Read Iban 1 John 3 Bible Online

1 John 3 - Iban bible

1 John 3

¹ Peda kita pemesai pengerindu Apai ke kitai, datai ke kitai nyau dikumbai anak Allah Taala, laban kitai endang amat anak Iya. Kebuah dunya enda ngelala kitai nya laban dunya enda ngelala Iya.

²Menyadi ke dikerinduka aku, kitai diatu udah nyadi anak Allah Taala. Gaya kitai ti jemah ila apin dipandangka. Utai ti ditemu kitai nya, lebuh Iya dipandangka, kitai deka sebaka enggau Iya, laban kitai deka meda Iya mua mata.

³Lalu semua orang ke bisi pengadang tu ke Kristus, nuchi diri empu, baka Kristus Empu ke endang tuchi.

⁴Genap iku orang ke bedosa endang ngelanggar adat, laban reti dosa nya ngelanggar adat.

⁵ Kita nemu, Kristus pegari ngambika Iya muai dosa,[21] lalu Iya Empu endang nadai dosa dalam Iya.

⁶Semua orang ke meruan dalam Iya, enda agi majak bedosa. Semua orang ke majak bedosa nadai udah kala meda tauka ngelala Iya.

⁷Anak, anang nejuka orang nipu kita! Genap iku orang ke ngereja utai ti badas, endang amat lurus baka Kristus Empu.

⁸ Genap iku orang ke bedosa endang anak Sitan, laban Sitan endang udah bedosa kenyau ari pun. Kebuah Anak Allah Taala dipandangka nya ngambika Iya ngerusak pengawa Sitan.

⁹ Orang ke udah diadaka Allah Taala enda agi bedosa laban benih Allah Taala meruan dalam sida; sida enda ulih bedosa laban sida udah diadaka Allah Taala.

¹⁰Baka tu ku jalai kita ngelala sapa ke anak Allah Taala, enggau sapa ke anak Sitan: barang sapa enda diau lurus, ukai anak Allah Taala. Orang ke enda rinduka menyadi diri, ukai anak Allah Taala.

¹¹ Laban tu pesan ti udah didinga kita kenyau ari pun: rinduka pangan diri.

¹² Kitai enda tau baka Kain ke endang enggi[22] Sitan, lalu iya munuh menyadi iya Abel. Nama kebuah iya munuh Abel? Laban utai ti dikereja iya jai, lalu utai ti dikereja menyadi iya, lurus.

¹³ Anang tekenyit ati, menyadi, enti dunya begedika kita.

¹⁴ Kitai nemu diri udah meraka ari pemati ngagai pengidup, laban kitai rinduka pangan diri. Barang sapa enda rinduka pangan diri, mengkang dalam pemati.

¹⁵ Semua orang ke begedika pangan[23] diri endang pemunuh, lalu kita nemu, orang ke pemunuh nadai pengidup ti meruan belama iya dalam iya.

¹⁶ Baka tu ku jalai kitai ngelala pengerindu: Kristus udah nyerahka nyawa Diri ketegal kitai. Nya alai, kitai patut mega nyerahka nyawa diri ketegal pangan kitai!

¹⁷Enti orang ke kaya tepedaka pangan iya suntuk, tang enggai nulung iya, baka ni ku pengerindu Allah Taala bisi dalam iya?

¹⁸ Anak, aram kitai rinduka pangan diri, ukai ngena leka jaku tauka ngena utai ti disebut kitai, tang ngena pemendar enggau pengawa ti dikereja kitai.

¹⁹Nya meh jalai kitai nemu diri enggi pemendar, lalu kempang ati bediri di mua Iya

²⁰genap kali ati kitai besalahka kitai; laban Allah Taala besai agi ari ati kitai, lalu Iya nemu semua utai.

²¹ Menyadi ke dikesayauka aku, enti ati kitai enda besalahka kitai, kitai berani bediri di mua Allah Taala;

²²lalu nerima ari Iya sebarang utai ti dipinta kitai, laban kitai ngasika pesan Iya, lalu ngereja utai ti ngerinduka ati Iya.

²³ Lalu tu pesan Iya: arapka nama Anak Iya Jesus Kristus, lalu rinduka pangan diri, munyi ti udah diasuh Iya kereja kitai.

²⁴ Semua orang ke ngasika pesan Iya, meruan dalam Iya, lalu Iya meruan dalam sida. Lalu kitai nemu Iya meruan dalam kitai ulih Roh Kudus ke udah diberi Iya ngagai kitai.