Read Iban 1 John 5 Bible Online

1 John 5 - Iban bible

1 John 5

¹ Barang sapa arapka Jesus nya Kristus,[37] sigi anak Allah Taala, lalu barang sapa rinduka apai, rindu mega ke anak.

²Baka tu ku jalai kitai nemu diri rinduka bala anak Allah Taala, lebuh kitai rinduka Allah Taala lalu ngasika pesan Iya.

³ Laban reti rinduka Allah Taala nya kitai ngasika pesan Iya. Lalu pesan Iya ukai utai ti mar dititihka kitai.

⁴ Laban barang sapa diadaka Allah Taala, ngalahka dunya. Lalu kitai ngalahka dunya ngena pengarap kitai.

⁵Sapa ulih ngalahka dunya kelimpah ari orang ke arapka Jesus nya Anak Allah Taala?

⁶ Jesus Kristus datai ngagai dunya ngena ai enggau darah, ukai semina ngena ai aja tang ngena ai enggau darah. Lalu Roh Kudus Empu ke besaksika nya, laban Roh Kudus nya pemendar.

⁷Nya alai tiga bengkah utai ti besaksi:

⁸Roh Kudus, ai, enggau darah, lalu sida tiga nya besetuju enggau pangan diri.

⁹ Enti kitai teterimaka saksi mensia, saksi Allah Taala lebih besai agi ari nya, laban tu saksi ti diberi Allah Taala pasal Anak Iya.

¹⁰ Orang ke arapka Anak Allah Taala bisi saksi nya dalam ati sida. Barang sapa enda arapka Allah Taala,[38] udah ngumbai Allah Taala bula, laban iya enda arapka saksi Allah Taala pasal Anak Iya.

¹¹ Tu meh saksi nya: Allah Taala meri kitai pengidup ti meruan belama iya, lalu pengidup nya dalam Anak Iya.

¹² Barang sapa bisi Anak Allah Taala, bisi pengidup. Barang sapa nadai Anak Allah Taala, nadai pengidup.

¹³ Aku nuliska tu ngagai kita ke arapka nama Anak Allah Taala, ngambika kita nemu diri bisi pengidup ti meruan belama iya.

¹⁴ Baka tu ku pemerani kitai di mua Allah Taala, iya nya enti kitai minta sebarang utai nitihka peneka Iya, Iya ninga kitai.

¹⁵Lalu enti kitai nemu Iya ningaka kitai genap kali kitai minta sebarang utai ari Iya, kitai nemu diri udah bulih utai ti dipinta kitai ari Iya.

¹⁶Enti kita meda menyadi[39] kita bedosa, tang dosa nya enda ngujung ngagai pemati, kita patut besampi ngagai Allah Taala, lalu Allah Taala[40] deka meri pengidup ngagai iya, enti dosa nya enda ngujung ngagai pemati. Bisi siti dosa ti ngujung ngagai pemati; aku ukai madahka kita patut besampika nya.

¹⁷Semua penyalah endang dosa magang, tang bisi dosa ti enda ngujung ngagai pemati.

¹⁸ Kitai nemu, orang ke diadaka Allah Taala, enda agi bedosa tang dijaga Anak Allah Taala, lalu Sitan enda ulih negu[41] iya.

¹⁹Kitai nemu diri anak Allah Taala, lalu kitai mega nemu semua dunya di baruh kuasa Sitan.

²⁰ Lalu kitai nemu Anak Allah Taala udah datai lalu udah meri kitai penemu, ngambika kitai nemu Allah Taala ti bendar. Lalu kitai meruan dalam Allah Taala ti bendar, dalam Anak Iya Jesus Kristus. Iya nya meh Allah Taala ti bendar, enggau pengidup ti meruan belama iya.

²¹Anak, kejangka diri jauh ari engkeramba! [42]