amat, ukai utai ti bula. Nya alai, munyi ti udah diajar ngagai kita, awakka kita meruan dalam Iya.

²⁸ Nya alai, anak, meruan dalam Iya, ngambika lebuh Iya dipandangka, kitai deka kempang ati lalu enda malu bediri di mua Iya lebuh Iya datai.

²⁹ Enti kita nemu Kristus endang lurus, kita patut nemu, semua orang ke ngereja utai ti lurus,[20] endang diadaka Iya magang.